Петӧм 10 - Коми Библия 2023

Кӧкъямысӧд бырӧдантор: саранча

¹ Господь шуис Мӧисейлы: «Мун фараон дінӧ. Ме чорзьӧді фараонлысь да сылӧн йӧзлысь сьӧлӧмнысӧ. Ме петкӧдла налы индысьпасъяс,

² медым аслад пияныдлы да налӧн пияныслы тэ висьталін, кутшӧм ногӧн Ме янӧді египетсаясӧс да кутшӧм индысьпасъяс петкӧдлі налы. Сэки ті тӧдмаланныд, мый Ме – Господь».

³ Мӧисей Ааронкӧд локтісны фараон дінӧ да шуисны сылы: «Господь, еврейяслӧн Ен, тадзи висьталӧ: ”Дыр-ӧ на тэ он раммӧдчы Ме водзын? Лэдз Менсьым войтырӧс, медым найӧ юрбитасны Меным.

⁴ А он кӧ лэдз Менсьым войтырӧс, аски [тайӧ кадас] тэнад му вылӧ Ме ыста саранча.

⁵ Найӧ вевттясны мутӧ, муыд весиг оз кут тыдавны. Шер бӧрся кольӧм веж быдмӧгтӧ да видз-му вывсьыд пуястӧ найӧ сёясны.

⁶ Тэнад керкаыд, тэныд кесъялысь йӧзлӧн да став войтырыдлӧн керкаясыс тырасны саранчаӧн. Мыйта ті оланныд тайӧ муас, ни ті, ни тіян батьясныд татшӧмторсӧ эз на аддзывны”». Сэсся Мӧисей бергӧдчис да петіс фараон дінысь.

⁷ Фараонлӧн йӧзыс шуисны сылы: «Дыр-ӧ на миянлы сьӧкыдавны тайӧ мортыс понда? Лэдз тайӧ войтырсӧ, мед мунасны да юрбитасны Господьлы, асланыс Енлы. Он ӧмӧй аддзы, мый Египетным быранвыйын?»

⁸ Мӧисейӧс да Ааронӧс вайӧдісны фараон дінӧ. Фараон шуис налы: «Мунӧй, юрбитӧй Господьлы, асланыд Енлы. Но кодъяс мунасны юрбитнысӧ?»

⁹ Мӧисей вочавидзис: «Ми мунам ставным, том и пӧрысь, ныв-пиным и ыж-мӧсным. Тайӧ ӧд Господьлы [миян Енлы] сиӧм гаж».

¹⁰ Фараон шуис налы: «Мед лоас тадзи. Господь тіянкӧд. Тіянӧс ме лэдза, но челядьнытӧ ог. Ті мӧвпаланныд лёк вӧчны.

¹¹ Сӧмын айуловныд мед мунасны да юрбитасны Господьлы, кыдзи ті и коринныд». Сэсся Мӧисейӧс да Ааронӧс вӧтлісны фараон дінысь.

¹² Господь шуис Мӧисейлы: «Лэпты китӧ Египет му вылӧ, мед саранча уськӧдчас Египет му вылӧ да сёяс сэтысь став быдмӧг-турунсӧ [да пу вылысь став тусь-вотӧссӧ] – ставсӧ, мый коли шер бӧрся».

¹³ Мӧисей лэптіс бедьсӧ Египет вылӧ, и Господь кыпӧдіс асыв тӧв. Тӧлыс шувгис лунтыр, шувгис войбыд, и мӧд асывнас вайис саранчаӧс.

¹⁴ Египет вылӧ уськӧдчис саранча да вевттис ставнас мусӧ. Та мындаыс некор на эз вӧвлы, и некор сэсся оз ло.

¹⁵ Муыс эз тыдав сьӧдысла, сэтшӧм уна вӧлі саранчаыс. Найӧ сёйисны му вылысь став быдмӧг-турунсӧ, пуяс вылысь став тусь-вотӧссӧ, мый кольлі шер бӧрся. Египет му пасьтала эз коль веж корйыс ни пу вылын, ни му вылын.

¹⁶ Мӧисейлы да Ааронлы тшӧктісны ӧдйӧджык локны фараон дінӧ. Сійӧ шуис налы: «Ме мыжа Господь Енныд водзын да тіян водзын.

¹⁷ Бара на прӧститӧй менсьым мыжӧс да кевмысьӧй Господьлы, асланыд Енлы, медым Сійӧ вештас ме дінысь тайӧ курыд шогсӧ».

¹⁸ Мӧисей петіс фараон дінысь да кевмысис Господьлы.

¹⁹ Рытыввывсянь Господь кыпӧдіс ён тӧвныр, и тӧлыс лэбӧдіс саранчаӧс Гӧрд саридзӧ. Египет му пасьтала весиг ӧти саранча эз коль.

²⁰ Но Господь чорзьӧдіс фараонлысь сьӧлӧмсӧ, и фараон эз лэдз Израиль пиянӧс.

Ӧкмысӧд бырӧдантор: пемыд

²¹ Господь шуис Мӧисейлы: «Лэпты китӧ енэжланьыс, и Египет му вылӧ лэччас сап пемыд, киӧн видлавны позяна пемыд».

²² Мӧисей лэптіс кисӧ енэжланьыс, и пуксис сап пемыд. Тадзи вӧлі куим лун чӧж Египет муын.

²³ Куим лун чӧж ӧта-мӧдсӧ некод эз аддзы, некод эз чеччы места вывсьыс. А Израиль войтырлӧн оланінас вӧлі югыд.

²⁴ Фараон корис Мӧисейӧс [Ааронкӧд] да шуис: «Мунӧй, юрбитӧй Господьлы [асланыд Енлы]. Челядьныд мед тіянкӧд мунасны, а ыж-мӧстӧ кольӧй».

²⁵ Но Мӧисей вочавидзис: «[Огӧ!] Тэныд колӧ лэдзны тшӧтш миянлысь ыж-мӧснымӧс, медым ми вермим вайны Господьлы, асланым Енлы, сотан висьяс да мукӧд висьяс.

²⁶ Миян ыж-мӧсным дзик ӧтитӧг мунасны миянкӧд. На пӧвстысь ми вись ваям Господьлы, асланым Енлы. Ӧд кытчӧдз ми огӧ воӧй колана местаӧдз, огӧ тӧдӧй, кутшӧм вись ковмас вайны Господьлы [миян Енлы]».

²⁷ Но Господь чорзьӧдіс фараонлысь сьӧлӧмсӧ, и фараон эз кӧсйы лэдзны Израиль войтырӧс.

²⁸ Фараон шуис Мӧисейлы: «Мун ме дінысь! Син водзӧ эн петкӧдчы. Тӧд, мый сійӧ лунӧ, кор локтан ме дінӧ, тэ кулан».

²⁹ Мӧисей шуис: «Кыдзи тэ шуин, сідзи и лоас. Тэнӧ ме сэсся ог нин аддзыв».