Петӧм 28 - Коми Библия 2023

Попъяслы кесъялан паськӧм

¹ «Израиль пиян пӧвстысь кор ас дінад Аарон воктӧ пияныскӧд. Аарон да сылӧн Надав, Авиуд, Элазар да Итамар пияныс мед кесъяласны Меным попъясӧн.

² Аарон вокыдлы лӧсьӧд вежа паськӧм сійӧс нимӧдӧм-мичмӧдӧм

³ да вежӧдӧм могысь, ӧд сылы колӧ кесъявны Меным попӧн. Вӧчасьны кужысьяслы, кодъяслы Ме сеті мывкыдлун [да сюсьлун], тшӧкты вурны Ааронлы [вежа] паськӧм.

⁴ Мед вӧчасны морӧсводз, ефод, риза, серлӧдлӧм кузь дӧрӧм, юркӧртӧд да вӧнь. Мед вӧчасны Аарон вокыдлы да сылӧн пиянлы тайӧ вежа паськӧмсӧ, медым найӧ попъясӧн кесъяласны Меным.

⁵ Вежа паськӧм вурӧм могысь мед босьтасны зарни, гӧрдовлӧз, пемыдгӧрд да югыдгӧрд вурун шӧртъяс да вӧсни шабді шӧрт.

⁶ Зарни сунисысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь мед серлӧдлӧмӧн кыасны ефод.

⁷ Ефодӧ кыкнан пельпомас мед вӧчасны кӧрталана кык ластавич.

⁸ Ачыс ефодыс да сы дінӧ вӧньыс кыанногнас мед вӧліны ӧткодьӧсь. Вӧньсӧ мед кыасны ефодӧс моз сійӧ жӧ [весалӧм] зарни сунисысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь.

⁹ Босьт кык оникс из да вундалӧмӧн гиж на вылӧ Израиль пиянлысь нимъяссӧ

¹⁰ медыджыдсяньыс медічӧтӧдзыс. Квайтӧс гиж ӧтар из вылас, а мӧд квайтсӧ – мӧдар из вылас.

¹¹ Из вундалысь моз гиж нимъяссӧ изъяс вылас. Сэсся доргӧгӧрав изъяссӧ зарниӧн

¹² да йит ефодлӧн ластавичьяс вылӧ. Изъясыс лоасны казьтыланпасӧн. Аарон кутас новлӧдлыны Израиль пиянлысь нимъяссӧ пельпом вылас Господь водзын.

¹³ [Весалӧм] зарниысь вӧч изъяслы кык дорыш.

¹⁴ Нӧшта весалӧм зарниысь вӧч кык вӧсни чеп, гартышт найӧс кӧв моз да йит кык дорыш бердас [ластавич водзладорсяньыс].

¹⁵ Вӧч веськыда мыждӧмсӧ петкӧдлан морӧсводз. Серлӧдлӧмӧн кы сійӧс ефодӧс моз зарниысь, гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь.

¹⁶ Сійӧ мед вӧлі кыкпӧвсталӧм дӧраысь, нёль пельӧса, весьт кузьта да весьт пасьта.

¹⁷ Сы вылӧ нёль визьӧн йитлы дона изъяс. Медводдза визяс пукты рубин, топаз да изумруд,

¹⁸ мӧд визяс – карбункул, сапфир да алмаз,

¹⁹ коймӧд визяс – яхонт, агат да аметист,

²⁰ нёльӧд визяс – хризолит, оникс да яшма изъяс. Став изсӧ доргӧгӧрав зарниӧн.

²¹ Израиль пиянлӧн дас кык ним серти изйыс мед лоӧ дас кык. Быд из вылӧ колӧ вундалӧмӧн гижны ӧти чужанкотырлысь нимсӧ [Израиль пиянлӧн чужан во сертиыс].

²² Весалӧм зарниысь кӧв моз гартлӧмӧн вӧч морӧсводзлы чепъяс.

²³ Вӧч кык зарни кольча да пысав морӧсводзлӧн вылыс пельӧсъясас.

²⁴ Быд кольчаӧ сюй зарниысь вӧчӧм чепсӧ,

²⁵ а чеп помъяссӧ йит водзладорсянь ефод ластавичьяс вылӧ пуктӧм кыкнан зарни дорышӧ.

²⁶ Нӧшта вӧч кык зарни кольча да йит найӧс морӧсводз улі пельӧсъясас гугладорсяньыс, кӧні морӧсводз инмӧ ефодӧ.

