Петӧм 36 - Коми Библия 2023

¹ Безалел, Оголиав да вӧчасьны кужысьяс пиысь мукӧдыс, кодъяслы Господь сетіс мывкыдлун да вежӧр, медым вӧчасны Господьлӧн тшӧктӧм серти ставсӧ, мый колӧ вежаинын кесъялӧмлы».

² Мӧисей корис Безалелӧс, Оголиавӧс да мукӧд вӧчасьны кужысьӧс, кодъяслӧн вӧлі Господьсянь мывкыдлун да сьӧлӧмсянь уджавны кӧсйӧм.

³ Мӧисей сетіс налы став вайӧмторсӧ, мый Израиль пиян чукӧртісны вежаин вӧчӧм могысь. Быд асыв йӧзыс вайисны Мӧисейлы козинъяс ас кӧсйӧм сертиныс.

⁴ Сэки киподтуя йӧз, кодъяс вӧчисны вежаинсӧ, локтісны

⁵ Мӧисей дінӧ висьтавны, мый йӧзыс вайӧны коланасьыс унджык, медым Господьлӧн тшӧктӧм серти вӧчны вежаин.

⁶ Мӧисей тшӧктіс юӧртны чомъяс дорын, медым айулов и аньяс оз нин вайны козинъяссӧ. И йӧзыс дугдісны вайны,

⁷ ӧд коланасьыс унджык вӧлі чукӧртӧма.

Вежа чом вӧчӧм

⁸ Киподтуя йӧз вӧчисны вежа чомсӧ дас дӧраысь. Дӧраяссӧ найӧ кыисны путшкӧм шабді шӧртысь да гӧрдовлӧз, пемыдгӧрд да югыдгӧрд вурун шӧртъясысь, мичмӧдісны херувим серпасъясӧн.

⁹ Кузьтанас дӧраыс вӧлі кызь кӧкъямыс гырддза, а пасьтанас – нёль гырддза. Даснан дӧраыс вӧліны ӧтыдждаӧсь.

¹⁰ Вит дӧрасӧ йитісны ӧта-мӧдыскӧд, мӧд витсӧ тшӧтш йитісны ӧта-мӧдыскӧд.

¹¹ Тайӧ кык ыджыд дӧрасӧ йитӧм могысь вӧчисны гӧрдовлӧз рӧма пекляяс.

¹² Кыкнан йитан дӧра помас вӧчисны ӧта-мӧдныслы воча ветымын пекля.

¹³ Вӧчисны ветымын зарни пысӧд да на отсӧгӧн йитлісны дӧраяссӧ. Тадзи вежа чомйыс лоис ӧтторъя.

¹⁴ Сэсся кыисны кӧза вурунысь дас ӧти дӧра, медым вӧчны вежа чом вевттьӧд.

¹⁵ Кузьтанас дӧраыс вӧлі комын гырддза, а пасьтанас – нёль гырддза. Дас ӧтикнан дӧраыс вӧліны ӧтыдждаӧсь.

¹⁶ Вит дӧрасӧ йитісны ӧта-мӧдыскӧд, и квайт дӧрасӧ йитісны ӧта-мӧдыскӧд.

¹⁷ Кык ыджыд дӧра помъясас вӧчисны ветымын пекля, медым йитны дӧраяссӧ.

¹⁸ Медым вежа чом вевттьӧдыс вӧлі ӧтторъя, вӧчисны ветымын ыргӧн пысӧд.

¹⁹ Нӧшта вӧчисны вежа чомлы кык вевттьӧд: ӧтисӧ гӧрд рӧма меж кучикысь, а сы вылӧ мӧдсӧ лӧз рӧма кучикысь.

²⁰ Вежа чом сувтӧдӧм могысь вӧчисны акация пуысь брусъяс.

²¹ Брускыс кузьтанас вӧлі дас гырддза, пасьтанас – гырддза да джын.

²² Быд брус помӧ вӧлі лӧсалӧма кык орчча тув. Татшӧмӧн вӧчисны вежа чомлысь став бруссӧ.

²³ Вежа чомлысь лунвывладор стенсӧ сувтӧдӧм могысь вӧчисны кызь брус.

²⁴ Брусъяслы вӧчисны нелямын эзысь подув: быд бруслы кык подув, быд тувлы ӧти подув.

²⁵ Вежа чомлысь войвывладор стенсӧ сувтӧдӧм могысь тшӧтш вӧчисны кызь брус

²⁶ да налы нелямын эзысь подув: быд бруслы кык подув.

²⁷ Вежа чомлысь рытыввывладор стенсӧ сувтӧдӧм могысь вӧчисны квайт брус.

²⁸ Вежа чом рытыввывладор кыкнан пельӧсас вӧчисны кык брус.

²⁹ Брусъяссӧ йитісны увсяньыс да вывсяньыс. Вывсяньыс йитісны кольча бердӧ. Тадзи вӧчисны кыкнан пельӧсас.

³⁰ Ставнас вӧлі кӧкъямыс брус да налы дас квайт эзысь подув: быд бруслы кык подув.

³¹ Акация пуысь вӧчисны йитан потшъяс: витӧс вежа чомлӧн ӧтарбокса брусъяслы,

³² витӧс вежа чомлӧн мӧдарбокса брусъяслы, витӧс вежа чом мышладор брусъяслы рытыввывсяньыс.

³³ Медшӧр йитан потшкыс муніс вежа чомлӧн ӧтар помсянь мӧдар помӧдзыс да йитіс брусъяссӧ шӧрӧдыс.

³⁴ Брусъяссӧ да найӧс йитан потшъяссӧ эжисны зарниӧн, потш сюян кольчаяссӧ вӧчисны зарниысь.

³⁵ Ӧшӧдан дӧрасӧ кыисны гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь, сійӧс мичмӧдісны херувим серпасъясӧн.

³⁶ Зарни пысӧдъяснас дӧрасӧ ӧшӧдӧм могысь акация пуысь вӧчисны нёль сюръя. Сюръяяссӧ эжисны зарниӧн да налы сывдӧмӧн вӧчисны нёль эзысь подув.

³⁷ Гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь серлӧдлӧмӧн кыисны вежа чом пыранінӧ ӧшӧдан дӧра.

³⁸ Дӧрасӧ пысӧдъяснас ӧшӧдӧм могысь вӧчисны вит сюръя. Сюръя йывъяссӧ да йитвежъяссӧ эжисны зарниӧн. Сюръяяслы вӧчисны вит ыргӧн подув.