Петӧм 39 - Коми Библия 2023

Попъяслы вежа паськӧм

¹ Вежаинын кесъялан паськӧмсӧ вӧчисны гӧрдовлӧз, пемыдгӧрд да югыдгӧрд вурун шӧртъясысь. Ааронлы вежа паськӧмсӧ лӧсьӧдісны, кыдзи Господь тшӧктіс Мӧисейлы.

² Зарниысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь кыисны ефод.

³ Зарнисӧ медводз плавкӧстісны, а сэсся вундалісны сунис моз, медым серлӧдлӧмӧн кыны сійӧс гӧрдовлӧз, пемыдгӧрд да югыдгӧрд вурун шӧртъяс да вӧсни шабді шӧртъяс костӧ.

⁴ Ефодӧ кыкнан пельпомас вӧчисны кӧрталана кык ластавич.

⁵ Ачыс ефодыс да сы дінӧ вӧньыс кыанногнас вӧліны ӧткодьӧсь. Вӧньсӧ кыисны ефодӧс моз сійӧ жӧ зарни сунисысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь, кыдзи Господь тшӧктіс Мӧисейлы.

⁶ Дасьтісны оникс изъяс да доргӧгӧралісны найӧс зарниӧн. Из вундалысь моз гижисны Израиль пиянлысь нимъяссӧ изъяс вылас.

⁷ Изъяссӧ йитісны ефодлӧн ластавичьяс вылӧ, медым лоины Израиль пиянлы казьтыланпасӧн, кыдзи Господь тшӧктіс Мӧисейлы.

⁸ Зарниысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь ефодӧс моз серлӧдлӧмӧн кыисны морӧсводз.

⁹ Сійӧ вӧлі кыкпӧвсталӧм дӧраысь, нёль пельӧса, весьт кузьта да весьт пасьта.

¹⁰ Сы вылӧ нёль визьӧн йитлісны дона изъяс. Медводдза визяс вӧліны рубин, топаз да изумруд,

¹¹ мӧд визяс – карбункул, сапфир да алмаз,

¹² коймӧд визяс – яхонт, агат да аметист,

¹³ нёльӧд визяс – хризолит, оникс да яшма изъяс. Став изсӧ вӧлі доргӧгӧралӧма зарниӧн.

¹⁴ Израиль пиянлӧн дас кык ним серти изйыс вӧлі дас кык. Быд из вылӧ вӧлі вундалӧмӧн гижӧма ӧти чужанкотырлысь нимсӧ.

¹⁵ Весалӧм зарниысь кӧв моз гартлӧмӧн вӧчисны морӧсводзлы чепъяс.

¹⁶ Нӧшта вӧчисны кык зарни дорыш да кык зарни кольча. Кольчаяссӧ пысалісны морӧсводзлӧн вылыс пельӧсъясас.

¹⁷ Быд кольчаӧ сюйисны зарниысь вӧчӧм чепсӧ,

¹⁸ а чеп помъяссӧ йитісны водзладорсянь ефод ластавичьяс вылӧ пуктӧм кыкнан зарни дорышӧ.

¹⁹ Нӧшта вӧчисны кык зарни кольча да йитісны найӧс морӧсводз улі пельӧсъясас гугладорсяньыс, кӧні морӧсводз инмӧ ефодӧ.

²⁰ Сідзжӧ вӧчисны кык зарни кольча да йитісны найӧс водзладорсянь ефодлӧн кыкнан ластавич бердас, улісяньыс вурыс дінас, вӧнь весьттіыс.

²¹ Морӧсводз кольчаяссӧ йитісны ефод кольчаяскӧд гӧрдовлӧз вурун шӧртӧн, медым морӧсводзыс вӧлі вӧньсьыс вылынджык да вӧлі бура йитӧма ефод бердӧ. Тадзи Господь тшӧктіс Мӧисейлы.

²² Гӧрдовлӧз вурунысь кыисны риза, медым новлыны сійӧс ефодкӧд.

