Петӧм 12 - Коми Библия 2023

Мездмӧм йылысь гажӧдчӧм

¹ Египетын Господь шуис Мӧисейлы да Ааронлы:

² «Тайӧ тӧлысьыс мед лоас тіянлы волӧн медводдза тӧлысьӧн.

³ Став Израиль войтырлы висьталӧй: тайӧ тӧлысьнас дасӧд лунӧ быд котыр мед торйӧдас аслыс ӧти баляӧс.

⁴ Котырыс кӧ этша лыда, и та вӧсна найӧ дзоньнас балясӧ сёйны оз вермыны, сэки мед ӧтувтчӧны орччӧн олысьяскӧд. Артыштӧй, коді мыйта сёяс.

⁵ Босьтны колӧ дзоньвидза арӧса баляӧс, сійӧ мед вӧлі межпи либӧ кӧзапи.

⁶ Тайӧ тӧлысьнас дас нёльӧд лунӧдзыс видзӧй балясӧ ас орданыд. Рытнас став Израиль войтыр мед начкас балянысӧ.

⁷ Сэсся мед босьтасны сылысь вирсӧ да мавтасны ӧдзӧслысь кыкнанбок куричсӧ да вылыс куричсӧ сійӧ керкасьыс, кӧні кутасны сёйны яйсӧ.

⁸ Войнас мед сёясны би вылын пражитӧм яйсӧ шомтӧм няньӧн да курыд турунъясӧн.

⁹ Энӧ сёйӧй яйсӧ, сійӧ кӧ лоӧ улькодь. Энӧ пуӧй яйсӧ ваын. Пражитӧй балясӧ юр-кокнас да пытшкӧснас би вылын.

¹⁰ [Балялысь лысӧ энӧ чегъялӧй.] Асылӧдзыс нинӧм энӧ кольӧй, а коляс кӧ, сотӧй биын.

¹¹ Вӧнясьӧй да кӧмасьӧй. Босьтӧй кианыд бедьнытӧ да тэрмасьӧмӧн сёйӧй балясӧ. Тайӧ Господьлы сиӧм Ыджыд лун.

¹² Дзик тайӧ войӧ Ме муна Египет муӧд да виа тайӧ муысь быд медводдза чужысьӧс йӧз пӧвстысь и ыж-мӧс пӧвстысь. Тадзи Ме мыжда египетса став енсӧ, ӧд Ме – Господь.

¹³ Тіян керкаясын паснас лоӧ вир. Ме аддза вирсӧ да бокиті муна. Ме мыжда Египет му, но тіянӧс бырӧдӧмыс оз су.

¹⁴ Тайӧ луныс Господьлы сиӧм гаж. Казьтылӧмӧн пасйӧй сійӧс. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз.

¹⁵ Сизим лун чӧж сёйӧй шомтӧм нянь. Медводдза лунӧ петкӧдӧй няньшомсӧ керкасьыныд. Ӧд медводдза лунсяньыс сизимӧд лунӧдз коді кутас сёйны шоммӧдӧм нянь, сійӧс лоӧ бырӧдӧма Израиль войтыр пӧвстысь.

¹⁶ Медводдза лунӧ да сизимӧд лунӧ тіян мед лоӧ вежа чукӧртчӧм. Некутшӧм удж энӧ вӧчӧй тайӧ лунъясӧ, сӧмын сёян позьӧ лӧсьӧдны.

¹⁷ Пасйӧй Шомтӧм нянь сёян лунъяс, ӧд тайӧ лунӧ тышкайӧзӧс моз Ме петкӧді тіянӧс Египетысь. Чужысьяссянь чужысьясӧдз пасйӧй тайӧ лунсӧ. Тайӧ тшӧктӧмыс тіянлы нэмъяс кежлӧ.

¹⁸ Медводдза тӧлысьлӧн дас нёльӧд лун рытсянь кызь ӧтиӧд лун рытӧдз сёйӧй шомтӧм нянь.

¹⁹ Тіян керкаясын сизим лун чӧж мед оз ло няньшомыс. Коді кутас сёйны шоммӧдӧм нянь, сійӧс лоӧ бырӧдӧма Израиль войтыр пӧвстысь, йӧз муысь локтысь-ӧ сійӧ либӧ вужвойтырысь.

²⁰ Энӧ сёйӧй шоммӧдӧм нянь. Кӧть кӧні ті кутанныд овны, сёйӧй сӧмын шомтӧм нянь».

²¹ Мӧисей корис Израиль войтырлысь став юрнуӧдысьсӧ да шуис налы: «Быд котыр мед бӧръяс да начкас ыджыдлунся баля.

²² Сэсся босьтӧй китыр иссоп турун, кӧтӧдӧй дозйӧ чукӧртӧм вирнас да мавтӧй ӧдзӧсныдлысь вылыс куричсӧ да кыкнанбок куричсӧ. Тіян пӧвстысь асылӧдзыс мед некод оз пет керкасьыс ӧдзӧс саяс.

²³ Господь мунас Египет муӧд да виалас египетсаясӧс, но кор ӧдзӧс куричьясысь аддзас вир, Сійӧ мунас бокиті – оз лэдз бырӧдысьлы пырны тіян керкаясӧ да вины тіянӧс.

²⁴ Тайӧ тшӧктӧмыс мед лоӧ тіянлы да тіян пиянлы нэмъяс кежлӧ.

²⁵ Кор воанныд сійӧ муас, мый Господь Аслас кӧсйысьӧм серти сетас тіянлы, кутчысьӧй тайӧ тшӧктӧмас.

