Олӧм 6 - Коми Библия 2023

Пежыс содӧ му вылын

¹ Кор йӧзыс содісны му вылын да налӧн чужисны нывъяс,

² сэки Ен пиян аддзисны, мый нывъяс мичаӧсь, да бӧрйысьӧмӧн кутісны босьтны найӧс гӧтырӧ.

³ Господь [Ен] шуис: «Менам лолалӧмӧй морт пытшкын оз пыр ло, ӧд мортыс сӧмын вир-яй. Сылӧн олан кадыс мед лоӧ сё кызь во».

⁴ Сійӧ кадас да бӧрынджык му вылын олісны ыджыд тушаа йӧз. Найӧс чужтылісны мувывса йӧзлӧн нывъяс Ен пиянлы. Тайӧ йӧзыс вӧліны ёнӧсь да нималанаӧсь.

⁵ Кор Господь [Ен] аддзис, мый мувывса йӧзлӧн олӧмыс тшыкӧма, и мый налӧн мӧвпъясыс да сьӧлӧм кӧсйӧмъясыс пыр лёкӧсь,

⁶ сэки жалитіс, мый вӧчис мортӧс му вылын. Господьлӧн сьӧлӧмыс ёна шогсис.

⁷ И шуис Господь: «Бырӧда му вылысь мортӧс, кодӧс Ме вӧчи. Бырӧда йӧзӧс и ыж-мӧскӧс, гаг-веглясьысьясӧс и енэжвыв лэбачьясӧс. Бурджык, эг кӧ вӧчлы найӧс».

⁸ Господьлы шогманаӧн вӧлі сӧмын Ной.

Ной вӧчӧ ковчег

⁹ Ной да сысянь чужысьяс йылысь. Сійӧ кадас сӧмын Ной оліс веськыда да кывзысис Енлысь. Сійӧ вӧлі сӧстӧм сьӧлӧма морт.

¹⁰ Сылӧн чужис куим пи: Сим, Хам да Яфет.

¹¹ Енлӧн син водзын вӧлі тшыкӧма му вылас олӧмыс, муыс вӧлі тырӧма виалӧм-дзескӧдӧмӧн.

¹² [Господь] Ен видзӧдліс му вылӧ да аддзис, мый муыс тшыкӧма, быдӧн пежалӧма ассьыс олӧмсӧ.

¹³ [Господь] Ен шуис Нойлы: «Ме бырӧда став йӧзсӧ, ӧд муыс на вӧсна тырӧма виалӧм-дзескӧдӧмӧн. Ме дзикӧдз бырӧда найӧс му вылысь.

¹⁴ Тэ вӧч аслыд гофер пуысь ковчег, сэні вӧч жыръяс да сирав ковчегсӧ пытшкӧссяньыс и ортсысяньыс.

¹⁵ Кузьтанас ковчегыс мед лоас куимсё гырддза, пасьтанас – ветымын гырддза, а джуджданас – комын гырддза.

¹⁶ Стенмас, дзик выліас, вӧч гырддза пасьта розь, бокас – ӧдзӧс. Вӧч улыс, мӧд да коймӧд судтаяс.

¹⁷ Ме ойдӧда мусӧ, тадзи бырӧда енэж улысь став ловъя олысьсӧ. Му вылын ставыс кулас.

¹⁸ Но тэкӧд Ме кӧртала йитӧд. Тэныд да пияныдлы, гӧтырыдлы да моньясыдлы колӧ пырны ковчегӧ.

¹⁹ Пырт ковчегӧ быд пемӧсысь гозйӧн, айӧс да эньӧс. Найӧ мед тэкӧд тшӧтш ловйӧн колясны.

²⁰ Быдсикас лэбач, ыж-мӧс да гаг-веглясьысь аслас пӧлыскӧд мед пырасны сэтчӧ. Тадзи найӧ тшӧтш ловйӧн колясны.

²¹ Аслыд да пемӧсъяслы босьт быдпӧлӧс сёянсӧ, мед вӧлі мый сёйны».

²² Ной вӧчис ставсӧ сідзи, кыдзи тшӧктіс сылы [Господь] Ен.