Олӧм 49 - Коми Библия 2023

Яков бурсиӧ ассьыс пиянсӧ

¹ Яков корис ассьыс пиянсӧ да шуис: – Чукӧртчӧй, ме висьтала, мый виччысьӧ тіянӧс быдӧнӧс.

² Яковлӧн пиян, локтӧй да кывзӧй, Израиль батьнытӧ кывзӧй.

³ Рувим, менам медводдза чужысьӧй, тэ – менам ёнлунӧй, менам вынлӧн медводдза вотӧс. Тэнӧ медвылӧ кыпӧдӧма, тэныд медуна вынйӧрсӧ сетӧма.

⁴ Тэ бузгысь ва кодь, тэ медводдза чужысьлысь нимтӧ воштін, ӧд тэ батьыд вольпасьӧ водін, менсьым вольпасьӧс пежалін.

⁵ Симеон да Левий – вокъяс, налӧн шыпуртыс виалӧ-дойдалӧ.

⁶ Менам сьӧлӧмӧй оз йитчы накӧд, ог кӧсйы лоны налӧн чукӧрас, ӧд скӧрйывсьыс найӧ виисны мортӧс, тешитчигмоз вундалісны ӧшлысь сӧнъяссӧ.

⁷ Ёрӧма налысь скӧрлунсӧ, ӧд сійӧ вывті чорыд, ёрӧма налысь ярлунсӧ, ӧд сійӧ звер кодь лёк. Яков пиян пӧвстӧ найӧс шыблала, Израиль чужанкотыръясӧ разӧда.

⁸ Иуда, тэнӧ ошкасны вокъясыд, тэныд копыртчасны батьыдлӧн пияныс, ӧд тэнад киыд вӧрӧгыдлӧн сьылідзир вылас.

⁹ Иуда, тэ – том лев, пиӧй, тэ – кыйсьӧм бӧрын кыпӧдчысь лев, тэ лев моз водан да куйлан. Коді лысьтас садьмӧдны тэнӧ?

¹⁰ Иуда киын пыр лоӧ юралан беддьыс, сылӧн кок бердын – ыджыдалан беддьыс, кытчӧдз оз лок Бурӧдысь, кодлысь кывзысьӧны войтыръяс.

¹¹ Виноград бердӧ сійӧ кӧрталӧ ассьыс том осёлсӧ, медбур виноград вожйӧ – осёл чаньсӧ. Винаын мыськалӧ ассьыс кӧлуйсӧ, виноград розъяслӧн вирнас – паськӧмсӧ.

¹² Синмыс югъялӧ винаысь, пиньясыс йӧлысь на еджыдӧсь.

¹³ Завулон кутас овны саридз бокын, корабльяса ӧзын дорын, сійӧ паськӧдчас Сидонӧдз.

¹⁴ Иссакар – крепыд осёл, нӧбъяс бокын куйлӧ.

¹⁵ Сійӧ казяліс, мый шойччаніныс бур, мый муыс лӧсьыд. Та вӧсна лӧсьӧдіс пельпомсӧ нӧбъяс новлӧдлыны, кутіс уджавны кесйӧг моз.

¹⁶ Дан лоас ёрдысьӧн аслас войтырлы, израильса чужанкотыръяс пӧвстын ӧтиӧн.

¹⁷ Сійӧ лоӧ туйбокса змейӧн, туйвывса аспидӧн, коді чушкӧ вӧлӧс кокас, и верзьӧма гатш усьӧ му вылас.

¹⁸ Господьӧй, мезды, ме виччыся отсӧг Тэсянь!

¹⁹ Гад вылӧ уськӧдчасны мырддялысь-пазӧдысьяс, но сійӧ вӧтӧдас найӧс, тувччас налы коклябӧрас.

²⁰ Асирлӧн няньыс лоӧ вывті пӧтӧса, ӧксылы кодь сёянӧн кутас йӧзӧс вердны.

²¹ Неффалим – ыджыд пу, мича вожъясӧн паськӧдчӧма.

²² Ӧсип – ю весьтын быдмысь вотӧса пулӧн вож, быдмӧ-кыпӧдчӧ стен пӧлӧн.

²³ Лӧгалісны сы вылӧ лыйсьысьяс, дзескӧдісны, лыйлісны сійӧс,

²⁴ но ньӧввужйыс сылӧн эз личавлы, ки сӧнъясыс колины крепыдӧсь, ӧд сылы отсаліс Яковлӧн вына Ен, сійӧс Видзысьыс, Израильлӧн зумыд Изйыс.

²⁵ Сійӧ – батьыдлӧн Ен, коді отсалас тэныд, Сійӧ – Ставсӧвермысь, коді бурсиас тэнӧ. Бурсиас енэжвывса бурсиӧмӧн, мупыдӧсса бурсиӧмӧн, морӧс йӧв да мам кынӧм бурсиӧмӧн,

²⁶ батьыдлӧн бурсиӧмӧн. Тайӧ нэмӧвӧйся изъяслӧн бурсиӧмысь вынаджык, нэмӧвӧйся керӧсъяслӧн лышкыдлунысь бурджык. Став тайӧ бурсиӧмыс мед вевттяс Ӧсипӧс, ӧд сійӧс бӧрйӧма вокъяс пӧвстысь.

²⁷ Венямин – горш кӧин, асывнас кутас сёйны шедӧдӧмторсӧ, рытнас – юклыны кыйӧмторсӧ.

²⁸ Тайӧ – Израильлӧн дас кыкнан чужанкотырыс. Пиянсӧ бурсиигас батьныс висьталіс ставсӧ тайӧс. Сійӧ быдӧнӧс бурсиис торйӧн.

Яковлӧн кулӧм

²⁹ Яков шуис пияныслы: «Ме вуджа аслам батьяс дінӧ. Дзебӧй менӧ накӧд орччӧн кырта горсйӧ, мый хеттей Ефронлӧн му вылас.

³⁰ Тайӧ горсйыс Ханаан муын, Макпела му вылын Мамре дорын. Хеттей Ефронлысь тайӧ мусӧ ньӧбис Ӧвраам, медым сэтчӧ дзебны кулӧмаясӧс.

³¹ Сэтчӧ дзебӧма Ӧвраамӧс да сылысь Сарра гӧтырсӧ, дзебӧма Исаакӧс да сылысь Ревекка гӧтырсӧ. Сэтчӧ ме дзеби Лияӧс.

³² Тайӧ мусӧ да сэтчӧс кырта горссӧ ньӧбӧма хеттейяслысь».

³³ Пияныслы тайӧс висьталӧм бӧрын Яков водіс вольпасяс да куліс – вуджис батьясыс дінӧ.