Олӧм 7 - Коми Библия 2023

Ыджыд ойдӧм

¹ Господь [Ен] шуис Нойлы: «Пыр аслад котырыдкӧд ковчегӧ, ӧд Ме аддзи, мый ӧнія олысьяс пӧвстысь тэ ӧтнад олан веськыда Ме водзын.

² Босьт ставсикас сӧстӧм пемӧссӧ сизим гозйӧн, айӧс да эньӧс, а пеж пемӧссӧ – ӧти гозйӧн, айӧс да эньӧс.

³ Енэжвыв [сӧстӧм] лэбачсӧ босьт тшӧтш сизим гозйӧн, айӧс да эньӧс, [пеж лэбачсӧ – ӧти гозйӧн, айӧс да эньӧс]. Тадзи пемӧс-лэбачыс оз бырны му вылысь.

⁴ Сизим лун мысти нелямын лун да вой Ме кута кисьтны му вылӧ зэр. Тадзи бырӧда му вылысь Меӧн вӧчӧм став ловъя олысьсӧ».

⁵ Ной вӧчис ставсӧ, мый Господь [Ен] тшӧктіс сылы.

⁶ Нойлы вӧлі квайтсё арӧс, кор муыс ойдіс.

⁷ Гӧтырыскӧд, пияныскӧд да моньясыскӧд Ной пырис ковчегӧ, медым дзебсьыны ойдан ваысь.

⁸ [Сӧстӧм да пеж лэбачысь,] сӧстӧм да пеж пемӧсысь, став веглясьысьысь

⁹ гозйӧн, ай да энь, пырисны Ной дінӧ ковчегӧ, кыдзи Ен тшӧктіс Нойлы.

¹⁰ Сизим лун мысти муыс кутіс ойдыны.

¹¹ Кор Нойлы вӧлі квайтсё арӧс, во заводитчӧмсянь мӧд тӧлысьлӧн дас сизимӧд лунӧ воссисны пыдӧстӧм йирлӧн ва петанінъяс да енэжвыв ӧшиньяс.

¹² Нелямын лун да нелямын вой му вылӧ киссис зэр.

¹³ Сійӧ лунӧ, кор кутіс ойдӧмӧн ойдыны, Ной пырис ковчегӧ аслас Сим, Хам да Яфет пияныскӧд, гӧтырыскӧд да куимнан моньыскӧд.

¹⁴ Накӧд пырис быдсикас мувыв пемӧсыс да гаг-веглясьысьыс, тшӧтш быдсикас лэбачыс да мукӧд бордаыс.

¹⁵ Ной дінӧ ковчегӧ став ловъя олысьыс пырисны гозйӧн,

¹⁶ ай да энь, кыдзи Енмыс сылы тшӧктіс. Нойлӧн пырӧм бӧрти Господь [Ен] тупкис ковчег ӧдзӧссӧ.

¹⁷ Нелямын лун [да вой] чӧж ваыс ӧтарӧ содіс да кыпӧдіс ковчегсӧ му вылысь.

¹⁸ Ковчег кывтіс ва вывті, а ваыс му вылын содӧмӧн содіс.

¹⁹ Ваыс сэтшӧма туис, мый весиг джуджыд керӧсъяс веськалісны ва улӧ.

²⁰ Дас вит гырддза судта вӧлі ваыс джуджыд керӧсъяс весьтын.

²¹ Му вылӧ эз коль ни ӧти ловъя олысь. Бырисны лэбачьяс, мувыв пемӧсъяс да гаг-веглясьысьяс. Бырис тшӧтш став йӧзыс.

²² Му вылын став лолалысьыс куліс.

²³ Йӧзӧс, пемӧсъясӧс, гаг-веглясьысьясӧс да енэжвыв лэбачьясӧс – став ловъя олысьсӧ лои бырӧдӧма му вылысь. Ловйӧн колины сӧмын Ной да найӧ, кодъяс пырисны сыкӧд ковчегӧ.

²⁴ Сё ветымын лун чӧж ваыс содіс му вылын.