Петӧм 19 - Коми Библия 2023

Господь лэччӧ Синай керӧс вылӧ

^1-2 Египет муысь петӧм бӧрын коймӧд тӧлысьлӧн медводдза лунӧ Израиль пиян Рефидимысь мунӧм бӧрын воисны Синай овтӧминӧ. Найӧ паськӧдчисны чомъяснас керӧс бокӧ.

³ Мӧисей кайис [керӧс вылӧ] Ен дінӧ. Господь шыасис керӧссянь да шуис Мӧисейлы: «Висьтав Яков рӧдлы, юӧрт Израиль пиянлы:

⁴ ті аддзылінныд, мый Ме вӧчи египетсакӧд. Кутш бордъяс вылын моз Ме лэбӧді тіянӧс, вайӧді Ас дінӧ.

⁵ Ті кӧ кутанныд кывзысьны Менсьым да оланныд йитӧд серти, мый Ме кӧрталі тіянкӧд, сэки войтыръяс пӧвстысь ті лоанныд Менам войтырӧн. Муыс ӧд ставнас Менам.

⁶ Ті лоанныд Менам попъясӧн да вежа войтырӧн. Висьтав тайӧ кывъяссӧ Израиль пиянлы».

⁷ Керӧс вылысь лэччӧм бӧрас Мӧисей чукӧртіс войтырыслысь юрнуӧдысьясӧс да висьталіс налы став тайӧ кывъяссӧ, мый висьталіс сылы Господь.

⁸ Став войтырыс ӧти вомӧн шуис: «Ставсӧ, мый тшӧктіс Господь, ми кутам вӧчны [да кутам кывзысьны]». Мӧисей муніс висьтавны тайӧс Господьлы.

⁹ Господь шуис Мӧисейлы: «Ме локта тэ дінӧ сук кымӧр пытшкын да кута сёрнитны тэкӧд, медым войтырыд кылас да водзӧ кутас эскыны тэныд». Сы бӧрын, кор Мӧисей висьталіс Господьлы войтырыслысь кывъяссӧ,

¹⁰ Господь шуис сылы: «Мун войтырыд дінӧ, вежӧд найӧс талун да аски. Найӧ мед мыськаласны паськӧмнысӧ,

¹¹ дасьтысясны коймӧд лун кежлӧ, ӧд коймӧд луннас став войтырлӧн син водзын Господь лэччас Синай керӧс вылӧ.

¹² Керӧс гӧгӧрыс нуӧд визь да йӧзыслы шу, мед оз кайны керӧс вылӧ, оз инмӧдчывны керӧс горулас. Быдӧнӧс, коді инмӧдчас керӧсас, лоӧ виӧма.

¹³ Морт-ӧ, пемӧс-ӧ инмӧдчылас, ловйӧн сійӧс энӧ кольӧй. Кинад сійӧс энӧ виӧй, но изъялӧй либӧ лыйӧй ньӧввужйӧн. Кор кылас буксан шы, [кор кымӧрыс вешъяс керӧс весьтысь,] сэки войтырыс вермас кайны керӧсӧ».

¹⁴ Мӧисей лэччис войтырыс дінӧ да вежӧдіс найӧс, и найӧ мыськалісны паськӧмнысӧ.

¹⁵ Мӧисей шуис войтырыслы: «Дасьтысьӧй коймӧд лун кежлӧ, гӧтырныдкӧд энӧ узьӧй».

¹⁶ Коймӧд луннас водз асывсянь гымаліс-чардаліс, Синай керӧс вевттьысис сук кымӧрӧн, кыліс горасьыс-гора буксан шы. Чомъяс дінын став войтырыс полӧмысла тіраліс.

¹⁷ Мӧисей нуӧдіс войтырсӧ сувтанінысь аддзысьны Енкӧд. Йӧзыс локтісны керӧс горулӧ.

¹⁸ Синай керӧс ставнас тшыналіс, ӧд Господь лэччис сэтчӧ биӧн. Керӧсыс ёна вӧрис, и пачысь моз сэтысь кайис тшын.

¹⁹ Буксан шы гораммис и гораммис. Мӧисей сёрнитіс, а Ен вочавидзис сылы гӧлӧс шыӧн.

²⁰ Синай керӧс вылӧ лэччӧм бӧрын Господь корис Мӧисейӧс кайны сэтчӧ. Мӧисей кайис.

²¹ Господь шуис Мӧисейлы: «Лэччы да ӧлӧд войтыртӧ, мед оз матыстчыны Ме дінӧ. Матыстчасны кӧ, сэки унаӧн куласны.

²² А попъяслы, кодъяс кӧсйӧны матыстчыны Господь [Ен] дінӧ, колӧ вежӧдны-сӧстӧммӧдны асьнысӧ, медым Господь эз бырӧд найӧс».

²³ Мӧисей шуис Господьлы: «Войтырыс оз кай Синай керӧс вылӧ, Тэ ӧд чорыда ӧлӧдін миянӧс, тшӧктін керӧс гӧгӧрыс визь нуӧдны да вежӧдны керӧссӧ».

²⁴ Господь шуис сылы: «Ӧні лэччы, а бӧрсӧ кай Ааронкӧд. Попъяс да войтырыд мед оз кайны Ме дінӧ, медым Ме эг бырӧд найӧс».

²⁵ Мӧисей лэччис войтырыс дінӧ да висьталіс налы тайӧс.