Петӧм 22 - Коми Библия 2023

Вештысьӧм йылысь тшӧктӧм

¹ «Коді гусялас ӧшкӧс либӧ ыжӧс да начкас либӧ вузалас сійӧс, мед сетас ӧти ӧш пыдди вит ӧшкӧс, а ӧти ыж пыдди нёль ыжӧс.

² Коді суас керка помсьыс гусясьысьӧс да кувмӧныс вачкас сійӧс, морт виӧмысь оз ло мыжа.

³ Но тайӧ кӧ вӧлі шонді петӧм бӧрын, морт виысь лоӧ мыжа. Гусясьысь мед вештысьӧ, а вештысьнысӧ кӧ оз вермы, сэки сійӧс асьсӧ мед вузаласны кесйӧг туйӧ. Тадзи сійӧ вештысяс гусясьӧмсьыс.

⁴ Кор [гусясьысьӧс кутасны и] гусялӧм ӧшкӧс, осёлӧс либӧ ыжӧс аддзасны ловйӧн, сэки гусясьысьлы колӧ кык пӧвстӧн вештысьны наысь.

⁵ Коді ассьыс ыж-мӧссӧ лэдзас йирсьыны йӧз му вылӧ либӧ виноград йӧрӧ, сылы колӧ мынтысьны [аслас му вылын быдтӧм няньӧн либӧ виноград вотӧсӧн, а пемӧсыс кӧ мусӧ ставнас талялас, мед мынтысяс] аслас му вылын быдтӧм медбур няньӧн либӧ медбур виноград вотӧсӧн.

⁶ Биыс кӧ вуджас йӧн вылӧ, сотас зорӧдъяс, быдман нянь да видз-му, бисӧ пестысь мед вештысяс ставсьыс.

⁷ Морт кӧ аслас матыссалы сетас видзны сьӧм либӧ кӧлуй, но сетӧмторсӧ петкӧдасны матыссаыслӧн керкаысь, и гусясьысьӧс кутасны, сэки гусясьысьыс мед кык пӧвстӧн вештысяс.

⁸ Гусясьысьыс кӧ оз сюр, сетӧмторсӧ видзысьыс мед локтас ёрдысь водзӧ да кыв сетас, мый эз гусясь.

⁹ Вензяна эмбур йылысь, ӧш, осёл, ыж, паськӧм либӧ кутшӧмкӧ воштӧмтор йылысь кӧ кодкӧ шуас, мый тайӧ сылӧн, сэки кыкнан мортсӧ колӧ кывзыны Ен водзын. Кодӧс Енмыс мыждас, сійӧ мед вештысяс мӧдыслы кык пӧвстӧн.

¹⁰ Морт кӧ матыссаыслы сетас видзны осёлӧс, ӧшкӧс, ыжӧс либӧ нӧшта кутшӧмкӧ пемӧсӧс, но пемӧсыс кулас либӧ доймалас, либӧ гусяласны сійӧс, и некод тайӧс оз аддзыв,

¹¹ сэки Господь водзын кыв сетӧмыс петкӧдлас, мый пемӧс видзны босьтысь абу мыжа матыссаыс водзын. Сэки пемӧслӧн кӧзяинлы колӧ сибӧдны тайӧ кыв сетӧмсӧ, и мӧдыслы вештысьны оз ков.

¹² Но пемӧссӧ кӧ гусяласны сылӧн йӧрысь, сэки мед вештысяс пемӧслӧн кӧзяинлы.

¹³ Звер кӧ косявлас пемӧссӧ, сылысь шойсӧ мед петкӧдлас пемӧслӧн кӧзяинлы. Зверӧн косявлӧм пемӧс вӧсна сылы вештысьнысӧ оз ков.

¹⁴ Морт кӧ водзӧсӧн босьтас матыссаыслысь пемӧс, и пемӧсыс доймалас либӧ кулас, но тайӧ оз ло пемӧслӧн кӧзяин дырйи, сэки водзӧсӧн босьтысь мед вештысяс.

¹⁵ Тайӧ кӧ лоӧ пемӧслӧн кӧзяин дырйи, сэки вештысьнысӧ оз ков. Но пемӧссӧ кӧ вӧлі кӧртымӧ босьтӧма, мед вештас кӧртым донсӧ».

Оласног йылысь тшӧктӧм

¹⁶ «Коді ылӧдлӧмӧн узяс нывкӧд, кодӧс абу кӧсйысьӧма сетны гӧтырӧ, сійӧ мед вештысяс гӧтырпуысь да босьтас нывсӧ гӧтырӧ.

¹⁷ Но нылыслӧн батьыс кӧ оз сет нывсӧ, ылӧдлысь мед вештысяс [ныв батьлы] гӧтырпулысь донсӧ.

¹⁸ Тунасьысь аньӧс ловйӧн эн коль.

¹⁹ Быдӧнӧс, коді узьлӧ пемӧскӧд, колӧ вины.

²⁰ Коді вайӧ вись мукӧд енъяслы Господьлы кындзи, сійӧс мед лоӧ бырӧдӧма.

²¹ Энӧ дзескӧдӧй-кедзовтӧй йӧз муысь локтысьӧс, ӧд ті асьныд вӧлінныд локтысьясӧн Египет муын.

²² Дӧваясӧс да батьтӧм-мамтӧмъясӧс энӧ дзескӧдӧй.

²³ Кутанныд кӧ дзескӧдны, найӧ шыасясны Ме дінӧ, и Ме кыла налысь ойзӧмсӧ.

²⁴ Сэки ӧзъяс Менам скӧрлунӧй, и Ме виа тіянӧс шыпуртӧн. Тіян гӧтыръясныд лоасны дӧваясӧн, челядьныд колясны бать-мамтӧг.

²⁵ Менам войтырысь гӧль мортлы кӧ уджйӧзӧн сетан сьӧм, бӧрсӧ сылысь содтӧдӧн эн босьт.

²⁶ Уджйӧзӧн сетӧмсьыд кӧ босьтан матыссаыдлысь паськӧмсӧ, шонді пуксьытӧдзыс сылы паськӧмсӧ бӧр сет.

²⁷ Ӧд узьнысӧ водігӧн сылы нинӧмӧн лоӧ шебрасьнысӧ. Сійӧ шыасяс Ме дінӧ, и Ме кыла сійӧс, Ме ӧд бур сьӧлӧма.

²⁸ Эн омӧльт Енмӧс, эн ёр ас войтырыдлысь юралысьтӧ.

²⁹ Энӧ ньӧжмасьӧй вайны Меным асланыд гумла вывсьыд да виноград пычканінсьыд медводдза босьтӧмторъяснытӧ. Сетӧй Меным медводдза пинытӧ.

³⁰ Вайӧй ыж-мӧсныдлысь [да осёлъясныдлысь] медводдза чужысьӧс. Сизим лун видзӧй сійӧс мам дінас, а кӧкъямысӧд луннас вайӧй сійӧс Меным.

³¹ Лоӧй Менам вежа войтырӧн. Энӧ сёйӧй зверӧн косявлӧм пемӧслысь яйсӧ, шыбитӧй сійӧс понъяслы.