Олӧм 48 - Коми Библия 2023

Манассейӧс да Ефремӧс бурсиӧм

¹ Кад мысти Ӧсип тӧдмаліс батьыслӧн висьмӧм йылысь. Сійӧ босьтіс аскӧдыс Манассей да Ефрем пиянсӧ [да муніс Яков дінӧ].

² Яковлы висьталісны, Ӧсип пиыд пӧ локтӧ тэ дорӧ. Израиль чукӧртіс став вынсӧ да пуксис вольпась вылас.

³ Яков шуис Ӧсиплы: «Ставсӧвермысь Ен петкӧдчис меным Ханаанса Лузын да бурсиис менӧ.

⁴ Сійӧ шуис: ”Ме сета тэныд уна чужысьӧс. Тэ лоан войтыръяслы батьӧн. Тэсянь чужысьяслы Ме сета тайӧ мусӧ нэмъяс кежлӧ”.

⁵ Тэнад кыкнан пиыд, Ефремыд да Манассейыд, кодъяс чужисны Египетын менам тэ дорӧ локтӧдз, Рувим да Симеон моз лоӧны менам пиянӧн.

⁶ Тэнад пияныдлы, кодъяс чужасны на, Ефрем да Манассей вокъяс ним улын му пайыс вичмас.

⁷ Месопотамияысь мунӧм бӧрын Епрафаӧ вотӧдз Ракельӧй [тэнад мамыд] куліс Ханаан муын. Сэні ме дзеби сійӧс туй бокас». Епрафаӧс ӧні нимтӧны Виплиемӧн.

⁸ Ӧсиплӧн пиян вылӧ видзӧдігӧн Израиль юаліс: «Кодъяс найӧ?»

⁹ Ӧсип вочавидзис: «Тайӧ менам пиянӧй, кодъясӧс Ен сетіс тані». Яков шуис: «Вайӧд, ме бурсиа найӧс».

¹⁰ Пӧрысьлун вӧснаыс Израиль эз бура аддзы. Ӧсип вайӧдіс пиянсӧ батьыс дінӧ. Израиль окаліс, кутліс найӧс

¹¹ да шуис: «Эг нин чайт ме тэнӧ аддзывны, Ӧсипӧй, но Енмыс и пиянтӧ на петкӧдліс».

¹² Ӧсип вештіс найӧс батьыслӧн пидзӧс дорысь да копыртчыліс батьыслы муӧдзыс.

¹³ Сэсся Ӧсип кыкнан писӧ матыстӧдіс батьыс дорӧ, Ефремӧс веськыд кинас – Израильлы шуйгаладорас, а Манассейӧс шуйга кинас – Израильлы веськыдладорас.

¹⁴ Но Израиль нюжӧдіс веськыд кисӧ да пуктіс Ефремлы, ичӧтджыкыслы, юр вылас, а шуйга кисӧ пуктіс Манассейлы, медводдза чужысьыслы, юр вылас. Сійӧ тӧдӧмӧн тадзи вӧчис.

¹⁵ Сэсся бурсиис Ӧсипӧс да шуис: – Енмыс, кодлысь кывзысисны менам Ӧвраам да Исаак батьясӧй, чужӧмсянь да ӧнӧдз видзис менӧ.

¹⁶ Андел, коді мездіс менӧ быдпӧлӧс лёкысь, мед бурсиас тайӧ зонъяссӧ. На пыр мед нималас менам нимӧй, тшӧтш Ӧвраам да Исаак батьяслӧн нимъясыс. Насянь мед уна чужысь лоас му вылын.

¹⁷ Ӧсип аддзис, кыдзи батьыс веськыд кисӧ пуктіс Ефремлы юр вылас, да жугыльтчис. Сійӧ босьтіс батьыслысь кисӧ Ефрем юр вылысь да кӧсйис пуктыны Манассейлы юр вылас.

¹⁸ Ӧсип шуис батьыслы: «Абу тадзи, батьӧй. Со этайӧ медводдза чужысьыс. Сы вылӧ пукты китӧ».

¹⁹ Но батьыс шуис сылы паныд: «Тӧда, пиӧй, тӧда. Сысянь тшӧтш чужас войтыр, и сійӧ лоас ыджыдӧн. Но ичӧтджык вокыс лоас ыджыдджык, и сысянь чужас унасьыс-уна войтыр».

²⁰ Сійӧ лунӧ Яков бурсиис найӧс тадзи: «Тіян нимъясӧн Израиль войтыр кутас ӧта-мӧдсӧ бурсины. Найӧ шуасны: ”Ефремлы да Манассейлы моз мед Енмыс вӧчас тэныд”». Тадзи Ефремӧс кыпӧдіс Манассейысь вылӧджык.

²¹ Израиль шуис Ӧсиплы: «Ме регыд кула, но Енмыс лоӧ тіянкӧд. Сійӧ бӧр вайӧдас тіянӧс батьясныдлӧн муӧ.

²² Вокъясыдлы дорысь ме тэныд унджык сета – аслам шыпуртӧн да ньӧввужйӧн аморейяслысь босьтӧм му».