Осий 13 - Коми Библия 2023

Господь скӧралӧ Израиль вылӧ

¹ – Ефремлӧн сёрнитігӧн йӧзыс тіралісны. Израиль чужанкотыръяс пӧвстын сійӧ вӧлі медтӧдчана, но Ваал вӧсна сійӧ мыжмис да куліс.

² Водзӧ мыж вӧчӧ Ефрем, сывдӧ аслыс эзысь бӧлбанъясӧс, аслас мывкыд серти вӧчӧ идолъясӧс – ставыс тайӧ дорччысьлӧн удж. Вись вайысьяс йылысь шуалӧны, найӧ пӧ ӧшсӧ окалӧны.

³ Та вӧсна найӧ асъя ру кодьӧсь, ӧдйӧ бырысь лысва кодьӧсь, гумла вылын тӧвнырӧн нӧбӧдан кыд кодьӧсь, пачысь пуркйысь тшын кодьӧсь.

⁴ Но Ме, Господь, Египетысь петігад нин вӧлі тэнад Ен. Меысь ӧтдор мӧд енмыс тэнад абу, Меысь кындзи мӧд мездысьыс абу.

⁵ Ме тӧждыси тэ вӧсна овтӧминын, ватӧм муын.

⁶ Но кор тэнад вӧліны йирсянінъяс, тэ пӧттӧдз сёйлін. А кор пӧтлін, сьӧлӧмад ыкшаасин да вунӧдлін Менӧ.

⁷ Та вӧсна Ме лоа тэныд лев кодьӧн, туй дорын кыйӧдчысь леопард кодьӧн.

⁸ Пиянсӧ воштӧм ош моз Ме уськӧдча тэ вылӧ, косявла морӧс кудсьыд сьӧлӧмтӧ, лев моз сёя тэнӧ, звер моз чашъя тэнӧ.

⁹ Тэ ачыд асьтӧ бырӧдан, Израиль, ӧд тэ кыпӧдчин Меным паныд, тэныд отсӧг Сетысьлы паныд.

¹⁰ Кӧні ӧні тэнад ӧксыыд, коді мездас тэнӧ став тэнад каръясын? Кӧнӧсь тэнад юралысьясыд, кодъясӧс тэ корин Менсьым, шуин, сет пӧ миянлы ӧксыӧс да юралысьясӧс?

¹¹ Скӧрмӧмпырысь Ме сеті тэныд ӧксыӧс, лӧгалӧмпырысь бӧр босьті сійӧс.

¹² Ефремлысь лёк вӧчӧмсӧ гартыштӧма ёкмыльӧ, сылысь мыжсӧ видзӧны, оз вунӧдны.

¹³ Чужтан дойяс топӧдӧны сійӧс, но сійӧ вежӧртӧм кага кодь, кодлы воис кад чужны, но сійӧ оз пет.

¹⁴ Мезда-ӧ Ме сійӧс кулӧмыслӧн кабыр улысь, ньӧба-ӧ сійӧс кулӧмыслысь? Кулӧм, кӧні тэнад чушканыд? Кулӧм, кӧні тэнад вермӧмыд? Жалитӧмыс Менам оз ло.

¹⁵ Мед кӧ Ефрем аслас вокъяс пӧвстын вайӧ вотӧс, но петас асыв тӧв, овтӧминсянь пондас пӧльтны Господьлӧн тӧвнырыс, и Ефремлӧн юкмӧсыс кушмас, ва петаніныс косьмас. Сылысь озырлунсӧ петкӧдасны, став донаторсӧ мырддяласны.