Олӧм 47 - Коми Библия 2023

¹ Ӧсип локтіс да юӧртіс фараонлы: «Батьӧй вокъяскӧд ӧні Гошен муынӧсь. Найӧ асланыс ыжъяснас, мӧсъяснас да став эмбурнас локтісны Ханаан муысь».

² Ӧсип вайӧдіс фараон водзӧ вокъяс пӧвстысь витӧс.

³ Фараон юаліс: «Кутшӧм удж ті вӧчанныд?» Найӧ вочавидзисны: «Ми, тэнад кесйӧгъяс, батьясным моз ыж видзысьяс.

⁴ Ми локтім овны тайӧ муас, ӧд ыж-мӧснымлы йирсяніныс эз ло. Ханаан муын ёна тшыгъялӧны. Лэдз миянлы овмӧдчыны Гошен муӧ».

⁵ Фараон шуис Ӧсиплы: «Тэнад батьыд да вокъясыд локтісны тэ дінӧ.

⁶ Египет муыс ставнас тэ водзын, медбур местаас овмӧд батьтӧ да вокъястӧ. Мед оласны Гошен муын. И сюрас кӧ на пӧвстысь тӧлка йӧз, пукты найӧс веськӧдлыны менам ыж-мӧс видзысьясӧн».

⁷ Ӧсип вайӧдіс Яков батьсӧ фараон водзӧ, и Яков бурсиис фараонӧс.

⁸ Фараон юаліс Яковлысь: «Кымын арӧс тэныд?»

⁹ Яков вочавидзис: «Сё комын во ме ола-ветлӧдла му вылас. Тайӧ абу на дыр. Менам батьяс дырджык на олісны. А менам олан лунъясӧй дженьыдӧсь да шогӧн тырӧмаӧсь».

¹⁰ Фараонӧс бурсиӧм бӧрын Яков петіс сы дінысь.

¹¹ Фараонлӧн тшӧктӧм серти Ӧсип овмӧдіс ассьыс батьсӧ да вокъяссӧ Египетӧ, сетіс налы медбур мусӧ, Рамсес му.

¹² Ӧсип могмӧдіс няньӧн ассьыс батьсӧ, вокъяссӧ да налысь котыръяссӧ. Быд котырлы няньсӧ сетіс челядь лыд серти.

Египет муын тшыгъялӧм

¹³ Быдлаын ёна тшыгъялісны, ӧд му вылын эз вӧв няньыс. Египет да Ханаан муясын тшыгъялӧмыс уськӧдіс йӧзсӧ кок йывсьыныс.

¹⁴ Нянь вузалӧм помысь Ӧсип чукӧртіс став эзысьсӧ Египет да Ханаан муясысь фараонлӧн керкаӧ.

¹⁵ Египет да Ханаан муясысь эзысьыс быри. Египетсаяс локтісны Ӧсип дорӧ да шуисны: «Эзысьным миян абу, но сет миянлы нянь! Эн лэдз миянлы кувнысӧ».

¹⁶ Ӧсип шуис: «Эзысьныд кӧ тіян быри, вайӧй меным ыж-мӧснытӧ, и ме сета тіянлы нянь».

¹⁷ И найӧ вайисны ыж-мӧснысӧ Ӧсиплы. Вӧвъяс, ыжъяс, мӧсъяс да осёлъяс тшӧт весьтӧ Ӧсип сеталіс налы нянь. Во чӧж вердіс найӧс.

¹⁸ Но тайӧ воыс коли, и египетсаяс бара локтісны Ӧсип дорӧ да шуисны: «Ыджыдӧй, огӧ дзебӧй тэысь, мый эзысьным миян абу, и став ыж-мӧснымӧс ми тэныд вайим. Миян нинӧм эз коль тэныд сетнысӧ асланым олӧм да муяс кындзи.

¹⁹ Мыйла миянлы кувнысӧ тэнад син водзын? Мыйла миян муяслы эндынысӧ? Ньӧб миянӧс да миянлысь муяснымӧс, а та пыдди сет миянлы нянь. Асланым муяснаным ми лоам кесйӧг туйынӧсь фараонлы. А тэ сет миянлы кӧйдыс, медым ми ловйӧн колим да эгӧ кулӧй, и медым муясным эз эндыны».

²⁰ Ӧсип ньӧбис фараонлы Египетысь став мусӧ. Ӧд египетсаяс ставныс ӧтитӧг вузалісны ассьыныс муяснысӧ, медым венны тшыгъялӧм. Тадзи став муыс вуджис фараон киӧ.

²¹ Став Египет му пасьтала войтырыс лоины кесйӧг туйынӧсь.

²² Сӧмын попъяслысь мусӧ Ӧсип эз ньӧб, ӧд налы фараон мынтіс удждон, и та помысь найӧ вермисны овны-пӧткӧдчыны. Та вӧсна налы эз ковмы вузавны ассьыныс муяснысӧ.

²³ Ӧсип шуис египетсаяслы: «Ӧні ме ньӧби тіянӧс да тіянлысь муяснытӧ фараонлы. Ме сета тіянлы кӧйдыс, а ті кӧдзӧй муяснытӧ.

²⁴ Но кор кутанныд вундыны, витӧд пайсӧ вайӧй фараонлы. Витсьыс нёльсӧ кольӧй кӧйдыс вылӧ и челядьныдкӧд да гортсаясныдкӧд сёйӧм вылӧ».

²⁵ Найӧ шуисны: «Тэ видзин олӧмнымӧс. Тэ бур сьӧлӧма миян дінӧ, ыджыдным. Талунсянь лоам кесйӧг туйынӧсь фараонлы».

²⁶ Фараонлы витӧд пай сетӧм йылысь тшӧктӧмыс, мый лӧсьӧдіс Ӧсип, ӧнӧдз вына Египет муын. Сӧмын попъяслӧн муыс эз вудж фараонлы.

Яковлӧн бӧръя корӧм

²⁷ Израильсаяс олісны Египетын, Гошен муын, мый вӧлі сетӧма налы. Сэні найӧ чужтысисны да ёна рӧдмисны-паськалісны.

²⁸ Дас сизим во на оліс Яков Египет муын, сё нелямын сизим арӧсӧдз.

²⁹ Израильлы воис кад кувны, и сійӧ корис Ӧсип писӧ да шуис сылы: «Ло бур сьӧлӧма ме дінӧ. Менам лядьвейӧ китӧ пуктӧмӧн кыв сет, мый он гуав менӧ Египетӧ.

³⁰ Кор ме вуджа аслам батьяс дінӧ, ну менсьым шойӧс Египетысь да гуав батьяслӧн дзебанінӧ». Ӧсип шуис: «Вӧча тэнад корӧм серти».

³¹ «Кыв сет», – шуис Яков. Ӧсип кыв сетіс. Израиль юрбитіс Енлы вольпасяс.