Осий 7 - Коми Библия 2023

¹ Кор Ме бурдӧда Израильӧс, тыдовтчас Ефремлӧн мыжыс, мыччысясны Самариялӧн лёк уджъясыс, ӧд йӧзыс пӧръясьӧны, гусясьысьяс керкаяс куштӧны, туйяс вылын мырддялӧны.

² Найӧ оз вежӧртны, мый налысь лёк уджъяссӧ Ме тӧд вылын кута. Ӧні налӧн уджъясныс кытшалӧмаӧсь найӧс, налӧн лёк вӧчӧмныс Менам чужӧмбан водзын.

Ӧксыӧс мыждӧм

³ – Ӧксы нимкодясьӧ, мый йӧзыс лёксӧ вӧчӧны, юралысьяс нимкодясьӧны, мый йӧзыс пӧръясьӧны.

⁴ Ставныс найӧ гозъякост олӧм пежалысьяс, донӧдӧм пач кодьӧсь – пӧжасьысьлы няньлысь кыптӧмсӧ виччысигӧн ломтыны-донӧдны сійӧс оз нин ков.

⁵ Ӧксынымлӧн гажӧдчан лунӧ юралысьяс висьмытӧдзныс вина юӧны, ӧксы кисӧ нюжӧдӧ сылы паныд кыпӧдчысьяслань.

⁶ Ставныс найӧ ломтӧны сьӧлӧмнысӧ наянлуннас, и накӧд лоӧ пачкӧд моз: пӧжасьысь кӧть войсӧ узьӧ, асъядорыс пачыс ыпъялӧ ыджыд биӧн.

⁷ Ставныс найӧ донӧдӧм пач кодьӧсь, би моз найӧ ньылыштӧны юралысьяснысӧ. Налӧн ӧксыясыс усьӧны, но некод оз шыась Ме дінӧ.

Израиль оз виччысь отсӧгсӧ Господьсянь

⁸ – Ефрем сорласис мукӧд войтыръяскӧд. Сійӧ лои сотчӧм нянь кодь, кодӧс вунӧдісны бергӧдны.

⁹ Локтысьяс чурскисны сылысь вынсӧ, а сійӧ эз казявлы тайӧс. Юрсиыс сылӧн дзормис, а сійӧ оз и тӧд та йылысь.

¹⁰ Израильлӧн вылӧ кыпӧдчӧмыс ас вылас усьӧ, но сійӧ оз бергӧдчы Господь дінӧ, оз корсь ассьыс Енсӧ.

¹¹ Ефрем лои вежӧртӧм гулю кодь, нинӧм оз гӧгӧрво: отсӧг корӧ Египетлысь, мунӧ Ассурӧ.

¹² Муніганыс Ассьым тывйӧс Ме шыбита на вылӧ, кыя найӧс лэбачӧс моз. Ме мыжда найӧс, кыдзи вӧлі шуӧма налы чукӧртчӧм дырйиныс.

¹³ Курыд шог Израиль войтырлы, ӧд найӧ ылыстчисны Меысь! Найӧ бырасны, ӧд кыпӧдчисны Меным паныд! Ме кӧсйи мездыны найӧс, но найӧ ылӧгсӧ висьтавлісны Ме йылысь.

¹⁴ Ме дінӧ став сьӧлӧмнас шыасьӧм пыдди найӧ бӧрдісны асланыс вольпась вылын, нянь да вина понда найӧ вундалісны асьнысӧ, но Меысь ылыстчисны.

¹⁵ Ме быдті найӧс, ёнмӧді налысь кияссӧ, но найӧ водзӧ мӧвпалісны Меным паныд лёк вӧчны.

¹⁶ Найӧ оз кӧсйыны бергӧдчыны Медвылыссаыс дінӧ, найӧ лоины личалӧм ньӧввуж кодьӧсь. Налӧн юралысьясныс шыпурт помысь усясны, лёк кывныс вӧсна куласны, и Египет муын найӧс кутасны лёкӧдны.