Петӧм 27 - Коми Библия 2023

Висьпуктанін

¹ «Вӧч акация пуысь висьпуктанін. Сійӧ мед вӧлі нёль пельӧса, кузьтанас и пасьтанас – вит гырддза, судтанас – куим гырддза.

² Нёльнан пельӧсас вӧч сюръяс. Висьпуктанінкӧд найӧ мед лоӧны ӧтторъяӧсь. Эж ставсӧ ыргӧнӧн.

³ Вӧч пӧим воръяс, пӧим куралан зыръяс, вир резан тасьтіяс, яй бергӧдлан вилаяс, ӧгыр пӧртъяс. Ставсӧ тайӧс вӧч ыргӧнысь.

⁴ Висьпуктанін пытшкас вӧч ыргӧн радз. Радз нёльнан пельӧсас вӧч ыргӧн кольча.

⁵ Висьпуктанін доргӧгӧрас йит радзсӧ улісяньыс. Раддзыс мед лоӧ висьпуктанін джынйӧдзыс.

⁶ Висьпуктанінлы вӧч акация пуысь потшъяс да эж найӧс ыргӧнӧн.

⁷ Тайӧ потшъяссӧ колӧ сюйны висьпуктанінлӧн кыкнанладор кольчаясас, медым позьӧ новлӧдлыны сійӧс.

⁸ Асьсӧ висьпуктанінсӧ вӧч пӧвйысь, сылӧн пытшкӧсыс мед вӧлі куш. Кыдзи петкӧдлӧма вӧлі тэныд керӧс вылын, сідзи и вӧчӧй сійӧс».

Вежа йӧр

⁹ «Вежа чом гӧгӧрыс вӧч йӧр. Путшкӧм шабді шӧртысь кы сё гырддза кузьта дӧра, медым ӧшӧдны сійӧс йӧр пӧлӧн лунвывладорас.

¹⁰ Дӧрасӧ ӧшӧдӧм могысь вӧч кызь сюръя. Сюръяяслы вӧч кызь ыргӧн подув, эзысь пысӧдъяс да йитвежъяс.

¹¹ Йӧр войвывладорас ӧшӧдӧм могысь кы сё гырддза кузьта дӧра, вӧч кызь сюръя да налы кызь ыргӧн подув. Сюръя пысӧдъяссӧ да йитвежъяссӧ вӧч эзысьысь. [Подувъяссӧ эж эзысьӧн.]

¹² Йӧр рытывладорас ӧшӧдӧм могысь кы ветымын гырддза кузьта дӧра, вӧч дас сюръя да налы дас подув.

¹³ Йӧр асывладор пасьтаыс мед лоӧ ветымын гырддза. [Дӧраяслы колӧ дас сюръя и дас подув.]

¹⁴ Пыранін ӧтарладорас ӧшӧдӧм могысь кы дас вит гырддза кузьта дӧра, вӧч куим сюръя да сюръяяслы куим подув.

¹⁵ Тадзи жӧ пыранін мӧдарладорас ӧшӧдӧм могысь кы дас вит гырддза кузьта дӧра, вӧч куим сюръя да сюръяяслы куим подув.

¹⁶ Серлӧдлӧмӧн кы гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь кызь гырддза кузьта дӧра. Ӧшӧд сійӧс йӧр пыранінӧ. Дӧрасӧ ӧшӧдӧм могысь вӧч нёль сюръя да налы нёль подув.

¹⁷ Йӧр сюръяяслы йитвежъяссӧ да пысӧдъяссӧ вӧч эзысьысь, а подувъяссӧ вӧч ыргӧнысь.

¹⁸ Йӧрыс кузьтанас мед вӧлі сё гырддза, пасьтанас – ветымын гырддза. Путшкӧм шабді шӧртысь кыӧм дӧраяс судтанас мед лоӧны вит гырддза. Сюръяяслы подувъясыс мед лоӧны ыргӧнысь.

¹⁹ Став дозмук-кӧлуйсӧ, мый колӧ вежа чомйын кесъялӧм могысь, вежа чом майӧгъяссӧ да йӧр дӧраяс зэвтан майӧгъяссӧ вӧч ыргӧнысь».

Би дозъяс

²⁰ «Тшӧкты Израиль пиянлы вайны тэныд оливысь пычкӧм сӧстӧм вый, медым би дозъясысь выйыс эз бырлы.

²¹ Ааронлы да сылӧн пияныслы рытсяньыс асылӧдзыс колӧ видзӧдны би дозъяс бӧрся. Биыс мед ӧзъялас Господь водзын вежа чомйын, ӧшӧдӧм дӧра водзын, мый сайын сулалӧ Йитӧд куд. Тайӧ тшӧктӧмыс лоӧ Израиль пиянлы нэмъяс кежлӧ чужысьяссянь чужысьясӧдз».