Олӧм 45 - Коми Библия 2023

Ӧсип воссьӧ вокъясыслы

¹ Ӧсип эз вермы сэсся кутчысьны да горӧдіс аслас кесйӧгъяслы: «Петӧй ставныд!» Ас кежаныс кольӧм бӧрын Ӧсип висьтасис вокъясыслы, коді сійӧ.

² Сэсся гораа бӧрддзис. Египетсаяс кылісны сылысь бӧрдӧмсӧ, и та йылысь юӧрыс воис фараон керкаӧдз.

³ «Ме – Ӧсип», – шуис сійӧ вокъясыслы да юаліс: «Ловъя-ӧ менам батьӧй?» Но вокъясыс шӧйӧвошӧмнысла эз вермыны нинӧм вочавидзны.

⁴ Ӧсип корис вокъяссӧ матыстчыны, и найӧ матыстчисны. Сійӧ шуис: «Ме тіян Ӧсип вокныд, кодӧс ті вузалінныд Египетӧ.

⁵ Но ӧні энӧ шогсьӧй да энӧ йирӧй асьнытӧ, мый вузалінныд менӧ. Тіянысь водзджык менӧ мӧдӧдіс татчӧ Ен, медым видзны олӧмнытӧ.

⁶ Му вылын мӧд во нин сулалӧ тшыг кад, но вит во чӧж на оз кутны кӧдзны-вундыны.

⁷ Енмыс мӧдӧдіс менӧ татчӧ тіянысь водзджык, медым кольны рӧднытӧ му вылас, видзны олӧмнытӧ да мездыны тіянӧс.

⁸ Энӧ ті менӧ мӧдӧдӧй татчӧ, а Енмыс. Сійӧ пуктіс менӧ фараонлы туйдӧдысьӧн, сетіс менам кипод улӧ фараонлысь керкасӧ да ставнас Египет мусӧ.

⁹ Тэрмасьӧй мунны менам бать дінӧ. Висьталӧй сылы, тадзи пӧ шуӧ тэнад пиыд: ”Енмыс пуктіс менӧ став Египет вылын ыджыдӧн. Лок ме дінӧ. Эн нюжмась.

¹⁰ Босьт ыж-мӧстӧ да став эмбуртӧ. Лок пияныдкӧд да налӧн пиянкӧд. Тэ верман овмӧдчыны месянь матӧ Гошен муӧ.

¹¹ Сэні ме верда тіянӧс, и аслад котырыдкӧд тэ он пӧр корысьӧ. Ӧд тшыг кад кыссяс вит во чӧж на”.

¹² Видзӧдӧй, тайӧ ме сёрнита тіянкӧд. Венямин вокӧй, тайӧ ме!

¹³ Висьталӧй менам батьлы, кыдзи ме нимала Египетын. Висьталӧй ставсӧ, мый аддзылінныд, да ӧдйӧджык вайӧдӧй татчӧ менсьым батьӧс».

¹⁴ Ӧсип кутліс Веняминӧс да бӧрддзис. Венямин тшӧтш бӧрдіс сійӧс кутлігас.

¹⁵ Сэсся бӧрдігтырйи Ӧсип окаліс мукӧд вокъяссӧ, та бӧрын найӧ пондісны сёрнитны.

¹⁶ Ӧсиплӧн вокъяс локтӧм йылысь юӧрыс воис фараонӧдз. Фараонлы да сылӧн йӧзыслы вӧлі нимкодь таысь.

¹⁷ Фараон шуис Ӧсиплы: «Висьтав вокъясыдлы, мед нӧбъяласны осёлъяснысӧ [няньӧн] да мунасны Ханаан муӧ.

¹⁸ Мед босьтасны ассьыныс батьнысӧ да котырныскӧд локтасны ме дінӧ. Ме сета налы Египет муысь медбурсӧ, и найӧ кутасны овны выя муын.

¹⁹ Тшӧкты налы босьтны Египет муысь тарантасъяс, медым вайӧдны челядьнысӧ, гӧтыръяснысӧ да батьнытӧ.

²⁰ Мед оз шогсьыны овмӧсныс вӧсна, мый колясны сэтчӧ, ӧд Египетын ме налы сета медбурсӧ».

²¹ Израильлӧн пияныс тадзи и вӧчисны. Фараонлӧн тшӧктӧм серти Ӧсип сетіс налы тарантасъяс. Сетіс налы туяныс сёян

²² и быдӧнлы вежан паськӧм, а Веняминлы сетіс куимсё сикель эзысь да вит вежан паськӧм.

²³ Батьыслы мӧдӧдіс египетса медбур козинъяс, пуктіс найӧс дас осёл вылӧ. Нӧшта мӧдӧдіс нянь да туйӧ босьтан сёян, пуктіс найӧс дас энь осёл вылӧ.

²⁴ Ӧсип лэдзис вокъяссӧ шуалӧмӧн: «Туяныд энӧ пинясьӧй». И найӧ мунісны.

²⁵ Египет муысь вокъяс воисны Яков батьныс дінӧ Ханаан муӧ.

²⁶ Яковлы висьталісны, Ӧсип пиыд пӧ ловъя да ӧні веськӧдлӧ став Египет муӧн. Но Яков эз эскы налы, вӧлі кын сьӧлӧма.

²⁷ Найӧ висьталісны батьныслы ставсӧ, мый Ӧсип висьталіс налы. Кор Яков аддзис тарантасъяссӧ да кыліс, мый найӧс Ӧсип мӧдӧдӧма, медым вайӧдны сійӧс Египетӧ, вӧлисти ловзьыштіс.

²⁸ Сійӧ шуис: «Ӧсип пиӧй ловъя! Тайӧ ставыс, мый меным колӧ. Ветла да кувтӧдз аддзысьла на сыкӧд».