Петӧм 18 - Коми Библия 2023

Мӧисей паныдасьӧ Иофор тесьтыскӧд

¹ Мадианса Иофор поплы, Мӧисейлӧн тесьтыслы, кывсис, мый Енмыс вӧчӧма Мӧисейлы да Аслас Израиль войтырлы, мый Господь петкӧдӧма Израиль войтырӧс Египетысь.

² Иофор босьтіс аскӧдыс Мӧисейлысь Сеппора гӧтырсӧ, кодӧс Мӧисей коркӧ бӧр бергӧдліс тесьтыс дінӧ.

³ Иофор босьтіс аскӧдыс тшӧтш Мӧисейлысь кыкнан писӧ. Ӧтиыслӧн нимыс вӧлі Гершом, ӧд Мӧисей шулӧма, йӧз муын пӧ ме лои локтысь мортӧн,

⁴ а мӧдыслӧн – Элизер, ӧд Мӧисей шулӧма, батьӧйлӧн Енмыс пӧ отсаліс меным да мездіс менӧ фараон шыпуртысь.

⁵ Мӧисейлӧн Иофор тесьтыс, гӧтырыс да пияныс локтісны Мӧисей дінӧ овтӧминӧ. Мӧисейлӧн чомйыс сулаліс Енлӧн керӧс бокын,

⁶ и Иофор мӧдӧдіс висьтавны Мӧисейлы: «Тэнад Иофор тесьтыд, тэнад гӧтырыд да пияныд локтӧны тэ дінӧ».

⁷ Мӧисей воча петіс аслас тесьтыслы, копыртчыліс сылы да окыштіс сійӧс, сэсся ӧта-мӧдыскӧд чолӧмасьӧм бӧрын найӧ пырисны чомйӧ.

⁸ Мӧисей висьталіс тесьтыслы ставсӧ, мый Господь вӧчис фараонлы да Египетлы Израиль вӧсна. Висьталіс, кутшӧм сьӧкыдлунъяс вӧліны налӧн туяныс, да кыдзи Господь мездіс найӧс [фараон да египетса киысь].

⁹ Иофор нимкодясис став бурсьыс, мый Господь вӧчис Израиль войтырлы, кор мездіс найӧс египетсаясысь [да фараон киысь].

¹⁰ Иофор шуис: «Ошкӧм Господьлы, коді мездіс тіянӧс египетсаясысь да фараон киысь.

¹¹ Ӧні ме тӧда, мый Господь став енсьыс ыджыд, ӧд Израиль войтырӧс Сійӧ мездіс вылӧ кыпӧдчысь египетсаяслӧн кипод улысь».

¹² Мӧисейлӧн Иофор тесьтыс вайис Енлы сотан да мукӧд висьяс. Аарон да став израильса юрнуӧдысьяс локтісны да Мӧисейлӧн тесьтыскӧд сёйисны Ен водзын.

Ёрдысьясӧс индӧм

¹³ Мӧд луннас Мӧисей видлаліс израильсаяслысь вензьӧмъяссӧ, вӧлі ёрдысьӧн. Асывводзсянь рытӧдз сы дінӧ волывлісны йӧз.

¹⁴ Мӧисейлӧн Иофор тесьтыс аддзис тайӧс да шуис: «Мый нӧ тэ вӧчан! Мыйла тэ войтыртӧ ӧтнад кывзан? Асывсянь рытӧдз тэ водзӧ локтӧны йӧз».

¹⁵ Мӧисей висьталіс тесьтыслы: «Войтырыс локтӧ ме дінӧ юасьны Енлысь кӧсйӧмсӧ.

¹⁶ Асланыс вензьӧмъясӧн найӧ локтӧны ме дінӧ. Ме ёрдысь на костын. Ме тӧдмӧда найӧс Енлӧн индӧд-тшӧктӧмъясӧн».

¹⁷ «Тайӧ абу бур, – шуис Мӧисейлӧн тесьтыс. –

¹⁸ Тадзи тэ мудзтӧдан асьтӧ, мудзтӧдан тшӧтш войтыртӧ. Ӧтнад тэ он вермы татшӧм сьӧкыд уджсӧ вӧчны.

¹⁹ Кывзы менӧ. Лэдз меным туйдӧдны тэнӧ, и Енмыс лоас тэкӧд. Войтырыд вӧсна сувт Ен водзӧ да висьтав Сылы налысь могъяссӧ.

²⁰ Велӧд найӧс [Енлӧн] индӧд-тшӧктӧмъясӧ, инды налы [Сылысь] туйсӧ, кыті мунны, да висьтав ставсӧ, мый колӧ вӧчны.

²¹ Бӧрйы войтыр пӧвстысь тӧлка йӧзӧс, кодъяс полӧны Енмысь. Найӧ мед вӧліны веськыдӧсь, эз горшасьны. Пукты ӧтиясӧс веськӧдлыны сюрс мортӧн, мӧдъясӧс – сё мортӧн, коймӧдъясӧс – ветымын мортӧн, нёльӧдъясӧс – дас мортӧн. [Пукты тшӧтш гижӧдӧ велӧдысьясӧс.]

²² Веськӧдлысьясыд мед лоӧны ёрдысьясӧн. Ыджыд могъясӧн найӧ мед локтасны тэ дінӧ, а ичӧтторъяссӧ мед асьныс видлаласны. Тэнад уджыд лоӧ кокньыдджык, кор найӧ юкасны сійӧс тэкӧд.

²³ Тэ кӧ тадзи вӧчан Енлӧн тшӧктӧм серти, сэки тэ кок йывсьыд он усь, и йӧзыд лӧнь сьӧлӧмӧн гортаныс разӧдчасны».

²⁴ Мӧисей кывзысис тесьтыслысь да вӧчис сылӧн шуӧм серти.

²⁵ Мӧисей бӧрйис Израиль войтыр пӧвстысь тӧлка йӧзӧс да пуктіс найӧс веськӧдлыны сюрс мортӧн, сё мортӧн, ветымын мортӧн да дас мортӧн. [Пуктіс тшӧтш гижӧдӧ велӧдысьясӧс.]

²⁶ Найӧ вӧліны войтырлы ёрдысьясӧн, видлалісны ичӧт могъяс. А сьӧкыд могъясӧн войтыр локтіс Мӧисей дінӧ.

²⁷ Мӧисей колльӧдіс тесьтсӧ, и мӧдыс муніс аслас муӧ.