²⁶ И кор тіян челядьныд юаласны, мыйла ті тадзи вӧчанныд,

²⁷ вочавидзӧй налы: Господьлы тайӧ ыджыдлунся вись. Господь кор виаліс египетсаясӧс, Сійӧ муніс Израиль войтырлӧн керкаяс бокиті да ловйӧн колис миянлысь котыръясӧс». Тайӧс кылӧм бӧрын Израиль войтыр муӧдзыс копыртчӧмӧн юрбитіс Господьлы.

²⁸ Сэсся найӧ мунісны да вӧчисны ставсӧ сідзи, кыдзи Господь тшӧктіс Мӧисейлы да Ааронлы.

Дасӧд бырӧдантор: медводдза чужысьяс кулӧны

²⁹ Войшӧр кадӧ Господь виис медводдза чужысьясӧс Египет муысь – юралысь фараонлӧн медводдза чужысьсянь да дзескыдінын пукалысьлӧн медводдза чужысьӧдз ставныс кулісны. Весиг ыж-мӧслӧн став медводдза чужысьыс куліс.

³⁰ Войнас фараон садьмис, тшӧтш сылы кесъялысь йӧз да став египетса войтырыс садьмисны. Египетын [став му пасьталаыс] сулаліс ыджыд бӧрдӧм, ӧд эз вӧв керка, кӧні эськӧ эз вӧв кулӧмаыс.

³¹ Войнас фараон корис Мӧисейӧс Ааронкӧд да шуис налы: «Петӧй менам войтыр пӧвстысь ті да став Израиль войтырныд! Мунӧй, юрбитӧй Господьлы [асланыд Енлы], кыдзи ті и коринныд.

³² Босьтӧй аскӧдныд ыж-мӧснытӧ, кыдзи ті шулінныд. Мунӧй да бурсиӧй менӧ!»

³³ Египетсаяс тшӧктісны Израиль войтырлы ӧдйӧджык петны Египет муысь. Найӧ шуалісны, ставным пӧ ми кулам.

³⁴ Няньыс шоммытӧдз на израильсаяс гартыштісны нянь шомӧснысӧ паськӧмас да босьтісны пельпом выланыс.

³⁵ Мӧисейлӧн тшӧктӧм серти израильсаяс корисны египетсаяслысь паськӧм да эзысь-зарниысь вӧчӧм дозмук-кӧлуй.

³⁶ Господь небзьӧдіс египетсалысь сьӧлӧмсӧ Израиль войтыр дінӧ, и египетсаяс сетісны налы став корӧмторсӧ. Тадзи Израиль войтыр петкӧдіс египетсалысь озырлунсӧ.

Израиль войтыр петӧ Египетысь

³⁷ Израиль войтыр петіс Рамсесысь да мӧдӧдчис Суккотӧ. Аньясӧс да ныв-писӧ артавтӧг пода мортыс вӧлі квайтсё сюрс гӧгӧр.

³⁸ Накӧд тшӧтш муніс уна мукӧд войтыр. Мунісны унасьыс-уна ыж-мӧс.

³⁹ Египетысь петкӧдӧм кӧтасысь израильсаяс пӧжалісны шомтӧм нянь, ӧд сійӧ эз на удит шоммынысӧ, кор найӧс тэрмӧдлӧмӧн вӧтлісны Египет муысь. Найӧ эз слӧймыны весиг дасьтыны сёян, мед босьтны туяныс.

⁴⁰ Израиль пиян [да налӧн батьясныс] олісны Египетын [да Ханаан муын] нёльсё комын во чӧж.

⁴¹ Нёльсё комын во тыран лунӧ войнас Господьлӧн став войтырыс тышкайӧз моз петіс Египетысь.

⁴² Тайӧ войнас Господь петкӧдіс Египет муысь Израиль пиянӧс да видзис найӧс. Та вӧсна чужысьяссянь чужысьясӧдз израильсаяслы колӧ пасйыны тайӧ войсӧ да узьтӧг овны Господь водзын.

Ыджыдлунся баля йылысь тшӧктӧм

⁴³ Господь шуис Мӧисейлы да Ааронлы: «Ыджыдлунся баля йылысь тшӧктӧмыс татшӧм. Оз позь сёйны сійӧс йӧз муысь локтысьяслы.

⁴⁴ Но вермас сёйны эзысь вылӧ ньӧбӧм кесйӧг, вундыштчӧма кӧ сійӧ.

⁴⁵ Оз позь сёйны налы, кодъяс йӧз муысь локтісны тіян пӧвстӧ овны либӧ уджавны.

⁴⁶ Яйсӧ колӧ сёйны сійӧ керкаас, кӧні сійӧс дасьтӧма. Яйсӧ ортсӧ энӧ петкӧдӧй, [асылӧдзыс нинӧм энӧ кольӧй да] лысӧ энӧ чегъялӧй.

⁴⁷ Израиль войтырысь дзик быдӧнлы колӧ тайӧс вӧчны.

⁴⁸ Овмӧдчас кӧ тэ ордӧ йӧз муысь локтысь да кӧсъяс пасйыны Господьлы сиӧм Ыджыд лун, медводз сылӧн котырысь став айуловсӧ колӧ вундыштны. Сӧмын та бӧрын йӧз муысь локтысьыс вермас пасйыны Ыджыд лун, ӧд сійӧ лоӧ тіянлы ас морт кодь. Но вундыштчытӧм морт мед оз сёй ыджыдлунся баляӧс.

⁴⁹ Вужвойтырлы да йӧз муысь локтысьяслы индӧдыс ӧти».

⁵⁰ Израиль пиян вӧчисны ставсӧ сідзи, кыдзи Господь тшӧктіс Мӧисейлы да Ааронлы.

⁵¹ Дзик сійӧ лунӧ Господь петкӧдіс Египетысь Израиль пиянӧс тышкайӧзӧс моз.