Петӧм 4 - Коми Библия 2023

¹ Но Мӧисей вочавидзис: «Оз кӧ эскыны, оз кывзыны менӧ, а шуасны, эз пӧ петкӧдчыв тэныд Господь? [Сэки мый ме шуа налы?]»

² Господь юаліс Мӧисейлысь: «Мый тэнад киын?» Сійӧ вочавидзис: «Бедь».

³ Господь шуис: «Шыбит сійӧс му вылӧ». Мӧисей шыбитіс бедьсӧ му вылӧ, и беддьыс пӧри змейӧ. Мӧисей котӧрӧн вешйис сы дорысь.

⁴ Господь шуис Мӧисейлы: «Нюжӧд китӧ да босьт сійӧс бӧжӧдыс». Мӧисей нюжӧдіс кисӧ да босьтіс змейӧс [бӧжӧдыс]. Сылӧн киас змей бӧр лои беддьӧн.

⁵ Господь шуис: «Вӧч тайӧс, мед найӧ эскасны, мый збыльысь тэныд петкӧдчис Господь, налӧн батьяслӧн Ен – Ӧвраамлӧн Ен, Исааклӧн Ен да Яковлӧн Ен».

⁶ Господь нӧшта шуис сылы: «Сюй китӧ питшӧгад». Мӧисей сюйис кисӧ питшӧгас, а кор бӧр перйис, сылӧн киыс лои проказаысь лым кодь еджыд.

⁷ Господь шуис: «Китӧ бӧр сюй питшӧгад». Мӧисей бара сюйис кисӧ питшӧгас. Сэсся перйис кисӧ, и киыс бӧр лои вир-яйыс кодь сӧстӧм.

⁸ Господь шуис: «Оз кӧ эскыны тэныд да медводдза индысьпасыслы, сідзкӧ, мӧд индысьпасыслы эскасны.

⁹ А кыкнан индысьпасыслы кӧ оз эскыны да оз кывзыны тэнсьыд кывъястӧ, сэки гумовт Нил юысь васӧ да койышт му вылӧ, и ваыс сэні пӧрас вирӧ».

¹⁰ «Ыджыдӧй, – шыасис Мӧисей Господь дінӧ, – ме абу кыв-вора и некор татшӧмнас эг вӧв. Весиг ӧні, кор Тэ сёрнитан мекӧд, Аслад кесйӧгкӧд, ме сьӧкыда да мыкталӧмӧн сёрнита».

¹¹ Господь вочавидзис Мӧисейлы: «Коді вӧчис мортлысь вомсӧ? Коді вӧчӧ мортӧс кывтӧмӧн либӧ пельтӧмӧн, синмаӧн либӧ синтӧмӧн? Ог-ӧ Ме, Господь [Ен]?

¹² Мун, Ме лоа тэкӧд. Ме сета тэныд, мый шуны».

¹³ Мӧисей корис: «Господьӧй, ысты кодӧскӧ мӧдӧс».

¹⁴ Господь скӧрмис Мӧисей вылӧ да шуис: «Тэнад эм Аарон вок, Левий чужанкотырысь. Ме тӧда, мый сійӧ кужас [тэ пыдди] сёрнитны. Сійӧ локтӧ нин тэ дінӧ. Тэнӧ аддзас да, сьӧлӧмыс пондас нимкодясьны.

¹⁵ Тэ висьтав сылы Менсьым кывъясӧс, пукті вомас, мый шуны. Ме лоа тіянкӧд, кор ті кутанныд сёрнитны, да велӧда, мый колӧ вӧчны.

¹⁶ Аарон кутас тэ пыдди сёрнитны йӧзыскӧд. Тадзи сійӧ лоӧ тэнад вомӧн, а тэ кутан висьтавны сылы Ен пыдди.

¹⁷ Босьт аслад киӧ [змейӧ пӧртлӧм] бедьтӧ. Сы отсӧгӧн тэ кутан вӧчны индысьпасъяс».

Мӧисей бӧр мунӧ Египетӧ

¹⁸ Мӧисей локтіс Иофор тесьт дінӧ да шуис сылы: «Лэдз меным бӧр мунны Египетӧ вокъяс дінӧ, медым тӧдмавны, ловъяӧсь-ӧ найӧ». Иофор шуис Мӧисейлы: «Мун лӧнь сьӧлӧмӧн». [Кад мысти куліс египетса ӧксы.]

¹⁹ Мадиан муын Господь шуис Мӧисейлы: «Мун бӧр Египетӧ. Кодъяс кӧсйисны вины тэнӧ, найӧ абу нин ловъяӧсь».

²⁰ Мӧисей пуксьӧдіс гӧтырсӧ да пиянсӧ осёлъяс вылӧ, медым мӧдӧдчыны Египет муӧ. Енлысь бедьсӧ Мӧисей босьтіс киас.

²¹ Господь шуис Мӧисейлы: «Кор тэ воан Египетӧ, вӧч сэні фараон водзын став шензьӧданаторсӧ, мый Ме тшӧкті тэныд вӧчны. Ме чорзьӧда фараонлысь сьӧлӧмсӧ, и сійӧ оз лэдз Израиль войтырӧс.

²² Сэки шу фараонлы, мый Господь [еврейяслӧн Ен] тадзи висьталӧ: Израиль – Менам пи, Менам медводдза чужысь.

²³ Тшӧкта тэныд: лэдз Менсьым пиӧс юрбитны Меным. А он кӧ лэдз, Ме виа тэнсьыд медводдза чужысь питӧ».

²⁴ Войнас, кор Мӧисей аслас котырыскӧд туйын шойччис, Господь локтіс Мӧисей дінӧ да кӧсйис вины сійӧс.

²⁵ Сэки Сеппора босьтіс ёсь из да вундыштіс пиыслысь чильган йывсьыс кучикторсӧ, сэсся инмӧдчыліс сыӧн Мӧисейлы коквож костас шуӧмӧн: «Вир пыр тэ меным верӧспу».

²⁶ Та бӧрын Господь вешйис Мӧисей дінысь. Сеппоралӧн ”вир пыр верӧспу” кывъясыс висьталӧны вундыштчӧм йылысь.

²⁷ Господь шуис Ааронлы: «Мун Мӧисейлы воча овтӧминӧ». Аарон петіс туйӧ. Енлӧн керӧс горулын сійӧ паныдасис Мӧисейкӧд да окыштіс сійӧс.

²⁸ Мӧисей висьталіс Ааронлы ставсӧ, мый шуис Господь, кыдзи мӧдӧдіс сійӧс да кутшӧм индысьпасъяс сылы тшӧктіс вӧчны.

²⁹ Египетӧ локтӧм бӧрын Мӧисей да Аарон чукӧртісны Израиль войтырлысь юрнуӧдысьясӧс.

³⁰ Аарон висьталіс налы ставсӧ, мый Господь шуис Мӧисейлы. Войтырыслӧн син водзын Мӧисей петкӧдліс индысьпасъяс.

³¹ Войтырыс эскис. Кор найӧ кылісны, мый Господь волӧма Израиль войтыр дінӧ да аддзӧма налысь сьӧкыдалӧмсӧ, муӧдзыс копыртчӧмӧн юрбитісны Господьлы.