Петӧм 26 - Коми Библия 2023

Вежа чом

¹ «Вежа чомсӧ вӧч дас дӧраысь. Кы найӧс путшкӧм шабді шӧртысь да гӧрдовлӧз, пемыдгӧрд да югыдгӧрд вурун шӧртъясысь. Дӧраяссӧ мичмӧд херувим серпасъясӧн.

² Кузьтанас дӧраыс мед вӧлі кызь кӧкъямыс гырддза, а пасьтанас – нёль гырддза. Даснан дӧраыс мед вӧліны ӧтыдждаӧсь.

³ Вит дӧрасӧ йит ӧта-мӧдыскӧд, мӧд витсӧ тшӧтш йит ӧта-мӧдыскӧд.

⁴ Тайӧ кык ыджыд дӧрасӧ йитӧм могысь вӧч гӧрдовлӧз рӧма пекляяс.

⁵ Кыкнан йитан дӧра помас вӧч ӧта-мӧдныслы воча ветымын пекля.

⁶ Вӧч ветымын зарни пысӧд да на отсӧгӧн йитлы дӧраяссӧ, мед вежа чомйыс лоӧ ӧтторъя.

⁷ Кы кӧза вурунысь дас ӧти дӧра, медым вӧчны вежа чом вевттьӧд.

⁸ Кузьтанас дӧраыс мед вӧлі комын гырддза, а пасьтанас – нёль гырддза. Дас ӧтикнан дӧраыс мед вӧліны ӧтыдждаӧсь.

⁹ Вит дӧрасӧ йит ӧта-мӧдыскӧд, и квайт дӧрасӧ йит ӧта-мӧдыскӧд. Квайтӧд дӧрасӧ кыкпӧвстав. Сійӧ кутас ӧшавны вежа чом пыранінын.

¹⁰ Вӧч ветымын пекля кык ыджыд дӧра помъясас, медым йитны найӧс.

¹¹ Вӧч ветымын ыргӧн пысӧд да сюй найӧс пекляясас, мед вежа чом вевттьӧдыс лоӧ ӧтторъя.

¹² Вежа чом мышладорас мед кутас ӧшавны вевттьӧдлӧн бӧръя юкӧн джынйыс.

¹³ Дӧраяслӧн кузьтаног вевттьӧдыс мед ӧшалас улысса дӧраысь гырддзаӧн кузьджыка вежа чомлӧн ӧтар-мӧдар бокас.

¹⁴ Нӧшта вӧч вежа чомлы кык вевттьӧд: ӧтисӧ гӧрд рӧма меж кучикысь, а сы вылӧ мӧдсӧ лӧз рӧма кучикысь.

¹⁵ Вежа чом сувтӧдӧм могысь вӧч акация пуысь брусъяс.

¹⁶ Брускыс кузьтанас мед вӧлі дас гырддза, пасьтанас – гырддза да джын.

¹⁷ Быд брус помӧ лӧсав ӧта-мӧдыслы орчча кык тув. Татшӧмӧн вӧч вежа чомлысь став бруссӧ.

¹⁸ Вежа чомлысь лунвывладор стенсӧ сувтӧдӧм могысь вӧч кызь брус.

¹⁹ Брусъяслы вӧч нелямын эзысь подув: быд бруслы кык подув, быд тувлы ӧти подув.

²⁰ Вежа чомлысь войвывладор стенсӧ сувтӧдӧм могысь тшӧтш вӧч кызь брус

²¹ да налы нелямын эзысь подув: быд бруслы кык подув [быд тувлы ӧти подув].

²² Вежа чомлысь рытыввывладор стенсӧ сувтӧдӧм могысь вӧч квайт брус.

²³ Вежа чом рытыввывладор кыкнан пельӧсас вӧч кык брус.

²⁴ Йит брусъяссӧ увсяньыс да вывсяньыс. Вывсяньыс йит кольча бердӧ. Тадзи вӧч кыкнан пельӧсас.

²⁵ Ставнас лоӧ кӧкъямыс брус да налы дас квайт эзысь подув: быд бруслы кык подув [быд тувлы ӧти подув].

²⁶ Акация пуысь вӧч йитан потшъяс: витӧс вежа чомлӧн ӧтарбокса брусъяслы,

²⁷ витӧс вежа чомлӧн мӧдарбокса брусъяслы, витӧс вежа чом мышладор брусъяслы рытыввывсяньыс.

²⁸ Медшӧр йитан потшкыс мед мунас вежа чомлӧн ӧтар помсянь мӧдар помӧдзыс да йитас брусъяссӧ шӧрӧдыс.

²⁹ Брусъяссӧ да найӧс йитан потшъяссӧ эж зарниӧн, потш сюян кольчаяссӧ вӧч зарниысь.

³⁰ Вежа чомсӧ сувтӧд, кыдзи петкӧдлӧма вӧлі тэныд керӧс вылын.

³¹ Ӧшӧдан дӧрасӧ кы гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь, мичмӧд сійӧс херувим серпасъясӧн.

³² Ӧшӧд дӧрасӧ зарни пысӧдъяснас акация пуысь вӧчӧм нёль сюръя вылӧ. Эж сюръяяссӧ зарниӧн да сывдӧмӧн вӧч налы нёль эзысь подув.

³³ Дӧрасӧ ӧшӧдӧм бӧрын Йитӧд кудсӧ пырт дӧра саяс. Тайӧ ӧшӧдӧм дӧраыс кутас торйӧдны Вежаинсӧ Вежасьыс-вежаинысь.

³⁴ Вежасьыс-вежаинас пукты Йитӧд куд вылӧ вевт.

³⁵ Пызансӧ сувтӧд ӧшӧдӧм дӧра водзӧ, а сылы воча – бикок. Бикокыс мед сулалас вежа чомлӧн лунвывладорас, а пызаныс – войвывладорас.

³⁶ Серлӧдлӧмӧн кы гӧрдовлӧз, пемыдгӧрд да югыдгӧрд вурун шӧртъясысь да путшкӧм шабді шӧртысь дӧра. Ӧшӧд сійӧс вежа чом пыранінӧ.

³⁷ Дӧрасӧ ӧшӧдӧм могысь вӧч акация пуысь вит сюръя да эж найӧс зарниӧн. Сюръяяслы кисьт вит ыргӧн подув. Дӧра пысӧдъяссӧ вӧч зарниысь».