Петӧм 13 - Коми Библия 2023

Медводдза чужысьӧс Господьлы сиӧм

¹ Господь шуис Мӧисейлы:

² «Став медводдза ай чужысьсӧ вежӧд-торйӧд Меным. Израиль войтыр пӧвстысь медводдза чужысьыс и ыж-мӧс пӧвстысь медводдза чужысьыс лоӧны Менам».

Шомтӧм нянь сёян лунъяс

³ Мӧисей шуис войтырыслы: «Энӧ вунӧдӧй сійӧ лунсӧ, кор Господь вына кинас петкӧдіс тіянӧс Египетысь, и ті мынінныд нартитӧм улысь. Тайӧ лунӧ энӧ сёйӧй шоммӧдӧм нянь.

⁴ Талун, авив тӧлысьӧ, ті петанныд.

⁵ Господь [тіян Енныд] кыв сетӧмӧн кӧсйысис тіян батьяслы, мый сетас тіянлы ханаансаяслысь, хеттейяслысь, аморейяслысь, хивейяслысь да евуссаяслысь [и гергесейяслысь да перезейяслысь] мусӧ, кӧні визувтӧ йӧв да ма. Кор Сійӧ вайӧдас тіянӧс сэтчӧ, сэки тайӧ тӧлысяс ті вӧчӧй тшӧктӧмыс серти.

⁶ Сизим лун чӧж сёйӧй шомтӧм нянь, а сизимӧд луныс – Господьлы сиӧм гаж.

⁷ Сизим лун чӧж колӧ сёйны шомтӧм нянь. Сэки тіян оланінын мед оз ло шоммӧдӧм нянь да няньшом.

⁸ Сійӧ лунӧ аслад пиыдлы шу, мый тадзи тэ казьтылан Господь Енлысь тэныд вӧчӧмторсӧ, кор тэ петін Египетысь.

⁹ Тайӧ тшӧктӧмыс мед лоӧ ки вылад да плешкад пуктӧм пас кодь, медым тэ эн вунӧд Господьлысь Индӧдсӧ, ӧд Господь [Ен] вына кинас петкӧдіс тэнӧ Египетысь.

¹⁰ Воысь воӧ урчитӧм кадӧ вӧч тайӧ тшӧктӧм сертиыс.

¹¹ Кор Господь [тіян Енныд] пыртас тіянӧс Ханаан муӧ да сетас сійӧс тіянлы, кыдзи кыв сетӧмӧн кӧсйысис тіянлы да тіян батьяслы,

¹² сэки став медводдза чужысь писӧ торйӧд Господьлы. Весиг ыж-мӧслысь став медводдза ай чужысьсӧ вай Господьлы.

¹³ Медводдза чужысь осёлпиысь вештысь баляпиӧн, а он кӧ кӧсйы вештысьны, песовт осёлпилысь сьылісӧ. Тшӧтш аслад медводдза чужысь пиысь вештысь.

¹⁴ Тэнад пиыд кӧ юалас, мыйла тэ тадзи вӧчан, висьтав сылы: ”Аслас вына кинас Господь петкӧдіс миянӧс Египет муысь нартитӧм улысь.

¹⁵ Кор фараон пыксис да эз лэдз миянӧс, Господь виис Египетысь став медводдза чужысьсӧ йӧз пӧвстысь и ыж-мӧс пӧвстысь. Та вӧсна ыж-мӧслысь став медводдза ай чужысьсӧ ме вая Господьлы вись пыдди, а аслам медводдза чужысь пиысь ме вештыся”.

¹⁶ Мед тайӧ тшӧктӧмыс лоас ки вылад да плешкад пуктӧм пас кодь, ӧд Господь Аслас вына кинас петкӧдіс миянӧс Египет муысь».

Енмыс нуӧдӧ Ассьыс войтырсӧ

¹⁷ Кор фараон лэдзис Израиль войтырӧс, Енмыс эз нуӧд найӧс филистимсаяслӧн му пыр, кӧть тайӧ вӧлі медся дженьыд туйыс. Ен мӧвпыштіс, мый Израиль войтыр вермас бӧр бергӧдчыны Египетӧ, на вылӧ кӧ уськӧдчасны филистимсаяс.

¹⁸ Та вӧсна Ен нуӧдіс войтырсӧ Гӧрд саридзлань кытшола туйӧд, овтӧминті. Израиль войтыр петіс Египет муысь тышкайӧз моз чукӧръясӧн.

¹⁹ Мӧисей босьтіс аскӧдыс Ӧсиплысь лыяссӧ, ӧд Израиль пиянлысь Ӧсип вӧлі босьтӧма кыв. Сійӧ шулӧма: «Кор Енмыс локтас тіянла, татысь петіганыд босьтӧй аскӧдныд менсьым лыясӧс».

²⁰ Суккотысь муныштӧм бӧрын Израиль войтыр сувтіс Этамӧ, овтӧмин бокӧ.

²¹ Луннас Господь муніс на водзвылын кымӧр сюръя пытшкын, медым индыны туйсӧ, а войнас – би сюръя пытшкын, медым югзьӧдны туйсӧ. Тадзи найӧ вермисны мунны луннас и войнас.

²² Луннас кымӧр сюръя да войнас би сюръя эз вешйывны на водзысь.