Петӧм 29 - Коми Библия 2023

Ааронӧс да сылысь пиянсӧ попъясӧ пуктӧм

¹ «Ааронӧс да сылысь пиянсӧ вежӧд, медым найӧ кесъялісны Меным попъясӧн. Бӧрйы ӧшкӧс да дзоньвидза кык межӧс.

² Босьт медбур шобді пызьысь пӧжасъяс: шомтӧм нянь, выйӧн гудралӧм шомтӧм нянь да выйӧн мавтӧм шомтӧм сӧчӧн.

³ Пукты ставсӧ ӧти кудйӧ да вай Ме водзӧ. Нӧшта вайӧд ӧшкӧс да кык межӧс.

⁴ Ааронӧс пияныскӧд вайӧд вежа чом пыранін водзӧ да мыссьӧд найӧс ваӧн.

⁵ Босьт [вежа] паськӧм, дӧрӧмӧд Ааронӧс да пасьтӧд ризасӧ, ефодсӧ да морӧсводзсӧ. Ефод вывтіыс вӧньӧд.

⁶ Юр вылас пукты юркӧртӧд. Юркӧртӧдас пысав вежа мичмӧдчанторсӧ.

⁷ Сэсся босьт мавтыштан вый да кисьт Ааронлы юр вылас. Тадзи тэ мавтыштан сійӧс.

⁸ Вайӧд тшӧтш Ааронлысь пиянсӧ да дӧрӧмӧд найӧс.

⁹ Сэсся вӧньӧд Ааронӧс да сылысь пиянсӧ, юр выланыс пукты юрвевттьӧд. Аарон да сылӧн пияныс пыр кежлӧ лоӧны попъясӧн. Пукты найӧс кесъявны.

¹⁰ Вайӧд ӧшкӧс вежа чом водзӧ. Аарон да сылӧн пияныс мед пуктыласны кинысӧ ӧшлы юр вылас [Господь водзын вежа чом пыранін дорын].

¹¹ Ӧшсӧ начкы Господь водзын вежа чом пыранін дорын.

¹² Чуньтӧ кӧтӧд ӧш вирнас да мавтышт висьпуктанінлысь сюръяссӧ, а коляс вирсӧ койышт висьпуктанін улӧ.

¹³ Сэсся босьт ӧшпилысь пытшкӧс госсӧ, мус вывсьыс госа юкӧнсӧ, кыкнан вӧрксӧ госнас да сот висьпуктанін вылын.

¹⁴ А ӧшлысь яйсӧ, кучиксӧ да сювсӧ сот чомъяс сайын. Тайӧ лоӧ мыжысь вись.

¹⁵ Сэсся босьт межӧс, и Аарон пияныскӧд мед пуктыласны кинысӧ межлы юр вылас.

¹⁶ Начкы межсӧ да рез сылӧн вирнас висьпуктанінсӧ быд боксянь.

¹⁷ Сэсся керав межсӧ, мыськав сылысь пытшкӧссӧ да кокъяссӧ, пукты найӧс яйторъясыс да юрыс вылӧ.

¹⁸ Став межсӧ сот висьпуктанін вылын. Тайӧ лоӧ Господьлы сотан вись, Господьлы чӧскыд ӧвтантор.

¹⁹ Сэсся босьт мӧд межӧс, и Аарон пияныскӧд мед пуктыласны кинысӧ межлы юр вылас.

²⁰ Начкы межсӧ, босьт сылысь вирсӧ да мавтышт Ааронлысь да пияныслысь веськыд пельтугнысӧ, веськыд кисьыс певнысӧ да веськыд коксьыс ыджыд чуньнысӧ. Сэсся вирнас рез висьпуктанінсӧ быд боксянь.

²¹ Босьт висьпуктанін вылысь вир, босьт мавтыштан вый да рез наӧн Ааронӧс, сылысь пиянсӧ да налысь паськӧмнысӧ. Тадзи Аарон, сылӧн пияныс да налӧн паськӧмныс лоӧны вежаӧсь.

²² Босьт межлысь бӧждор госсӧ, пытшкӧс госсӧ, мус вывсьыс госа юкӧнсӧ, кыкнан вӧрксӧ госнас да веськыдладор задвыв яйсӧ, ӧд тайӧ межыс – попӧ сувтӧдан вись.

²³ Господь водзӧ пуктӧм шомтӧм нянь тыра кудйысь босьт ӧти гӧгрӧс нянь, выйӧн гудралӧм нянь да сӧчӧн.

²⁴ Сет ставсӧ тайӧс Ааронлы да сылӧн пияныслы кианыс, вай ставсӧ Господь водзын пыркӧдан вись пыдди.

²⁵ Сэсся босьт тайӧс налӧн киысь да сот висьпуктанін вылын сотан виськӧд. Тайӧ Господьлы чӧскыд ӧвтантор, Господьлы сотан вись.

