Осий 14 - Коми Библия 2023

¹ Самарияӧс лоӧ мыждӧма, ӧд сійӧ кыпӧдчис аслас Енлы паныд. Сылӧн йӧзыс усясны шыпурт помысь, кагаяссӧ налысь виаласны, нӧбасьысьяслысь кынӧмсӧ вожӧдасны.

Израиль бӧр бергӧдчӧ Господь дінӧ

² – Израиль, бӧр бергӧдчы Господь дінӧ, аслад Ен дінӧ, ӧд тэ усин аслад мыжыд вӧсна.

³ Кевмысьӧмӧн бергӧдчӧй Господь дінӧ, шуӧй Сылы: прӧстит миянлысь мыжъяснымӧс да сибӧд миянлысь козиннымӧс, ӧш пыдди ми ваям Тэныд кевмысьӧмнымӧс.

⁴ Ассур миянӧс оз мезды, вӧвъяс вылӧ лачанымӧс огӧ нин кутӧй, киӧн вӧчӧмторъяснымӧс ми огӧ нин шуӧй асланым енмӧн, ӧд Тэ дінысь батьтӧмъяс аддзӧны буралӧмсӧ.

⁵ – Найӧ Менӧ эновтісны, но Ме бурдӧда найӧс таысь, Ме бара понда сьӧлӧмсянь радейтны найӧс, скӧрлунӧс Ме вешта на дінысь.

⁶ Ме лоа Израильлы лысваӧн, сійӧ пондас дзоридзавны лилия моз, ливанса пуяс моз пыдӧ лэдзас вужъяссӧ

⁷ и паськалас гӧгӧр. Сійӧ лоӧ олив пу кодь мича, ливанса вӧр моз пондас ӧвтны чӧскыд дукӧн.

⁸ Израиль войтыр бара овмӧдчас олив пуяслӧн вуджӧр улӧ, найӧ пондасны быдтыны нянь, кутасны дзоридзавны виноград моз, нимавны ливанса вина моз.

⁹ Ефрем, Менӧ-ӧ тэ ӧткодялан идолъяскӧд? Ме кыла тэнӧ да вочавидза тэныд, Ме тӧждыся тэ вӧсна. Ме лоа тэныд веж кипарисӧн, Месянь лоӧ тэнад вотӧсыд.

¹⁰ Коді мывкыдаыс, медым гӧгӧрвоны тайӧс? Коді вежӧраыс, медым тӧдмавны тайӧс? Господьлӧн туйясыс веськыдӧсь, сэті мунӧны веськыда олысьяс, а лёк вӧчысьяс крукасьӧны.