Петӧм 7 - Коми Библия 2023

¹ Господь шуис Мӧисейлы: «Ме пукті тэнӧ фараонлы Ен пыдди, а Аарон вокыд лоас тэнад пророкӧн.

² Тэ висьтав Аарон вокыдлы ставсӧ, мый Ме тшӧкта тэныд, а сійӧ висьталас фараонлы, медым фараон лэдзас Израиль пиянӧс мунны аслас муысь.

³ Но Ме чорзьӧда фараонлысь сьӧлӧмсӧ и петкӧдла Египет муын уна индысьпас да шензьӧданатор.

⁴ Фараон оз кывзы тіянӧс. Сэки Ме лэпта киӧс Египет му вылӧ да чорыда мыжда сійӧс, а Израиль войтырӧс, Ассьым тышкайӧзӧс, Ме петкӧда сэтысь.

⁵ Кор Ме лэпта киӧс Египет вылӧ да петкӧда сэтысь Израиль пиянӧс, сэки египетсаяс тӧдмаласны, мый Ме – Господь».

⁶ Мӧисей да Аарон вӧчисны Господьлӧн тшӧктӧм серти.

⁷ Мӧисейлы вӧлі кӧкъямысдас арӧс, а сылӧн Аарон воклы – кӧкъямысдас куим, кор найӧ сёрнитісны фараонкӧд.

⁸ Господь шуис Мӧисейлы да Ааронлы:

⁹ «Фараон кӧ тшӧктас тіянлы петкӧдлыны шензьӧданатор [либӧ индысьпас], шу Аарон вокыдлы, мед шыбитас бедьсӧ фараон водзӧ [да сылӧн йӧз водзӧ му вылас], и беддьыс пӧрас змейӧ».

¹⁰ Мӧисей да Аарон локтісны фараон [да сылӧн йӧзыс] дінӧ да ставсӧ вӧчисны сідзи, кыдзи тшӧктіс налы Господь. Аарон шыбитіс бедьсӧ фараон да сылӧн йӧзыс водзӧ, и беддьыс пӧри змейӧ.

¹¹ Фараон корис египетса тӧдысьясӧс да тунъясӧс. Асланыс кимӧститчӧмӧн найӧ вӧчисны тадзи жӧ.

¹² Быдӧн на пиысь шыбитіс ассьыс бедьсӧ, и бедьясныс пӧрины змейясӧ, но Ааронлӧн беддьыс ньылыштіс найӧс.

¹³ Фараонлӧн сьӧлӧмыс чорзис, сійӧ эз кут кывзыны Мӧисейӧс да Ааронӧс. Та йылысь [налы] водзвыв висьтавліс Господь.

Медводдза бырӧдантор: ва лоӧ вирӧн

¹⁴ Господь шуис Мӧисейлы: «Фараонлӧн сьӧлӧмыс пыксьӧ, сійӧ оз кӧсйы лэдзны войтырӧс.

¹⁵ Аски асывнас мун фараон дінӧ. Сійӧ лэччас Нил ю дорӧ. Сэні сувт сылы воча. Змейӧ пӧрлӧм бедьтӧ босьт киад

¹⁶ да шу фараонлы: Господь, еврейяслӧн Ен, мӧдӧдіс менӧ висьтавны тэныд, мед тэ лэдзан Сылысь войтырсӧ овтӧминӧ юрбитны Сылы. Тэ эн кывзысь,

¹⁷ та вӧсна Господь тадзи висьталӧ: ӧні тэ тӧдмалан, мый Ме – Господь. Тайӧ бедьнас ме вачка Нил юлӧн ва веркӧсас, и ваыс пӧрас вирӧ.

¹⁸ Юын чериыс кулас, ваыс дуксяс. Египетсаяслы зывӧк лоӧ сэтысь васӧ юны».

¹⁹ Господь шуис Мӧисейлы: «Тшӧкты Аарон вокыдлы босьтны киас бедьсӧ да нюжӧдны сійӧс египетса ваяслань – юяс, шоръяс, тыяс да быдсикас ва видзанінъяслань. Египет пасьтала ваыс лоӧ вирӧн, тадзи лоӧ весиг пуысь да изйысь вӧчӧм дозъясын».

²⁰ Мӧисей да Аарон вӧчисны Господьлӧн тшӧктӧм серти. Аарон лэптіс бедьсӧ, фараон да сылӧн йӧзыс син водзын вачкис Нил юӧ, и ваыс пӧри вирӧ.

²¹ Юын чериыс куліс, а ваыс лои лёк дука. Египетсаяс эз вермыны юны сэтысь васӧ. Египет му пасьтала вӧлі вир.

²² Египетса тунъяс кимӧститчӧмӧн вӧчисны сійӧ жӧ, мый вӧчисны Мӧисей да Аарон. Фараонлӧн сьӧлӧмыс чорзис, сійӧ эз кут кывзыны Мӧисейӧс да Ааронӧс. Та йылысь водзвыв висьтавліс Господь.

²³ Фараон бергӧдчис да пырис аслас керкаӧ. Сылы вӧлі веськодь.

²⁴ Египетсаяс Нил ю гӧгӧр кодйисны юкмӧсъяс, корсисны юан ва, ӧд юсьыс васӧ эз шогмы юнысӧ.

²⁵ Коли сизим лун сэксянь, кор Нил юысь васӧ Господь пӧртіс вирӧ.