Петӧм 6 - Коми Библия 2023

Ен бара корӧ Мӧисейӧс

¹ Господь шуис Мӧисейлы: «Ӧні тэ аддзан, мый Ме вӧча фараонлы. Ме лэпта киӧс сы вылӧ, и сійӧ лэдзас Менсьым войтырӧс, весиг вӧтлас найӧс аслас муысь».

² Ен шуис Мӧисейлы: «Ме – Господь.

³ ”Ставсӧвермысь Ен” ним улын Ме петкӧдчи Ӧвраамлы, Исааклы да Яковлы, но ”Господь” ним улын Ме налы эг воссьыв.

⁴ Ме кӧрталі накӧд йитӧд, кӧсйыси сетны налы Ханаан му, кӧні найӧ вӧліны ветлысь-мунысьяс.

⁵ Ме кылі, кыдзи ойзӧны Израиль пиян египетсалӧн нартитӧм улын, да тӧд вылӧ уськӧді Ассьым йитӧдӧс.

⁶ Висьтав Израиль пиянлы: Ме – Господь. Ме чорыда мыжда Египет войтырӧс, а тіянӧс петкӧда налӧн нартитӧм улысь. Ме нюжӧда киӧс да мезда тіянӧс.

⁷ Ті лоанныд Менам войтырӧн, а Ме – тіян Енмӧн. Ті тӧдмаланныд, мый Ме – Господь, тіян Енныд, коді петкӧдіс тіянӧс египетсалӧн нартитӧм улысь.

⁸ Ме нуӧда тіянӧс муӧ, мый киӧс лэптӧмӧн кӧсйыси сетны Ӧвраамлы, Исааклы да Яковлы. Ме сета сійӧс тіянлы, ӧд Ме – Господь».

⁹ Мӧисей висьталіс тайӧ кывъяссӧ Израиль пиянлы, но шогалӧм да сьӧкыд удж вӧснаныс найӧ эз кывзыны сійӧс.

¹⁰ Господь тшӧктіс Мӧисейлы:

¹¹ «Мун фараон дінӧ, египетса ӧксы дінӧ, да шу, мед лэдзас Израиль пиянӧс мунны аслас муысь».

¹² Мӧисей та вылӧ шуис Господьлы: «Израиль пиян кӧ эз кывзыны менӧ, кывзас-ӧ менӧ фараон? Ме ог куж сёрнитны».

¹³ Господь тшӧктіс Мӧисейлы да Ааронлы мунны Израиль пиян дінӧ да фараон, египетса ӧксы, дінӧ, медым петкӧдны Израиль пиянӧс Египетысь.

Мӧисейлӧн да Ааронлӧн рӧдыс

¹⁴ Тані лыддьӧдлӧма Израиль чужанкотыръяслысь рӧдкутысьяссӧ. Израильлӧн медводдза пиыс вӧлі Рувим. Рувимлӧн пияныс: Енок, Паллу, Хецрон да Карми. Насянь паськаліс Рувимлӧн рӧдыс.

¹⁵ Симеонлӧн пияныс: Емуэл, Ямин, Огад, Якин, Цохар да ханаанса аньлӧн Саул пи. Насянь паськаліс Симеонлӧн рӧдыс.

¹⁶ Левий пиянлӧн нимъясныс чужан во сертиныс: Гирсон, Кааф да Мерари. Левий оліс сё комын сизим арӧсӧдз.

¹⁷ Гирсонлӧн пияныс: Ливни да Шимей асланыс рӧдъяскӧд.

¹⁸ Каафлӧн пияныс: Амрам, Ицгар, Хеврон да Узиэл. Кааф оліс сё комын куим арӧсӧдз.

¹⁹ Мерарилӧн пияныс: Махли да Муши. Татшӧм вӧлі Левийлӧн рӧдыс.

²⁰ Амрам босьтіс гӧтырӧ ассьыс Иокеведа тьӧтсӧ, коді чужтіс сылы Ааронӧс да Мӧисейӧс [да налысь Мирьям чойсӧ]. Амрам оліс сё комын сизим арӧсӧдз.

²¹ Ицгарлӧн пияныс: Корей, Нефег да Зикри.

²² Узиэллӧн пияныс: Мисаэл, Элцафан да Ситри.

²³ Аарон босьтіс гӧтырӧ Элишеваӧс, Аминадавлысь нывсӧ, Наашонлысь чойсӧ. Элишева чужтіс сылы Надавӧс, Авиудӧс, Элазарӧс да Итамарӧс.

²⁴ Корейлӧн пияныс: Асир, Элкан да Авиасаф. Насянь паськаліс Корейлӧн рӧдыс.

²⁵ Ааронлӧн Элазар пиыс босьтіс гӧтырӧ Футиэллӧн нывъяс пиысь ӧтиӧс, коді чужтіс сылы Пинесӧс. Тайӧ вӧліны Левий чужанкотырлӧн рӧдкутысьяс асланыс рӧд сертиныс.

²⁶ Мӧисейлы да Ааронлы Господь тшӧктіс петкӧдны Израиль пиянӧс Египет муысь тышкайӧзӧс моз.

²⁷ Та могысь Мӧисей да Аарон мунісны сёрнитны фараонкӧд, египетса ӧксыкӧд.

Ааронлӧн бедь

²⁸ Египет муын Господь шуис Мӧисейлы:

²⁹ «Ме – Господь. Висьтав фараонлы, египетса ӧксылы, ставсӧ, мый Ме висьтала тэныд».

³⁰ А Мӧисей шуис Господьлы: «Ме ог куж сёрнитны, дай кывзас-ӧ менӧ фараон?»