Олӧм 5 - Коми Библия 2023

Адамсянь Нойӧдз чужысьяс

¹ Адамсянь чужысьяс йылысь. Ен вӧчис мортӧс Ас кодьнас.

² Аймортӧс да аньӧс вӧчис, бурсиис найӧс да шуис мортӧн.

³ Адамлы вӧлі сё комын арӧс, кор сылӧн чужис сы кодь пи. Адам пуктіс сылы Сиф ним.

⁴ Сиф чужӧмсянь Адам оліс кӧкъямыссё во. Сылӧн чужисны на пиян да нывъяс.

⁵ Адам оліс ӧкмыссё комын арӧсӧдз, сэсся куліс.

⁶ Сифлы вӧлі сё вит арӧс, кор сылӧн чужис Енос.

⁷ Енос чужӧмсянь Сиф оліс кӧкъямыссё сизим во. Сылӧн чужисны на пиян да нывъяс.

⁸ Сиф оліс ӧкмыссё дас кык арӧсӧдз, сэсся куліс.

⁹ Енослы вӧлі [сё] ӧкмысдас арӧс, кор сылӧн чужис Кенан.

¹⁰ Кенан чужӧмсянь Енос оліс кӧкъямыссё дас вит во. Сылӧн чужисны на пиян да нывъяс.

¹¹ Став олан лунъясыс Енослӧн лои ӧкмыссё вит во, сэсся сійӧ куліс.

¹² Кенанлы вӧлі [сё] сизимдас арӧс, кор сылӧн чужис Махалалел.

¹³ Махалалел чужӧмсянь Кенан оліс кӧкъямыссё нелямын во. Сылӧн чужисны на пиян да нывъяс.

¹⁴ Кенан оліс ӧкмыссё дас арӧсӧдз, сэсся куліс.

¹⁵ Махалалеллы вӧлі [сё] квайтымын вит арӧс, кор сылӧн чужис Яред.

¹⁶ Яред чужӧмсянь Махалалел оліс кӧкъямыссё комын во. Сылӧн чужисны на пиян да нывъяс.

¹⁷ Махалалел оліс кӧкъямыссё ӧкмысдас вит арӧсӧдз, сэсся куліс.

¹⁸ Яредлы вӧлі сё квайтымын кык арӧс, кор сылӧн чужис Енок.

¹⁹ Енок чужӧмсянь Яред оліс кӧкъямыссё во. Сылӧн чужисны на пиян да нывъяс.

²⁰ Яред оліс ӧкмыссё квайтымын кык арӧсӧдз, сэсся куліс.

²¹ Еноклы вӧлі [сё] квайтымын вит арӧс, кор сылӧн чужис Метушал.

²² Метушал чужӧмсянь Енок оліс Ен водзын куимсё во. Сылӧн чужисны на пиян да нывъяс.

²³ Енок оліс куимсё квайтымын вит арӧсӧдз.

²⁴ Енок кывзысис Енлысь став олӧм чӧжыс. Сэсся сійӧ эз ло, ӧд Енмыс босьтіс сійӧс Ас дінас.

²⁵ Метушаллы вӧлі сё кӧкъямысдас сизим арӧс, кор сылӧн чужис Ламек.

²⁶ Ламек чужӧмсянь Метушал оліс сизимсё кӧкъямысдас кык во. Сылӧн чужисны на пиян да нывъяс.

²⁷ Метушал оліс ӧкмыссё квайтымын ӧкмыс арӧсӧдз, сэсся куліс.

²⁸ Ламеклы вӧлі сё кӧкъямысдас кык арӧс, кор сылӧн чужис пи.

²⁹ Сійӧ пуктіс пиыслы Ной ним шуалӧмӧн: «Сійӧ бурӧдас миянӧс, кор ми шогпырысь кутам вӧдитны Господьӧн ёрӧм му».

³⁰ Ной чужӧмсянь Ламек оліс витсё ӧкмысдас вит во. Сылӧн чужисны на пиян да нывъяс.

³¹ Ламек оліс сизимсё сизимдас сизим арӧсӧдз, сэсся куліс.

³² Нойлы вӧлі витсё арӧс, кор сылӧн чужисны Сим, Хам да Яфет пиян.