Петӧм 24 - Коми Библия 2023

Йитӧд кӧрталӧм

¹ Господь шуис Мӧисейлы: «Кай Ме дінӧ. Тэкӧд тшӧтш мед локтасны Аарон, Надав, Авиуд да Израильлӧн сизимдаснан юрнуӧдысьыс. Ылысянь копыртчылӧй.

² Тэ, Мӧисей, ӧтнад матыстчы Ме дінӧ. Мукӧдыс мед оз матыстчыны, и войтырыс мед керӧс вылӧ оз кай».

³ Мӧисей локтіс войтырыс дінӧ да висьталіс налы Господьлысь кывъяссӧ да тшӧктӧмъяссӧ. Войтырыс ӧти вомӧн шуис: «Ми вӧчам ставсӧ, мый тшӧктіс Господь. [Кутам кывзысьны.]»

⁴ Мӧисей гижис Господьлысь кывъяссӧ. Водз асывнас чеччӧм бӧрас сійӧ вӧчис керӧс горулӧ висьпуктанін. Висьпуктанінкӧд орччӧн сувтӧдіс Израиль чужанкотыръяслӧн лыд серти дас кык вежа из.

⁵ Израильса том войтырӧс мӧдӧдіс вайны сотан висьяс да начкыны ӧшъясӧс, медым бурасян вись вайны Господьлы.

⁶ Ӧшъяслысь вирсӧ Мӧисей юкис кык пельӧ: ӧти джынсӧ кисьталіс тасьтіясӧ, а мӧд джыннас резіс висьпуктанін.

⁷ Сэсся босьтіс Йитӧд небӧг да лыддис сійӧс войтырыслы. Найӧ шуисны: «Ми вӧчам ставсӧ, мый тшӧктіс Господь. Кутам кывзысьны».

⁸ Мӧисей босьтіс чукӧртӧм вирсӧ да резіс сыӧн войтырсӧ. Сійӧ шуис: «Тайӧ вирыс – йитӧдлӧн вир. Господь кӧрталіс тіянкӧд йитӧд. Тайӧ йитӧдыс подуласьӧ Сылӧн тшӧктӧмъясыс вылӧ».

⁹ Сэсся Мӧисей да Аарон, Надав да Авиуд Израильлӧн сизимдас юрнуӧдыськӧд кайисны керӧсӧ.

¹⁰ Сэні найӧ аддзисны Израильлысь Енсӧ. Сылӧн кок улыс вӧлі сапфир кодь, дзик енэжыс кодь югыд.

¹¹ Израильлӧн юрнуӧдысьяс аддзылісны Енмӧс, но Сійӧ эз лэпты кисӧ на вылӧ. Сэні найӧ сёйисны-юисны.

Мӧисей Синай керӧс вылын

¹² Господь шуис Мӧисейлы: «Кай Ме дінӧ керӧс вылӧ да виччысь тані. Ме сета тэныд изпӧвъяс, кытчӧ Ме гижи Индӧд да тшӧктӧмъяс, медым велӧдны войтырӧс».

¹³ Мӧисей мӧдӧдчис Исус кесъялысьыскӧд Енлӧн керӧс вылӧ.

¹⁴ Юрнуӧдысьяслы шуис: «Виччысьӧй тані, кытчӧдз ми огӧ бӧр локтӧй. Аарон да Хур кольччасны тіянкӧд. Кодлӧн кутшӧм мог лоӧ, мед шыасясны на дорӧ».

¹⁵ Мӧисей кайис Синай керӧс вылӧ. Керӧссӧ вевттис кымӧр.

¹⁶ Енлӧн дзирдлуныс лэччис сэтчӧ. Квайт лун чӧж керӧсыс вӧлі кымӧр вевттьӧд улын. Сизимӧд луннас Господь шыасис Мӧисей дінӧ кымӧр пытшсяньыс.

¹⁷ Израиль пиян аддзылісны Господьлысь дзирдлунсӧ. Дзирдлуныс вӧлі керӧс вылын сотысь би кодь.

¹⁸ Мӧисей воськовтіс кымӧр пытшкас и кайис керӧс йылӧ. Сэні сійӧ вӧлі нелямын лун да нелямын вой.