Петӧм 35 - Коми Библия 2023

Шойччан лун йылысь тшӧктӧм

¹ Мӧисей чукӧртіс Израиль войтырӧс да шуис налы: «Господь со мый тшӧктіс.

² Квайт лун уджалӧй, а сизимӧд луныс мед лоӧ тіянлы вежа. Тайӧ луныс шойччан лун, сиӧма Господьлы. Тайӧ лунӧ коді кутас уджавны, сійӧс лоӧ виӧма.

³ Шойччан лунӧ оланінаныд энӧ пестӧй би. [Ме – Господь.]»

Вежа чом вӧчӧм вылӧ вайӧмторъяс

⁴ Мӧисей шуис Израиль войтырлы: «Господь со мый тшӧктіс.

⁵ Вайӧй Господьлы козинъяс. Быдӧн, коді кӧсйӧ сетны козин, мед ваяс Господьлы зарни, эзысь, ыргӧн,

⁶ гӧрдовлӧз, пемыдгӧрд да югыдгӧрд вурун шӧртъяс, [путшкӧм] вӧсни шабді, кӧза вурун,

⁷ гӧрд рӧма меж кучикъяс, лӧз рӧма кучикъяс, акация пу,

⁸ би дозйӧ кисьтан олив вый, ӧвтанторъяс, мыйысь вӧчӧны мавтыштан вый да тшынӧдчанторъяс,

⁹ оникс из да мукӧд дона изъяс, медым наӧн мичмӧдны ефод да морӧсводз.

¹⁰ Тіян пӧвстысь вӧчасьны кужысьяс мед локтасны да вӧчасны, мый тшӧктіс Господь:

¹¹ вежа чом, сылы дӧраяс да вылыс вевттьӧд, пысӧдъяс да брусъяс, йитан потшъяс, сюръяяс да подувъяс,

¹² Йитӧд куд, сійӧс новлӧдлан потшъяс, сылы вевт да ӧшӧдан дӧра, [йӧр тупкан дӧраяс да сэтчӧ сюръяяс, смарагда изъяс, фимиам да мавтыштан вый,]

¹³ пызан, сылы потшъяс, став коланаторсӧ да вежа нянь,

¹⁴ бикок да сылы коланаторсӧ, би дозъяс да сэтчӧ кисьтан вый,

¹⁵ тшынӧдчан висьпуктанін да сійӧс новлӧдлан потшъяс, мавтыштан вый, чӧскыд дука тшынӧдчанторъяс, вежа чом пыранінӧ ӧшӧдан дӧра,

¹⁶ сотан висьлы висьпуктанін, сылы ыргӧн радз, потшъяс да став коланаторсӧ, мыссян доз да сылы кок,

¹⁷ йӧр тупкан дӧраяс, сюръяяс да подувъяс, йӧр пыранінӧ ӧшӧдан дӧра,

¹⁸ вежа чом зэвтан майӧгъяс, йӧр гӧгӧр ӧшӧдан дӧралы майӧгъяс да гезъяс,

¹⁹ вежаинын кесъялан паськӧм – Аарон поплы вежа паськӧм да сылӧн пияныслы попӧн кесъялан паськӧм».

²⁰ Израиль войтыр муніс Мӧисей дінысь.

²¹ Сэсся бӧр локтісны да вайисны, мый сьӧлӧмсяньныс кӧсйисны сетны Господьлы, медым вӧчны вежа чом, лӧсьӧдны сэні кесъялӧм да вурны вежа паськӧм.

²² Локтісны айулов и аньяс, найӧ сьӧлӧмсяньныс вайисны исергаяс, чунькытшъяс, сикӧтшъяс да мукӧд зарни мичмӧдчантор. Быдӧн, коді кӧсйис, вайис Господьлы зарни.

²³ А кодлӧн вӧлі гӧрдовлӧз, пемыдгӧрд да югыдгӧрд вурун, вӧсни шабді, кӧза вурун, гӧрд рӧма меж кучикъяс да лӧз рӧма кучикъяс, вайис Господьлы.

²⁴ Господьлы козин пыдди вайисны тшӧтш эзысь да ыргӧн. Кодлӧн вӧлі акация пу, вайис сійӧс вежа чом вӧчӧм могысь.

²⁵ Кужысь аньяс печкисны да вайисны гӧрдовлӧз, пемыдгӧрд да югыдгӧрд вурун шӧртъяс да вӧсни шабді шӧрт.

²⁶ Аньяс, кодъяслӧн вӧлі кӧсйӧм да кужанлун, печкисны кӧза вурун.

²⁷ Войтырлӧн юралысьяс вайисны оникс из да мукӧд дона изъяс, медым наӧн мичмӧдны ефод да морӧсводз,

²⁸ а сідзжӧ ӧвтанторъяс да олив вый, медым кисьтны би дозъясӧ, вӧчны мавтыштан вый да тшынӧдчанторъяс.

²⁹ Израильса айулов да аньяс сьӧлӧмсяньныс вайисны ассьыныс козинъяссӧ, медым вӧчны ставсӧ, мый Господь тшӧктіс Мӧисейлы. Быдӧн ас кӧсйӧм сертиыс вайис Господьлы козинсӧ.

Вежа чом вӧчысьяс

³⁰ Мӧисей шуис Израиль пиянлы: «Тӧдӧй, мый Господь бӧрйис Иуда чужанкотырысь Хур Урилысь Безалел писӧ.

³¹ Господь тыртіс Безалелӧс Аслас Лолӧн, сетіс сылы мывкыдлун, вежӧр, тӧдӧмлун да кужӧмлун вӧчны быдпӧлӧс уджсӧ.

³² Сійӧ кужӧ вӧчасьны зарниысь, эзысьысь да ыргӧнысь,

³³ кужӧ вундавны да доргӧгӧравны из, вундасьны пуысь да вӧчны быдсикас серпаса уджсӧ.

³⁴ Господь сетіс сылы да Дан чужанкотырысь Ахисамаклӧн Оголиав пилы мукӧдӧс велӧдан сямлун.

³⁵ Господь сетіс налы мывкыдлун, медым найӧ [вежаин вӧчигӧн] кужисны вундасьны, серлӧдлӧмӧн кыны дӧра, серпасъясӧн мичмӧдны гӧрдовлӧз пемыдгӧрд, югыдгӧрд да вӧсни шабді шӧртъясысь кыӧм дӧраяс – вӧчны ставсӧ, мый кужӧны вӧчны киподтуя йӧз.