Петӧм 20 - Коми Библия 2023

Дас тшӧктӧм

¹ Ен висьталіс [Мӧисейлы] тайӧ кывъяссӧ:

² «Ме – Господь, тэнад Енмыд. Ме петкӧді тэнӧ Египет муысь нартитӧм улысь.

³ Эн юрбит мукӧд енъяслы Меысь ӧтдор.

⁴ Эн вӧч аслыд бӧлбанӧс да идолӧ пуктӧм могысь эн серпасав сійӧс, мый эм енэжас, му вылас да муысь улынджык ваас.

⁵ Эн копрась да эн юрбит налы, ӧд Ме, Господь, тэнад Ен – вежӧгтысь Ен. Батьныслӧн мыж вӧсна Ме водзӧс перъя Менӧ мустӧмтысь челядьыслысь коймӧд да нёльӧд чужанвужйӧдз.

⁶ А налы, кодъяс радейтӧны Менӧ да олӧны Менам тшӧктӧмъяс серти, Ме петкӧдла Ассьым буралӧмӧс сюрс чужанвужйӧдз.

⁷ Аслад Господь Енлысь нимсӧ весьшӧрӧ эн шуав, ӧд Господь оз коль мыждытӧг сійӧс, коді весьшӧрӧ шуалӧ Сылысь нимсӧ.

⁸ Эн вунӧд шойччан лунтӧ. Сійӧ мед лоас тэныд вежа.

⁹ Квайт лун уджав, вӧч ассьыд уджъястӧ,

¹⁰ а сизимӧд луныс шойччан лун, торйӧд сійӧс Господьлы, аслад Енлы. Тайӧ лунӧ тэ, тэнад ныв-пиыд, кесйӧгыд, кесйӧг аньыд, [тэнад ӧшкыд, осёлыд,] ыж-мӧскыд да йӧз муысь локтысьыд, коді олӧ тэ ордын, некутшӧм удж энӧ вӧчӧй.

¹¹ Ӧд квайт лун чӧж Господь вӧчис енэжсӧ, мусӧ, саридзсӧ да ставсӧ, мый сэні эм, а сизимӧд луннас Сійӧ шойччис. Та вӧсна Господь бурсиис шойччан лун да вежӧдіс сійӧс.

¹² Пыдди пукты ассьыд бать-мамтӧ, медым [тэныд вӧлі бур да] олӧмыд вӧлі кузь нэма сійӧ муас, мый Господь, тэнад Енмыд, сетас тэныд.

¹³ Эн ви.

¹⁴ Гозъякост олӧм эн пежав.

¹⁵ Эн гусясь.

¹⁶ Матыссаыд йылысь ылӧгсӧ эн висьтав.

¹⁷ Эн ышты матыссаыдлӧн керкаыс да гӧтырыс вылӧ, [муыс вылӧ,] кесйӧгыс да кесйӧг аньыс вылӧ, ӧшкыс да осёлыс вылӧ [сылӧн ыж-мӧскыс вылӧ]. Эн ышты нинӧм вылӧ, мый сылӧн эм».

¹⁸ Став войтырыс аддзис гымалӧм-чардалӧм да тшынасьысь керӧс, кыліс буксан шы. Тайӧс аддзӧмысь найӧ бӧрыньтчӧмӧн сувтісны ылӧджык.

¹⁹ Найӧ шуисны Мӧисейлы: «Тэ сёрнит миянкӧд, а ми кутам кывзыны. Енмыс мед оз сёрнит миянкӧд, медым ми эгӧ кулӧй».

²⁰ Мӧисей шуис войтырыслы: «Энӧ полӧй. Енмыс локтіс [тіян дінӧ], медым тӧдмавны тіянӧс, медым ті полінныд Сыысь да энӧ вӧчӧй мыж».

²¹ Войтырыс сулаліс ылынкодь, а Мӧисей матыстчис сьӧд кымӧрлань, кӧні вӧлі Ен.

Висьпуктанін йылысь тшӧктӧм

²² Господь шуис Мӧисейлы: «Висьтав [Яков рӧдлы, шу] Израиль пиянлы: ті аддзылінныд, кыдзи Ме енэжсянь сёрниті тіянкӧд.

²³ Энӧ вӧчӧй аслыныд эзысь да зарни енъясӧс.

²⁴ Вӧчӧй муысь Меным висьпуктанін да вайӧй сэні сотан да бурасян вись пыдди ыж-мӧс. Быд местаын, кӧні Ме восьта Ассьым нимӧс, Ме локта тіян дінӧ да бурсиа тіянӧс.

²⁵ Но кутанныд кӧ вӧчны Меным висьпуктанін изйысь, энӧ вӧчӧй сійӧс кералӧм изйысь, ӧд изсӧ вундаліганыд пежаланныд сійӧс.

²⁶ Висьпуктанінӧ содйӧд энӧ кайӧй, медым восьлаліганыд эз тыдовтчы куш яйныд».