²³ Ризасӧ пасьталісны юр вывсянь. Сылысь сьылігӧгӧрсӧ вӧлі вурӧма тышкайӧз паськӧм моз, медым эз резьды.

²⁴ Риза бӧждорӧ вӧчисны гӧрдовлӧз, пемыдгӧрд да югыдгӧрд вурунысь гранат кодь сяръяс.

²⁵ Весалӧм зарниысь вӧчисны тіньганъяс да ӧшлісны найӧс бӧждор гӧгӧрыс гранат кодь сяръяс костӧ.

²⁶ Ризалӧн бӧждор гӧгӧрыс сьӧрсьӧн-бӧрсьӧн ӧшалісны тіньган, сэсся сяр и бара тіньган. Тайӧ ризасӧ колӧ вӧлі пасьтавны кесъялігӧн, кыдзи Господь тшӧктіс Мӧисейлы.

²⁷ Ааронлы да сылӧн пиянлы кыисны вӧсни шабді шӧртысь дӧрӧмъяс,

²⁸ юркӧртӧд да юрвевттьӧдъяс, а путшкӧм шабді шӧртысь кыисны улыс гачьяс.

²⁹ Путшкӧм шабді шӧртысь да гӧрдовлӧз, пемыдгӧрд да югыдгӧрд вурун шӧртъясысь серлӧдлӧмӧн кыисны вӧнь, кыдзи Господь тшӧктіс Мӧисейлы.

³⁰ Весалӧм зарниысь вӧчисны пӧвтор – вежа мичмӧдчантор. Вундалӧмӧн гижисны сэтчӧ ”вежӧдӧма-торйӧдӧма Господьлы”.

³¹ Сэсся кӧрталісны сійӧс гӧрдовлӧз кӧвйӧн юркӧртӧдас, кыдзи Господь тшӧктіс Мӧисейлы.

Мӧисейлы вайӧны вежа чом став коланаторнас

³² Тадзи вӧлі помалӧма вежа чом вӧчан уджъяс. Израиль пиян вӧчисны ставсӧ, кыдзи Господь тшӧктіс Мӧисейлы.

³³ Найӧ вайисны Мӧисейлы вежа чом и сэтчӧ став коланаторсӧ: дӧраяс, пысӧдъяс, брусъяс, йитан потшъяс, сюръяяс да подувъяс,

³⁴ гӧрд рӧма меж кучикысь вевттьӧд, лӧз рӧма кучикысь вевттьӧд, ӧшӧдан дӧра,

³⁵ Йитӧд куд, сылысь потшъяссӧ да вевтсӧ,

³⁶ пызан, сылы став коланаторсӧ да вежа нянь,

³⁷ весалӧм зарниысь вӧчӧм бикок, сы вылӧ пуктана би дозъяс став коланаторнас да сэтчӧ кисьтан вый,

³⁸ зарни висьпуктанін, мавтыштан вый, чӧскыд дука тшынӧдчанторъяс, вежа чом пыранінӧ ӧшӧдан дӧра,

³⁹ ыргӧн висьпуктанін, сылы ыргӧн радз, потшъяс да став коланаторсӧ, мыссян доз да сылы кок,

⁴⁰ йӧр тупкан дӧраяс, сюръяяс да подувъяс, йӧр пыранінӧ ӧшӧдан дӧра, гезъяс, майӧгъяс да став дозмук-кӧлуйсӧ, мый колӧ вежа чомйын кесъялӧм могысь,

⁴¹ тшӧтш вежаинын кесъялан паськӧм – Аарон поплы вежа паськӧм да сылӧн пияныслы попӧн кесъялан паськӧм.

⁴² Израиль пиян ставсӧ вӧчисны сідзи, кыдзи Господь тшӧктіс Мӧисейлы.

⁴³ Мӧисей аддзис, мый став уджсӧ найӧ вӧчӧмаӧсь Господьлӧн тшӧктӧм серти. И Мӧисей бурсиис найӧс.