Петӧм 38 - Коми Библия 2023

Висьпуктанін да мыссян доз вӧчӧм

¹ Безалел вӧчис акация пуысь сотан висьлы висьпуктанін. Сійӧ вӧлі нёль пельӧса, кузьтанас и пасьтанас – вит гырддза, судтанас – куим гырддза.

² Нёльнан пельӧсас вӧчис сюръяс. Висьпуктанінкӧд найӧ вӧліны ӧтторъяӧсь. Эжис ставсӧ ыргӧнӧн.

³ Висьпуктанінлы вӧчис став дозмук-кӧлуйсӧ: пӧим воръяс, пӧим куралан зыръяс, вир резан тасьтіяс, яй бергӧдлан вилаяс, ӧгыр пӧртъяс. Ставсӧ тайӧс вӧчис ыргӧнысь.

⁴ Висьпуктанін пытшкас вӧчис ыргӧн радз. Висьпуктанін доргӧгӧрас йитіс радзсӧ улісяньыс. Раддзыс вӧлі висьпуктанін джынйӧдзыс.

⁵ Радз нёльнан пельӧсас вӧчис кольча, медым сэтчӧ позис сюйны потш.

⁶ Потшъяссӧ вӧчис акация пуысь, эжис найӧс ыргӧнӧн

⁷ да сюйис висьпуктанінлӧн кыкнанладор кольчаясас, медым позис новлӧдлыны сійӧс. Асьсӧ висьпуктанінсӧ вӧлі вӧчӧма пӧвйысь, сылӧн пытшкӧсыс вӧлі куш.

⁸ Безалел вӧчис ыргӧн рӧмпӧштанъясысь мыссян доз да сылысь коксӧ. Рӧмпӧштанъяссӧ сетісны вежа чом пыранінын кесъялысь аньяс.

Вежа йӧр вӧчӧм

⁹ Безалел вӧчис йӧр. Путшкӧм шабді шӧртысь сійӧ кыис сё гырддза кузьта дӧра, медым ӧшӧдны сійӧс йӧр пӧлӧн лунвывладорас.

¹⁰ Дӧрасӧ ӧшӧдӧм могысь вӧчисны кызь сюръя. Сюръяяслы вӧчисны кызь ыргӧн подув, эзысь пысӧдъяс да йитвежъяс.

¹¹ Йӧр войвывладорас ӧшӧдӧм могысь кыисны сё гырддза кузьта дӧра, вӧчисны кызь сюръя да налы кызь ыргӧн подув. Сюръя пысӧдъяссӧ да йитвежъяссӧ вӧчисны эзысьысь.

¹² Йӧр рытывладорас ӧшӧдӧм могысь кыисны ветымын гырддза кузьта дӧра, вӧчисны дас сюръя да налы дас подув. Сюръя пысӧдъяссӧ да йитвежъяссӧ вӧчисны эзысьысь.

¹³ Йӧр асывладор пасьтаыс вӧлі ветымын гырддза.

¹⁴ Пыранін ӧтарладорас ӧшӧдӧм могысь кыисны дас вит гырддза кузьта дӧра, вӧчисны куим сюръя да сюръяяслы куим подув.

¹⁵ Тадзи жӧ пыранін мӧдарладорас ӧшӧдӧм могысь кыисны дас вит гырддза кузьта дӧра, вӧчисны куим сюръя да сюръяяслы куим подув.

¹⁶ Ставнас йӧр тупкан дӧрасӧ кыисны путшкӧм шабді шӧртысь.

¹⁷ Сюръя подувъясыс вӧліны ыргӧнысь, сюръя пысӧдъясыс да йитвежъясыс – эзысьысь, а сюръя йывъяссӧ вӧлі эжӧма эзысьӧн. Йӧр сюръяяссӧ йитлісны эзысь йитвежъясӧн.

¹⁸ Йӧр пыранінӧ ӧшӧдан дӧрасӧ вӧлі серлӧдлӧмӧн кыӧма гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь. Пасьтанас вӧлі кызь гырддза, а судтанас йӧр гӧгӧр ӧшӧдан дӧра моз – вит гырддза.

¹⁹ Медым йӧр пыранінӧ ӧшӧдны дӧра, вӧлі вӧчӧма нёль сюръя да сюръяяслы нёль ыргӧн подув. Сюръя йывъяссӧ вӧлі эжӧма эзысьӧн. Дӧра пысӧдъяс да йитвежъяс вӧліны эзысьысь.

²⁰ Вежа чом майӧгъяс да йӧр дӧраяс зэвтан майӧгъяс вӧліны ыргӧнысь.

Зарни-эзысь да ыргӧн сьӧкта

²¹ Мӧисейлӧн тшӧктӧм серти Аарон поплӧн Итамар пи веськӧдлӧм улын левитъяс гижисны ставсӧ, мыйысь вӧлі вӧчӧма йитӧдлысь вежа чомсӧ.

²² Иуда чужанкотырысь Хур Урилӧн Безалел пиыс вӧчис ставсӧ, мый Господь тшӧктіс Мӧисейлы.

²³ Безалелкӧд вӧчасис тшӧтш Оголиав. Сійӧ вӧлі Дан чужанкотырысь, Ахисамаклӧн пиыс, пуысь вӧчасьысь да кысьысь. Сійӧ кужис мичмӧдны серпасъясӧн гӧрдовлӧз, пемыдгӧрд да югыдгӧрд вурун шӧртъясысь да вӧсни шабді шӧртысь кыӧм дӧраяс.

²⁴ Вежаин да сэтчӧ став коланаторсӧ вӧчӧм вылӧ зарниыс муніс кызь ӧкмыс талант да сизимсё комын сикель вежаинса сикель серти. Тайӧ зарнисӧ вӧлі вайӧма Господьлы козин пыдди.

²⁵ Йӧзӧс арталігӧн чукӧртісны сё талант да сюрс сизимсё сизимдас вит сикель эзысь вежаинса сикель серти.

²⁶ Кызь арӧса да ыджыдджык арлыда айуловысь, кодъясӧс вӧлі арталӧма-гижалӧма, быдӧн мынтіс сикель джын вежаинса сикель серти. Налӧн лыдыс вӧлі квайтсё куим сюрс витсё ветымын морт.

²⁷ Сё талант эзысь муніс вежаинлы да ӧшӧдан дӧралы подувъяс кисьтӧм вылӧ. Сё талант эзысьысь вӧлі вӧчӧма сё подув, ӧти подув вылӧ муніс ӧти талант.

²⁸ Сюрс сизимсё сизимдас вит сикель эзысьысь вӧлі вӧчӧма сюръяяслы пысӧдъяс да йитвежъяс, эжӧма сюръя йывъяссӧ.

²⁹ Господьлы козин пыдди вайӧм ыргӧнлӧн сьӧктаыс вӧлі сизимдас талант да кык сюрс нёльсё сикель.

³⁰ Сыысь вӧчисны вежа чом пыранінӧ сюръяяслы подувъяс, ыргӧн висьпуктанін, сылы ыргӧн радз да дозмук-кӧлуй,

³¹ йӧр сюръяяслы подувъяс, йӧр пыранін сюръяяслы подувъяс, вежа чомлы да йӧр гӧгӧр ӧшӧдан дӧралы майӧгъяс.