²⁶ Босьт попӧ сувтӧдан вись пыдди ваян межлысь морӧсвыв яйсӧ да вай сійӧс Господь водзын пыркӧдан вись пыдди. Ааронлӧн тайӧ пайыс лоӧ тэныд.

²⁷ Вежӧд межыслысь морӧсвыв яйсӧ, мый колӧ вайны пыркӧдан вись пыдди, да задвыв яйсӧ, мый колӧ вайны кыпӧдлан вись пыдди. Межыслӧн тайӧ юкӧнъясыс лоӧны Ааронлы да сылӧн пиянлы.

²⁸ Тайӧ лоӧ Израиль пиянсянь пыр кежлӧ Ааронлы да сылӧн пияныслы торйӧдан юкӧн. Бурасян вись вайигӧн Израиль пиян мед торйӧдасны тайӧ юкӧнсӧ козин пыдди Господьлы.

²⁹ Ааронлӧн вежа паськӧмыс вуджас сылӧн пияныслы. Паськӧмсӧ мед пасьталас сійӧ, кодӧс мавтыштасны кесъявны аркирейӧн.

³⁰ Сійӧ мед новлӧ паськӧмсӧ сизим лун чӧж, кор Аарон бӧрся пондас кесъявны [ыджыд] попӧн вежа чомйын.

³¹ Попӧ сувтӧдан вись пыдди вайӧм межлысь яйсӧ пу вежаинын.

³² Аарон да пияныс мед сёясны межыслысь яйсӧ да кудйысь няньсӧ вежа чом пыранін дорын.

³³ Налы колӧ сёйны тайӧ висьсӧ, ӧд сійӧс вайӧма налысь мыжсӧ вештӧм могысь. Тадзи найӧс лоӧ вежӧдӧма, и найӧ вермасны кесъявны попъясӧн. Тайӧ – вежатор, бокысалы сійӧс сёйнысӧ оз позь.

³⁴ Попӧ сувтӧдан вись пыдди вайӧм яйсӧ либӧ няньсӧ асылӧдзыс кӧ ставнас оз сёйны, сэки коляссӧ сот биын. Тайӧ – вежатор, мӧд луннас некодлы сійӧс сёйнысӧ оз позь.

³⁵ Ааронлы да сылӧн пиянлы вӧч ставсӧ сідзи, кыдзи Ме тшӧкті тэныд. Найӧс попӧ сувтӧдан лунъясыс мед мунасны сизим лун чӧж.

³⁶ Мыж вештӧм могысь быд лун начкы ӧшкӧс. Вай сійӧс висьпуктанін вылын мыжысь вись пыдди. Тадзи сӧстӧммӧдан висьпуктанінсӧ. И вежӧдӧм могысь мавтышт сійӧс.

³⁷ Сизим лун чӧж сӧстӧммӧд висьпуктанінсӧ да вежӧд сійӧс, и висьпуктаніныс лоӧ вежасьыс-вежа. Ставыс, мый инмас висьпуктанінӧ, лоӧ вежа».

Быдлунся вись

³⁸ «Быд лун вай висьпуктанін вылын [дзоньвидза] арӧса кык баляӧс вись пыдди.

³⁹ Ӧти балясӧ вай асывнас, мӧдсӧ – рытнас.

⁴⁰ Ӧти баляыскӧд вай пычкӧм олив выйӧн гудралӧм шобді пызь. Пызьыс мед вӧлі ефалӧн дасӧд юкӧныс, а выйыс мед вӧлі гинлӧн нёльӧд пайыс. Кисьтан вись пыдди вай вина – гинлысь нёльӧд пайсӧ.

⁴¹ Мӧд балясӧ вай рытнас нянь виськӧд да вина виськӧд асъя мозыс жӧ. Вай сійӧс Господьлы чӧскыда ӧвтан вись пыдди.

⁴² Тайӧ сотан висьсӧ чужысьяссянь чужысьясӧдз пыр колӧ вайны Господь водзӧ вежа чом пыранін дорын. Вежа чомсянь Ме, Господь, кута шыасьны тіян дінӧ, кута сёрнитны тэкӧд.

⁴³ Вежа чомсянь Ме кута шыасьны Израиль пиян дінӧ. Менам дзирдлунысь тайӧ чомйыс лоӧ вежа.

⁴⁴ Ме вежӧда вежа чомсӧ да висьпуктанінсӧ, вежӧда тшӧтш Ааронӧс да сылысь пиянсӧ, медым найӧ попъясӧн кесъяласны Меным.

⁴⁵ Ме кута овны Израиль пиян пӧвстын да лоа налӧн Енмӧн.

⁴⁶ Сэки найӧ тӧдмаласны, мый Ме – Господь, налӧн Ен, и Ме петкӧді найӧс Египет муысь, медым овны на пӧвстын. Ме – Господь, налӧн Енмыс».