Осий 8 - Коми Библия 2023

Израиль эновтӧ ассьыс Енсӧ да копрасьӧ идолъяслы

¹ – Матыст вом дорад буксантӧ! Лёкыс кутш моз гӧгралӧ Господьлӧн керка весьтын, ӧд Менам войтырӧй торкисны йитӧдӧс, мый Ме кӧрталі накӧд, кыпӧдчисны Менам Индӧдлы паныд.

² Найӧ горзӧны Меным: «Енмӧй, ми тӧдам Тэнӧ! Ми – Израиль войтыр».

³ Но Израиль ӧтдортіс бурсӧ, та вӧсна вӧрӧг вӧтлӧ сійӧс.

⁴ Метӧг найӧ асьныс пуктісны ӧксыясӧс, Менсьым юасьтӧг бӧрйисны юралысьясӧс. Асланыс эзысь-зарниысь найӧ вӧчисны бӧлбанъясӧс – тадзи вӧчӧмӧн найӧ бырӧдасны асьнысӧ.

⁵ Самария, тэнсьыд ӧштӧ вештӧма. Менам скӧрлунӧй ыпъялӧ Израиль вылӧ – дыр-ӧ на оз сӧстӧммыны найӧ пежсьыс?

⁶ Израиль вӧчис ӧшкӧс, дорччысь вӧчис бӧлбанӧс, но сійӧ абу Ен. Самариялысь ӧшсӧ лоӧ торпыригӧдз жуглӧма!

⁷ Найӧ кӧдзӧны тӧвныр, вундӧны бушков. Няньыс налӧн оз шептась, пызьыс налӧн оз ло. А шептасяс кӧ, няньсӧ мукӧдъяс сёясны.

⁸ Израильӧс ньылыштӧма! Войтыръяс пӧвстын ӧні сійӧ ковтӧм дозмук кодь.

⁹ Ӧткӧн шӧйтысь осёл моз Израиль войтыр муніс Ассурӧ. Ефрем ньӧбис аслыс мусукъясӧс.

¹⁰ Сійӧ ньӧбис муслунсӧ войтыръяслысь, но регыд Ме чукӧрта найӧс ставнысӧ. Найӧ пондасны сьӧкыдавны ассурса ӧксылӧн да юралысьяслӧн нартитӧмысь.

¹¹ Ефрем сувтӧдіс уна висьпуктанін, медым мыж вӧчны, та вӧсна сійӧ мыжмис.

¹² Ме гижи сылы унасьыс-уна тшӧктӧм, но сійӧ ковтӧмӧн лыддис найӧс.

¹³ Сійӧ висьяс вайӧ, сэсся яйсӧ сёйӧ, но Господьлы тайӧ висьясыс абу шогманаӧсь. Господь казьтыштас Ефремлысь лёк вӧчӧмсӧ да мыждас сійӧс мыжъяссьыс, сэки сылы бӧр ковмас мунны Египетӧ.

¹⁴ Израиль вунӧдіс ассьыс Вӧчысьсӧ, кыпӧдаліс юрбитанінъяс. Иуда лэптіс уна зумыд кар, но Ме ыста сылӧн каръяс вылӧ би, и биыс ньылыштас сылысь изкаръяссӧ.