²⁷ Сідзжӧ вӧч кык зарни кольча да йит найӧс водзладорсянь ефодлӧн кыкнан ластавич бердас, улісяньыс вурыс дінас, вӧнь весьттіыс.

²⁸ Морӧсводз кольчаяссӧ йит ефод кольчаяскӧд гӧрдовлӧз вурун шӧртӧн, медым морӧсводзыс вӧлі вӧньсьыс вылынджык да вӧлі бура йитӧма ефод бердӧ.

²⁹ Вежаинӧ пыригӧн Аарон сьӧлӧм бердас Господьлы казьтыланпас пыдди мед новлӧдлас Израиль пиянлысь нимъяссӧ веськыда мыждӧм петкӧдлан морӧсводзас. [Кыӧм чепъяссӧ йит морӧсводз кыкнан помас. Зарни дорышъяссӧ пукты кыкнан ластавич вылӧ водзладорсяньыс.]

³⁰ Веськыда мыждӧмсӧ петкӧдлан морӧсводзӧ сюй урим да туммим. Тадзи найӧ лоасны Ааронлӧн сьӧлӧм бердас, кор сійӧ [вежаинӧ пыригӧн] локтас Господь водзӧ. Господь водзӧ локтігӧн моросводзсӧ Аарон мед пыр кутас новлӧдлыны сьӧлӧм бердас. Морӧсводзыс петкӧдлӧ Израиль пиянлы веськыда мыждӧмсӧ.

³¹ Гӧрдовлӧз вурунысь кы риза, медым новлыны сійӧс ефодкӧд.

³² Ризасӧ мед пасьталасны юр вывсянь. Сылысь сьылігӧгӧрсӧ вур тышкайӧз паськӧм моз, медым оз резьды.

³³ Риза бӧждорӧ вӧч гӧрдовлӧз, пемыдгӧрд да югыдгӧрд вурунысь [да путшкӧм шабдіысь] гранат кодь сяръяс, [татшӧм жӧ сяръяс да] на костӧ тіньганъяс вӧч зарниысь бӧждор гӧгӧрыс.

³⁴ Ризалӧн бӧждор гӧгӧрыс сьӧрсьӧн-бӧрсьӧн ӧшӧд зарни тіньган, сэсся сяр и бара зарни тіньган.

³⁵ Тайӧ ризасӧ Аарон мед пасьталас кесъялігас, медым Господь водзӧ вежаинӧ пыригӧн да вежаинысь петігӧн кылас тіньган шы, и Аарон оз кув.

³⁶ Весалӧм зарниысь вӧч пӧвтор да вундалӧмӧн гиж сэтчӧ ”вежӧдӧма-торйӧдӧма Господьлы”.

³⁷ Кӧртав сійӧс гӧрдовлӧз кӧвйӧн юркӧртӧдас,

³⁸ медым сійӧ лоӧ Ааронлӧн плеш вылас. Тадзи Аарон босьтӧ ас вылас Израиль пиянлысь мыж, найӧ кӧ вежа сетӧмторъяссӧ вайигӧн кутшӧмкӧ ногӧн торкӧны Индӧдсӧ. Тайӧ зарни пӧвторйыс мед пыр лоас Ааронлӧн плеш вылас, медым Израиль пиянлӧн сетӧмторъясыс вӧліны шогманаӧсь Господьлы.

³⁹ Дӧрӧмсӧ да юркӧртӧдсӧ кы вӧсни шабді шӧртысь, а вӧньсӧ кы серлӧдлӧмӧн.

⁴⁰ Аарон пиянӧс нимӧдӧм да мичмӧдӧм могысь кы налы дӧрӧмъяс, вӧньяс да юрвевттьӧдъяс.

⁴¹ Пасьтӧд Аарон воктӧ да сылысь пиянсӧ татшӧм паськӧмнас, мавтышт найӧс вежа выйӧн, пукты попъясӧ да вежӧд найӧс, сэки найӧ вермасны попъясӧн кесъявны Меным.

⁴² Шабді дӧраысь вур налы улыс гачьяс, медым налӧн куш яйыс коссяньыс пидзӧсӧдзыс вӧлі тупкӧма.

⁴³ Аарон да сылӧн пияныс мед новласны тайӧ паськӧмсӧ вежа чомйӧ пыригӧн либӧ висьпуктанін дорӧ матыстчигӧн, медым вежаинын кесъялігӧн найӧ эз кыскыны ас выланыс мыж да эз кувны. Ааронлы да сысянь чужысьяслы тайӧ тшӧктӧмыс лоӧ пыр кежлӧ».