Петӧм 21 - Коми Библия 2023

Еврей кесйӧгъяс йылысь тшӧктӧм

¹ «Висьтав Израиль войтырлы тайӧ тшӧктӧмъяссӧ.

² Ньӧбан кӧ тэ еврей кесйӧгӧс, сійӧ мед уджалас тэныд квайт во чӧж, а сизимӧд вонас лэдз сійӧс вӧля вылӧ дон босьттӧг.

³ Кесйӧгыд кӧ ӧтнас вӧлі, мед мунас ӧтнасӧн, а вӧлі кӧ гӧтыра, лэдз гӧтырыскӧд.

⁴ Ыджыдыс кӧ сійӧс гӧтрӧдас, и гӧтырыс чужтас ныв-пиӧс, сэки гӧтырыс челядьыскӧд мед кольччасны уджавны ыджыдыслы, а ачыс кесйӧгыс мед мунас ӧтнасӧн.

⁵ Но кесйӧгыс кӧ шуас, мый радейтӧ ыджыдсӧ, гӧтырсӧ да челядьсӧ, и оз кӧсйы петны вӧля вылӧ,

⁶ сэки ыджыдыс мед вайӧдас сійӧс Ен водзӧ, сувтӧдас ӧдзӧс либӧ ӧдзӧс курич бердӧ да пельсӧ розьӧдас шылаӧн. Та бӧрын тайӧ кесйӧгыс кольӧ сы ордӧ пыр кежлӧ.

⁷ Морт кӧ вузалас ассьыс нывсӧ кесйӧг туйӧ, нылыс оз вермы кесйӧг айулов моз вӧля вылӧ петны.

⁸ Кесйӧг ань кӧ оз ло шогмана аслас ыджыдлы, коді кӧсйис босьтны сійӧс кесйӧг-гӧтырӧ, сэки ыджыдыс мед вузалас сійӧс сэтшӧм мортлы, коді лэдзас сійӧс вӧля вылӧ. Мукӧд войтырлы мед оз вузав ӧтдортӧм аньӧс.

⁹ Но ыджыдыс кӧ кесйӧг аньӧс сетас аслас пи сайӧ, аньыс мед лоас сылы ныв туйӧ.

¹⁰ Ыджыдыс кӧ босьтас аслыс мӧд гӧтырӧс, воддза гӧтырсӧ сылы сідзжӧ колӧ вердны, пасьтӧдны да сыкӧд узьлыны.

¹¹ Тайӧ куимторсӧ кӧ оз кут вӧчны воддза гӧтырыслы, аньыс мед мунас сы ордысь дон мынтытӧг».

Дойдӧм вӧсна кывкутӧм

¹² «Коді вачкас мортӧс кувмӧныс, сійӧс асьсӧ мед виасны.

¹³ Но сійӧ кӧ эз кӧсйы вины мортсӧ, а Енмыс лэдзис тадзи лоны, сэки мед пышъяс, кытчӧ Ме инда.

¹⁴ Но тӧдӧмӧн кӧ виис ассьыс матыссасӧ [да пышйис висьпуктанін дорӧ], весиг Менам висьпуктанін дорысь колӧ босьтны сійӧс да вины.

¹⁵ Коді вачкас батьсӧ либӧ мамсӧ, сійӧс мед виасны.

¹⁶ [Израиль пиян пӧвстысь] мортӧс гусялысьӧс да [кесйӧг туйӧ] вузалысьӧс либӧ ас дінас видзысьӧс мед виасны.

¹⁷ Коді лёкӧдас бать-мамсӧ, сійӧс мед виасны.

¹⁸ Кык мортлӧн вензигӧн кӧ ӧтиыс мӧдсӧ вачкас изйӧн либӧ кабырнас, и мӧдыс оз кув, а доймас вольпасьын куйлымӧн,

¹⁹ но бӧрынджык чеччас да кутас ветлӧдлыны беддьӧн, сійӧс вачкысьӧс мед оз мыждыны. Сӧмын мед мынтысяс мӧдыслы уджавны вермытӧмсьыс да бурдӧдчӧмсьыс.

