Петӧм 31 - Коми Библия 2023

Вежа чом да сэтчӧ став коланаторсӧ вӧчысьяс

¹ Господь шуис Мӧисейлы:

² «Тӧд, мый Ме бӧрйи Иуда чужанкотырысь Хур Урилысь Безалел писӧ.

³ Ме тырті Безалелӧс Аслам Лолӧн, сеті сылы мывкыдлун, вежӧр, тӧдӧмлун да кужӧмлун вӧчны быдпӧлӧс уджсӧ.

⁴ Сійӧ кужӧ вӧчасьны зарниысь, эзысьысь да ыргӧнысь. [Кужӧ кыны кельыдлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь.]

⁵ Кужӧ вундавны да доргӧгӧравны из, вундасьны пуысь да вӧчны быдсикас кипом уджсӧ.

⁶ Ме сеті сылы отсӧг вылӧ Дан чужанкотырысь Ахисамаклысь Оголиав писӧ. Став киподтуя йӧзлы Ме сеті мывкыдлун, медым найӧ кужисны вӧчны ставсӧ, мый Ме тшӧкті тэныд.

⁷ Найӧ мед вӧчасны вежа чом, Йитӧд куд да сылы вевт, вежа чомйӧ колана дозмук-кӧлуй,

⁸ пызан да сылы став коланаторсӧ, весалӧм зарниысь бикок да сылы став коланаторсӧ, тшынӧдчан висьпуктанін,

⁹ сотан висьлы висьпуктанін да сэтчӧ дозмук-кӧлуй, мыссян доз да сылы кок,

¹⁰ Аарон поплы вежа паськӧм да сылӧн пиянлы попӧн кесъялан паськӧм,

¹¹ мавтыштан вый да чӧскыд дука тшынӧдчантор, мый колӧ вежаинӧ. Ставсӧ мед вӧчасны сідзи, кыдзи Ме тшӧкті тэныд».

Шойччан лун йылысь

¹² Господь тшӧктіс Мӧисейлы:

¹³ «Висьтав Израиль пиянлы, мед видзасны Менсьым шойччан лунӧс. Шойччан лун лоӧ пасӧн Ме да тіян костын чужысьяссянь чужысьясӧдз. Та серти ті тӧдмаланныд, мый Ме – Господь, тіянӧс Вежӧдысь.

¹⁴ Энӧ торкӧй шойччан лунсӧ, ӧд тайӧ луныс тіянлы вежа. Коді пежалас шойччан лун, сійӧс колӧ вины. Коді тайӧ лунӧ кутас уджавны, сійӧс лоӧ бырӧдӧма аслас войтыр пӧвстысь.

¹⁵ Квайт лун уджалӧй, а сизимӧд луныс – шойччан лун, сиӧма Господьлы. Быдӧнӧс, коді кутас уджавны шойччан лунӧ, колӧ вины.

¹⁶ Израиль пиян мед видзасны шойччан лунсӧ чужысьяссянь чужысьясӧдз. Тайӧ нэмъяс кежлӧ кӧрталӧм йитӧд.

¹⁷ Шойччан лун лоӧ пасӧн Ме да Израиль костын нэмъяс кежлӧ. Ӧд квайт лун чӧж Господь вӧчис енэжсӧ да мусӧ, а сизимӧд луннас шойччис».

¹⁸ Синай керӧсын Мӧисейкӧд сёрнитӧм бӧрын Ен сетіс сылы йитӧдлысь кык изпӧв, кытчӧ Аслас киӧн гижис кывъяссӧ.