Петӧм 37 - Коми Библия 2023

Вежа чомйӧ став коланаторсӧ вӧчӧм

¹ Безалел вӧчис акация пуысь куд: кузьтанас кык да джын гырддза, пасьтанас гырддза да джын, судтанас гырддза да джын.

² Пытшкӧссяньыс да ортсысяньыс эжис сійӧс весалӧм зарниӧн. Куд гӧгӧрыс вӧчис зарни дорыш.

³ Зарниысь кисьтіс нёль кольча да йитіс найӧс кудлӧн нёльнан улі пельӧсас: кыксӧ – ӧтар бокас, а мӧд кыксӧ – мӧдар бокас.

⁴ Акация пуысь вӧчис потшъяс да эжис найӧс зарниӧн.

⁵ Потшъяссӧ сюйис кудлӧн кыкнанбокса кольчаясӧ, медым на отсӧгӧн позис новлӧдлыны кудсӧ.

⁶ Весалӧм зарниысь вӧчис кудйыслы вевт: кузьтанас кык да джын гырддза, пасьтанас гырддза да джын.

⁷ Вевт помъясӧ дорис кык зарни херувимӧс.

⁸ Ӧти херувимыс вӧлі вевт ӧтар помас, мӧдыс – мӧдар помас. Вевтыскӧд найӧ вӧліны ӧтторъяӧсь.

⁹ Вывлань шевкнитчӧм бордъяснас херувимъяс тупкисны куд вевтсӧ да воча сулалӧмӧн видзӧдісны вевт вылас.

¹⁰ Акация пуысь Безалел вӧчис пызан: кузьтанас кык гырддза, пасьтанас ӧти гырддза, судтанас гырддза да джын.

¹¹ Пызансӧ эжис весалӧм зарниӧн да гӧгӧрыс вӧчис зарни дорыш.

¹² Пызанлы вӧчис ки пыдӧс судта дор, а сылысь дорышсӧ вӧчис зарниысь.

¹³ Вӧчис нёль зарни кольча да йитіс найӧс пызанлӧн нёльнан пельӧсас кокъяс бердас.

¹⁴ Кольчаясыс вӧліны пызан дор бердас, медым сэтчӧ позис сюйны потшъяс да новлӧдлыны пызансӧ.

¹⁵ Потшъяссӧ вӧчис акация пуысь да эжис зарниӧн.

¹⁶ Весалӧм зарниысь вӧчис тасьтіяс, дозмукъяс, кӧшъяс да кисьтан вись дозъяс. Ставсӧ тайӧс пуктывлісны пызан вылас.

¹⁷ Весалӧм зарниысь Безалел серлӧдлӧмӧн дорис бикок. Сылӧн заыс, вожъясыс, чашаясыс, чаша подъясыс да дзоридзьясыс вӧліны ӧтторъяӧсь.

¹⁸ Квайт вожсьыс куимыс кайис ӧтар боксяньыс, а мӧд куимыс – мӧдарсяньыс.

¹⁹ Вож вылас вӧлі куим чаша, найӧ вӧліны миндаль дзоридз сяма, подъяса да коръяса. Тадзи вӧлі квайтнан вож вылас.

²⁰ Бикок за вылас вӧлі нёль чаша, найӧ вӧліны миндаль дзоридз сяма, подъяса да коръяса.

²¹ Бикоклӧн медводдза кык вож улас вӧлі чаша под, мӧд кык вож улас – чаша под, коймӧд кык вож улас – чаша под.

²² Чаша подъясыс да вожъясыс бикокыскӧд вӧліны ӧтторъяӧсь, сійӧс ставнас вӧлі серлӧдлӧмӧн дорӧма весалӧм зарниысь.

²³ Вӧчис сизим би доз. Петельлы чепӧлясӧ да пӧим воръяссӧ вӧчис весалӧм зарниысь.

²⁴ Бикок да сылы став коланаторсӧ вӧчис талант мында весалӧм зарниысь.

²⁵ Акация пуысь Безалел вӧчис тшынӧдчан висьпуктанін. Сійӧ вӧлі нёль пельӧса, кузьтанас и пасьтанас – ӧти гырддза, а судтанас – кык гырддза. Сюръясыс висьпуктанінкӧд вӧліны ӧтторъяӧсь.

²⁶ Висьпуктанінлысь вывсӧ, бокъяссӧ да сюръяссӧ эжис весалӧм зарниӧн. Доргӧгӧрыс вӧчис зарни дорыш.

²⁷ Дорыш улас кыкнанладор бокас йитіс кык зарни кольча, медым кольчаясас позис сюйны потшъяс да новлӧдлыны висьпуктанінсӧ.

²⁸ Потшъяссӧ вӧчис акация пуысь да эжис зарниӧн.

²⁹ Мавтас вӧчысь моз дасьтіс мавтыштан вежа вый да чӧскыд дука сӧстӧм тшынӧдчантор.