Олӧм 8 - Коми Библия 2023

Ыджыд ойдӧмлӧн пом

¹ Ен эз вунӧд Нойӧс да сыкӧд ковчегын кывтысь мувыв пемӧсъясӧс [лэбачьясӧс да гаг-веглясьысьясӧс]. Ен тшӧктіс кыпӧдчыны му вылын тӧвлы, и ваыс сувтіс.

² Тупкысисны йирлӧн ва петанінъяс, пӧдласисны енэжвыв ӧшиньяс, и дугдіс зэрны.

³ Сё ветымын лун мысти ваыс вочасӧн кутіс ямны.

⁴ Сизимӧд тӧлысьлӧн дас сизимӧд лунӧ ковчег сувтіс Арарат керӧсъясӧ.

⁵ Ваыс чиніс и чиніс. Дасӧд тӧлысьлӧн медводдза лунӧ мыччысисны керӧс йывъяс.

⁶ Нелямын лун мысти Ной восьтіс ковчеглысь ӧшинь розьсӧ

⁷ да лэдзис кырнышӧс [мед тӧдмавны, ямис эз ваыс]. Быд пӧрйӧ лэбалӧм бӧрас кырныш бӧр волывліс ковчегӧ, кытчӧдз муыс эз косьмы.

⁸ Бӧрынджык Ной лэдзис гулюӧс, мед тӧдмавны, тыдовтчис эз муыс.

⁹ Но гулю эз аддзы аслыс пуксянінсӧ да бӧр локтіс Ной дінӧ ковчегӧ, ӧд муыс вӧлі ставнас ва улын на. Ной нюжӧдіс кисӧ да пыртіс гулюӧс ковчегӧ.

¹⁰ Сизим лун мысти бара лэдзис гулюӧс ковчегысь.

¹¹ Рытнас гулю бӧр локтіс, и вомас сылӧн вӧлі веж олив кор. Тадзи Ной тӧдмаліс, мый ваыс ямӧма му вылын.

¹² Сизим лун бӧрын Ной бара лэдзис гулюӧс, и сійӧ бӧрсӧ эз нин лок.

¹³ Кор Нойлы вӧлі квайтсё ӧти арӧс, тайӧ воас медводдза тӧлысьлӧн медводдза лунӧ муыс эз нин вӧв ва улын. Ной восьтіс ковчег вевтсӧ да аддзис, мый му веркӧсыс кос.

¹⁴ Мӧд тӧлысьлӧн кызь сизимӧд лунӧ муыс вӧлі дзикӧдз косьмӧма.

¹⁵ [Господь] Ен шуис Нойлы:

¹⁶ «Пет ковчегсьыс гӧтырыдкӧд, пияныдкӧд да моньясыдкӧд.

¹⁷ Петкӧд аскӧдыд став пемӧссӧ, кодъяс тэкӧд, быд ловъя олысьсӧ – лэбачьясӧс, ыж-мӧскӧс, мувыв гаг-веглясьысьясӧс. Мед найӧ чужтысясны-рӧдмасны да паськӧдчасны му вылын».

¹⁸ Ной петіс ковчегысь пияныскӧд, гӧтырыскӧд да моньясыскӧд.

¹⁹ Быдсикас пемӧсыс, лэбачыс, да гаг-веглясьысьыс – мувывса став ловъя олысьыс сьӧрсьӧн-бӧрсьӧн петісны ковчегысь.

²⁰ Ной вӧчис Господьлы висьпуктанін. Босьтіс сӧстӧм пемӧсъясӧс да сӧстӧм лэбачьясӧс да висьпуктанін вылын вайис найӧс сотан вись пыдди.

²¹ Висьпуктанінсянь чӧскыд ӧвтӧмнас лолалігӧн Господь [Ен] шуис Аслыс: «Ог кут сэсся ёрны мусӧ морт вӧсна. Мортлӧн мӧвпъясыс томсяньыс тырӧмаӧсь лёкнас, но водзӧ Ме ог кут бырӧдны став ловъя олысьсӧ, кыдзи Ме вӧчи.

²² Кытчӧдз кутас сулавны муыс, лоӧ кӧдзӧм да вундӧм, кӧдзыд да шоныд, гожӧм да тӧв, лун да вой».