²⁰ Коді беддьӧн вачкас кесйӧгсӧ либӧ кесйӧг аньсӧ кувмӧныс, сійӧс мед мыждасны.

²¹ Но кесйӧгыс кӧ олас на лун-мӧд, сэки вачкысьӧс мед оз мыждыны, ӧд кесйӧгыс – сылӧн.

²² Зык-вен дырйи кӧ морт вачкас кынӧма аньӧс, и кагаыс петас, но кага воштӧмысь ӧтдор аньлӧн мукӧдлаті оз доймав, таысь мыжаыс мед вештысяс, мыйта шуас аньлӧн верӧсыс либӧ ёрдысь.

²³ Ань кӧ кулас либӧ сылӧн кӧ мукӧдлаті доймалас, мыжаыс мед сетас олӧмысь олӧм,

²⁴ синмысь син, пиньысь пинь, киысь ки, кокысь кок.

²⁵ Сотчӧмысь мед мынтысяс сотчӧмӧн, дойысь – дойӧн.

²⁶ Коді ассьыс кесйӧгсӧ либӧ кесйӧг аньсӧ вачкас синмас, и кесйӧгыс кольӧ синпӧла, мед лэдзас сійӧс вӧля вылӧ син вӧснаыс.

²⁷ Коді аслас кесйӧглысь либӧ кесйӧг аньлысь жугӧдас пиньсӧ, мед лэдзас сійӧс вӧля вылӧ пинь вӧснаыс».

Ӧш вӧсна кывкутӧм

²⁸ «Айловӧс либӧ аньӧс кувмӧныс люкалысь ӧшкӧс изъялӧй. Сылысь яйсӧ энӧ сёйӧй. Кӧзяиныс абу мыжа.

²⁹ Но ӧшкыс кӧ важысянь нин вӧлӧма люкасьысь, и кӧзяинӧс ӧлӧдӧма, а сійӧ эз видзӧд ӧш бӧрсяыс, сэки айловӧс либӧ аньӧс кувмӧныс люкалысь ӧшкӧс изъялӧй, а кӧзяинсӧ виӧй.

³⁰ Кӧзяинлы кӧ тшӧктасны вештысьны аслас олӧмысь, сійӧ мед вештысяс, мыйта шуасны.

³¹ Зонкаӧс либӧ нывкаӧс кувмӧныс люкалысь ӧшлы тшӧтш тайӧ индӧдыс серти вӧчӧй.

³² Ӧшкыс кӧ кувмӧныс люкалас кесйӧгӧс либӧ кесйӧг аньӧс, сэки ӧшлӧн кӧзяиныс мед вештас кесйӧглӧн ыджыдыслы комын сикель эзысь, а ӧшсӧ изъялӧй.

³³ Ӧш либӧ осёл кӧ усяс кодйӧм либӧ восьсӧн кольӧм юкмӧсӧ,

³⁴ сэки юкмӧссӧ кодйысьыс либӧ восьсӧн кольысьыс мед эзысьӧн вештысяс пемӧслӧн кӧзяинлы, а пемӧс шойсӧ коляс аслыс.

³⁵ Ӧшкыс кӧ кувмӧн люкалас орчча олысьлысь ӧшсӧ, мед ӧшъяслӧн кӧзяинъяс вузаласны ловъя ӧшсӧ да юкасны сьӧмсӧ, а кулӧм ӧшлысь яйсӧ мед тшӧтш юкасны.

³⁶ Тӧдісны кӧ, мый ӧшкыс важысянь нин вӧлӧма люкасьысь, но сылӧн кӧзяиныс [тӧдӧмӧн] эз видзӧд сы бӧрся, сэки кӧзяиныс мед кулӧм ӧшкысь вештысяс орчча олысьыслы ӧшкӧн, а шойсӧ мед аслыс босьтас».