Петӧм 30 - Коми Библия 2023

Тшынӧдчан висьпуктанін

¹ «Вӧч акация пуысь висьпуктанін, медым сэні тшынӧдны чӧскыд ӧвтанторъяс.

² Висьпуктаніныс мед лоӧ нёль пельӧса, кузьтанас и пасьтанас – ӧти гырддза, а судтанас – кык гырддза. Сюръясыс висьпуктанінкӧд мед лоӧны ӧтторъяӧсь.

³ Висьпуктанінлысь вывсӧ, бокъяссӧ да сюръяссӧ эж весалӧм зарниӧн. Доргӧгӧрыс вӧч зарни дорыш.

⁴ Дорыш улас кыкнанладор бокас йит кык зарни кольча, медым кольчаясас позис сюйны потшъяс да новлӧдлыны висьпуктанінсӧ.

⁵ Потшъяссӧ вӧч акация пуысь да эж зарниӧн.

⁶ Висьпуктанінсӧ сувтӧд Вежаинӧ ӧшӧдан дӧра водзӧ, а дӧра саяс лоӧ Йитӧд куд. Йитӧд кудлӧн вевт вывсянь Ме кута шыасьны тэ дінӧ.

⁷ Висьпуктанін вылас Аарон мед тшынӧдас чӧскыд ӧвтанторъяс. Сійӧ мед тшынӧдчас сэні быд асыв, кор кутас локны видзӧдны би дозъяс бӧрся.

⁸ Мед тшынӧдчас тшӧтш быд рыт, кор кутас локны би ӧзтыны. Тадзи Господь водзын колӧ тшынӧдчыны чужысьяссянь чужысьясӧдз.

⁹ Висьпуктанін вылын мӧдторъяс энӧ тшынӧдӧй. Энӧ вайӧй сэні сотан вись, нянь вись либӧ вина вись.

¹⁰ Ӧтчыдысь вонас Аарон мед сӧстӧммӧдас висьпуктанінлысь сюръяссӧ. Мыжысь висьлӧн вирнас сійӧ ӧтчыдысь вонас мед сӧстӧммӧдас висьпуктанінсӧ. Тадзи колӧ вӧчны чужысьяссянь чужысьясӧдз. Тайӧ висьпуктаніныс лоӧ вежасьыс-вежа, сійӧ – Господьлӧн».

Израиль пиянлӧн ас понданыс вештысян дон

¹¹ Господь шуис Мӧисейлы:

¹² «Израиль пиянлысь лыдсӧ арталігад мед быдӧн ас пондаыс вештысяс Господьлы. Сэки найӧс оз ло бырӧдӧма арталӧм вӧсна.

¹³ Быдӧн, кодӧс лоӧ арталӧма войтырӧс гижалігӧн, мед вайӧ сикель джын вежаинса сикель серти. Ӧти сикельын – кызь гера. Сикель джынйыс – Господьлы вайӧмтор.

¹⁴ Быдӧн, кодӧс лоӧ арталӧма войтырӧс гижалігӧн – кызь арӧса да ыджыдджык арлыда айулов – мед ас пондаыс вайӧ тайӧ козинсӧ Господьлы.

¹⁵ Ас понданыс вештысигӧн озыръяс мед оз вайны Господьлы сикель джынйысь унджык, и гӧльяс мед оз вайны сикель джынйысь этшаджык.

¹⁶ Босьт Израиль пиянлысь ас понданыс вештысян эзысьсӧ да вӧдитчы сыӧн вежа чомйын кесъялӧм могысь. Израиль пиянлы тайӧ лоӧ Господь водзын казьтыланпасӧн, мый найӧс ньӧбӧма».

Ыргӧн мыссян доз

¹⁷ Господь шуис Мӧисейлы:

¹⁸ «Вӧч ыргӧнысь мыссян доз да сылысь коксӧ. Пукты сійӧс вежа чом да висьпуктанін костӧ, кисьт сэтчӧ ва.

¹⁹ Аарон да сылӧн пияныс мед мыськасны сэні ки-кокнысӧ.

²⁰ Вежа чомйӧ пыртӧдз найӧ мед мыссясны, а оз кӧ мыссьыны, куласны. Господьлы вись вайигӧн, кор локтасны висьпуктанін дорӧ,

²¹ найӧ мед мыськасны ки-кокнысӧ, а оз кӧ мыськыны, куласны. Тайӧ тшӧктӧмыс лоӧ Ааронлы да сысянь чужысьяслы пыр кежлӧ».

Мавтыштан вый да тшынӧдчанторъяс

²² Господь шуис Мӧисейлы:

²³ «Босьт медчӧскыд ӧвтанторъяс: витсё сикель кизьӧр смирна, сыысь кык пӧв этшаджык чӧскыда ӧвтысь корица, тшӧтш кыксё ветымын сикель чӧскыд дука турун,

²⁴ витсё сикель кассия, – ставсӧ вежаинса сикель серти – да гин мында олив вый.

²⁵ Мавтас вӧчысь моз ставсӧ тайӧс сорлалӧмӧн дасьты мавтыштан вежа вый.

²⁶ Мавтышт тайӧ выйнас вежа чом, Йитӧд куд,

²⁷ пызан да сылы став коланаторсӧ, бикок да сылы став коланаторсӧ, тшынӧдчан висьпуктанін,

²⁸ сотан висьлы висьпуктанін да сэтчӧ дозмук-кӧлуй, мыссян доз да сылысь коксӧ.

²⁹ Вежӧд найӧс, и найӧ лоӧны вежасьыс-вежаӧсь. Ставыс, мый инмас наӧ, лоӧ вежа.

³⁰ Ааронӧс да сылысь пиянсӧ тшӧтш мавтышт да вежӧд, медым найӧ попъясӧн кесъяласны Меным.

³¹ Висьтав Израиль пиянлы, мый чужысьяссянь чужысьясӧдз тайӧ лоӧ Менам мавтыштан вежа вый.

³² Тайӧ выйнас оз позь мавтыштны бокыса йӧзӧс. Татшӧм выйсӧ аслыныд энӧ вӧчӧй, ӧд сійӧ вежа. Тіянлы сійӧ мед лоӧ вежа вый.

³³ Коді вӧчас татшӧм выйсӧ либӧ мавтыштас бокысаӧс, сійӧс лоӧ бырӧдӧма аслас войтыр пӧвстысь».

³⁴ Господь тшӧктіс Мӧисейлы: «Босьт ӧтмындаӧн чӧскыд ӧвтанторъяс – стакти, оних да халван, тшӧтш ладан сир.

³⁵ Мавтас вӧчысь моз вӧч наысь чӧскыд дука тшынӧдчантор. Вӧч солалӧмӧн, сӧстӧмӧс да вежаӧс.

³⁶ Торйӧд сэтысь мыйтакӧ, нирт сійӧс да пукты вежа чомйӧ Йитӧд куд водзӧ. Вежа чомсянь Ме кута шыасьны тэ дінӧ. Тайӧ тшынӧдчанторйыс лоӧ тіянлы вежасьыс-вежа.

³⁷ Татшӧм тшынӧдчанторсӧ энӧ вӧчӧй аслыныд. Сійӧ мед лоӧ тіянлы вежа, ӧд торйӧдӧма Господьлы.

³⁸ Коді вӧчас аслыс татшӧм тшынӧдчанторсӧ, сійӧс лоӧ бырӧдӧма аслас войтыр пӧвстысь».