Петӧм 1 - Коми Библия 2023

Израильсаяс нартитӧм улынӧсь

¹ Со нимъясыс Израиль пиянлӧн, кодъяс асланыс котырнаныс да Яков батьныскӧд локтісны Египет муӧ. Тайӧ вӧліны:

² Рувим, Симеон, Левий, Иуда,

³ Иссакар, Завулон да Венямин,

⁴ Дан да Неффалим, Гад да Асир.

⁵ Яковсянь чужысьыс ставнас вӧлі сизимдас [вит] морт. Ӧсип сэки оліс нин Египетын.

⁶ Ӧсип куліс, вокъясыс кулісны, на кодь арлыдаыс некод эз коль.

⁷ Израиль войтырлӧн чужис зэв уна ныв-пи. Тадзи войтырыс ёна содіс да паськаліс став му пасьталаыс.

⁸ Египетын юралысьӧ пуксис выль ӧксы, коді Ӧсип йылысь нинӧм эз тӧд.

⁹ Аслас войтырлы ӧксы шуис: «Израиль войтыр миян дорысь лои уна лыда да ён.

¹⁰ Медым найӧ водзӧ оз рӧдмыны, колӧ миянлы мыйкӧ вӧчны. Ӧд пансяс кӧ тыш, найӧ вермасны ӧтувтчыны миян вӧрӧгкӧд, уськӧдчыны миян вылӧ да петны миян муысь».

¹¹ Египетсаяс сувтӧдісны израильсаяслӧн удж бӧрся видзӧдысьясӧс, медым сьӧкыд уджнас топӧдны найӧс. Израильсаяс лэптісны фараонлы Питом да Рамсес каръяс, медым сэні видзны нянь. [Лэптісны тшӧтш Он кар, мӧд ногӧн кӧ, Илиополь.]

¹² Кымын ёнджыка топӧдісны Израиль войтырӧс, сымын ёнджыка найӧ рӧдмисны-паськалісны. Египетсаясӧс таысь полӧм босьтіс,

¹³ и найӧ чорыдджыка на пондісны уджӧдны Израиль войтырӧс.

¹⁴ Курыд синва сора лои олӧмыс Израиль войтырлӧн. Найӧс ёна нартитісны, тшӧктісны вӧчны быдпӧлӧс сьӧкыд уджсӧ: талявны сёй, вӧчавны кирпич, уджавны видз-му вылын.

¹⁵ Еврейяслӧн гӧгиньяслы, кодъясӧс шуисны Шипра да Пуа, египетса ӧксы тшӧктіс:

¹⁶ «Кор кутанныд отсавны еврей аньяслы чужтыны, видзӧдӧй, коді чужас. Чужас кӧ пи, виӧй сійӧс, а ныв кӧ, ловйӧн кольӧй».

¹⁷ Гӧгиньяс полісны Енмысь, та вӧсна эз кутны кывзыны египетса ӧксыӧс, пи кагаясӧс найӧ ловйӧн кольлісны.

¹⁸ Египетса ӧксы корис гӧгиньясӧс да юаліс налысь: «Мыйла ті ловйӧн колянныд пи кагаяссӧ?»

¹⁹ Гӧгиньяс шуисны фараонлы: «Еврей аньяс абу египетса аньяс кодьӧсь. Найӧ ёнӧсь, миян локтӧдз каганысӧ чужтӧны нин».

²⁰ Енмыс бурӧн мынтысис гӧгиньяслы таысь. Войтырыс рӧдмис да вӧлі ён вына.

²¹ Сыысь, мый гӧгиньяс полісны Енмысь, Енмыс бурсиис найӧс челядьӧн.

²² Аслас войтырлы фараон тшӧктіс: «Еврейяслысь став пузчужӧм пи кагасӧ шыблалӧй Нил юӧ, а нывъяссӧ ловйӧн кольӧй».