Петӧм 23 - Коми Библия 2023

¹ Эн паськӧд ылӧг сёрнияс. Ёрд водзын лёк вӧчысьлы пӧръялӧмнад эн отсав.

² Унджыкыс моз лёк уджъяс эн вӧч. Ёрд водзын сёрнит веськыда, а эн сувт унджыкыс дор.

³ Гӧль мортӧс ёрд водзын подулавтӧг эн дорйы.

⁴ Аддзан кӧ тэнӧ мустӧмтысьлысь ӧшсӧ либӧ осёлсӧ, вайӧд сылысь пемӧссӧ гортӧдзыс.

⁵ Аддзан кӧ тэнӧ мустӧмтысьлысь осёлсӧ, мый сьӧкыд нӧб вӧсна усьӧма кок йывсьыс, эн эновт сійӧс. Отсав кӧзяиныслы разявны осёл вылысь нӧбсӧ.

⁶ Гӧль мортлысь вензьӧмсӧ видлалігӧн ло веськыд ёрдысьӧн.

⁷ Эн ылӧдчы. Мыжтӧмӧс да веськыда олысьӧс кулӧм вылӧ эн мыжды, ӧд ылӧдчысьӧс Ме мыжда.

⁸ Эн босьт козин, ӧд козин босьтӧмыс синтӧммӧдӧ синмаӧс, и сійӧ мыждӧ веськыда вӧчысьӧс.

⁹ Эн [ӧтдорт да эн] дзескӧд йӧз муысь локтысьӧс. Ті ӧд асьныд тӧдлінныд татшӧм олӧмсӧ, кор локтысьясӧн вӧлінныд Египет муын».

Сизимӧд во да сизимӧд лун

¹⁰ «Квайт во чӧж кӧдз мутӧ да чукӧрт быдтастӧ,

¹¹ а сизимӧд вонас мутӧ шойччӧд. Сэтысь мед сёясны тэнад войтыр пӧвстысь гӧльяс, а мый коляс – вӧрса пемӧсъяс. Тадзикӧн тшӧтш виноград да олив пуястӧ вӧдит.

¹² Квайт лун уджав, а сизимӧд луннас шойччы. Тэнад ӧшкыд да осёлыд мед шойччасны. Кесйӧг аньыдлӧн пиыс да йӧз муысь локтысь мед тшӧтш шойччасны.

¹³ Кутчысьӧй став Менам тшӧктӧмӧ. Мукӧд енъяслысь нимъяссӧ энӧ казьтывлӧй, налӧн нимыс мед оз пет тіян вомысь».

Вогӧгӧрся куим гаж

¹⁴ «Куимысь вонас пасйӧй Меным сиӧм гаж.

¹⁵ Менам тшӧктӧм серти индӧм кадӧ авив тӧлысьӧ сизим лун чӧж пасйӧй Шомтӧм нянь сёян лунъяс. Сёйӧй сэки шомтӧм нянь. Ӧд авив тӧлысьӧ ті петінныд Египетысь. Энӧ локтӧй Ме водзӧ куш киӧн.

¹⁶ Пасйӧй Нянь вундан гаж, кор му вывсьыд вунданныд медводдза няньнытӧ. Пасйӧй во помын Чомӧр гаж, кор быдтас-вотӧснытӧ чукӧртанныд.

¹⁷ Куимысь вонас став айуловныд мед локтасны Господь Ыджыдыс водзӧ.

¹⁸ [Кор Ме вӧтла тіян водзысь мукӧд войтыръясӧс да паськӧда оланіннытӧ,] Меным вись пыдди вир вайигӧн энӧ вайӧй шома нянь. Меным вайӧм гаждырся висьлысь госсӧ асылӧдзыс энӧ кольӧй.

¹⁹ Аслад му вылысь медводдза быдтасысь медбурсӧ вай аслад Господь Енлӧн керкаӧ. Эн пу кӧзапиӧс мамыслӧн йӧв пиын».

Ӧлӧдӧмъяс да кӧсйысьӧмъяс

²⁰ «Ме ыста тіян водзвылын Ассьым анделӧс. Сійӧ мед видзас тіянӧс туяныд да нуӧдас Меӧн дасьтӧм местаӧ.

²¹ Видзчысьӧй сыысь да кывзысьӧй сылысь. Энӧ дӧзмӧдӧй сійӧс, ӧд сійӧ тіянлы тайӧс оз прӧстит. Менам нимӧй олӧ сы пытшкын.

²² [Ті кӧ кутанныд кывзысьны Менсьым да вӧчны ставсӧ, мый тшӧкта тіянлы, видзанныд кӧ йитӧдӧс, мый Ме кӧрталі тіянкӧд, сэки ті став войтыръяс пӧвстысь лоанныд Менам бӧрйӧм войтырӧн, ӧд муыс ставнас Менам. Ме – Ӧксыыс, а ті лоанныд Ӧксылӧн поп рӧднас да вежа войтырнас. Тайӧс висьтав Израиль пиянлы.] Ті кӧ кутанныд кывзысьны да вӧчны ставсӧ, мый Ме тшӧкта, сэки тіянӧс мустӧмтысьясӧс да дзескӧдысьясӧс Ме кута мустӧмтны-дзескӧдны.

²³ Кор Менам анделӧй мунас тіян водзын да нуӧдас тіянӧс аморейяс, хеттейяс, перезейяс, ханаансаяс, [гергесейяс,] хивейяс да евуссаяс дінӧ, сэки Ме бырӧда найӧс [тіян водзысь].

²⁴ Энӧ копрасьӧй-юрбитӧй налӧн енъяслы, энӧ олӧй на моз. Бырӧдӧй налысь енъяссӧ, жуглӧй налысь юрбитан изъяссӧ.

²⁵ Кесъялӧй Меным, асланыд Господь Енлы, и Ме бурсиа няньнытӧ [винанытӧ] да ванытӧ, вешта тіян пӧвстысь висьӧмъяс.

²⁶ Кадысь водз чужтысьыс да нӧбасьны вермытӧмыс тіян муын оз лоны, и олан лунъяснытӧ Ме ог дженьдӧд.

²⁷ Тіян водзвылын Ме ыста полӧм, шӧйӧвошта войтыръясӧс, кодъяс дінӧ ті матыстчанныд. Ме разӧда тіян водзысь вӧрӧгнытӧ.

²⁸ Ме мӧдӧда гырысь зіясӧс, найӧ вӧтласны тіян водзысь [аморей,] хивей, [евус,] ханаан да хеттей войтыръясӧс.

²⁹ Но ог вӧтлы найӧс ӧти воӧн, медым муыс эз овтӧммы, эз рӧдмыны сэні зверъяс да эз усьласьны тіян вылӧ.

³⁰ Вочасӧн вӧтлала найӧс тіян гӧгӧрысь, кытчӧдз ті онӧ содӧй да онӧ босьтӧй аслыныд мусӧ.

³¹ Ме сета тіянлы му Гӧрд саридзсянь Филистим саридзӧдз да овтӧминсянь [ыджыд Ефрат] юӧдз. Тайӧ муысь олысьяссӧ Ме сета тіян киӧ, и ті вӧтланныд найӧс.

³² [Энӧ ӧтувтчӧй накӧд да] энӧ кӧрталӧй йитӧд накӧд да налӧн енъяскӧд.

³³ Тіян муын тайӧ войтыръясыс мед оз овны, ӧд найӧ кыскасны тіянӧс мыж вӧчны Меным паныд. Кутанныд кӧ юрбитны налӧн енъяслы, шеданныд налькйӧ».