Олӧм 44 - Коми Библия 2023

Венямин мешӧкысь аддзӧны Ӧсиплысь дозмук

¹ Ӧсип аслас керка кутысьлы тшӧктіс: «Тырт тайӧ йӧзыслысь мешӧкъяссӧ сёянӧн, мыйта вермасны нуны. Быдӧнлы мешӧк вомас пукты сылысь сьӧмсӧ.

² Менсьым эзысь дозмукӧс пукты медічӧтыслӧн мешӧк вомас ӧтлаын нянь ньӧбан сьӧмыскӧд». Керка кутысь вӧчис Ӧсиплӧн тшӧктӧм серти.

³ Водз асывнас вокъяслы лэдзисны босьтны осёлъяснысӧ да мунны гортаныс.

⁴ Найӧ петісны карысь. Кор найӧ вӧліны неылын на, Ӧсип шуис керка кутысьлы: «Мун суӧд тайӧ йӧзсӧ да шу налы: ”Мыйла ті бурсьыс мынтысинныд лёкӧн? [Мыйла гусялінныд эзысь дозмуксӧ?]

⁵ Тайӧ дозмуксьыс юӧ менам ыджыдӧй, тшӧтш тунасьӧ сы отсӧгӧн. Ті лёктор вӧчинныд”».

⁶ Керка кутысь суӧдіс да шуис налы, кыдзи Ӧсип тшӧктіс.

⁷ Найӧ воча шуисны: «Ыджыдӧй, мыйла тэ тадзи шуан? Ми, тэнад кесйӧгъяс, эгӧ вермӧй татшӧмторсӧ вӧчны.

⁸ Ӧд сьӧмсӧ, мый ми аддзим мешӧк вомъясысь, Ханаан мусянь бӧр вайим тэныд. Ми эгӧ вермӧй гусявны тэнад ыджыдлӧн керкасьыс эзысь-зарни.

⁹ Кодлысь аддзан дозмуксӧ, сійӧс верман вины. А ми, ыджыдӧй, ставным кесйӧг туйӧ тэныд лоам».

¹⁰ «Бур, – шуис сійӧ. – Мед лоас тадзи. Но меным кесйӧгнас лоас сӧмын сійӧ, кодлысь аддза дозмуксӧ. Мукӧдсӧ ог мыжды».

¹¹ Вокъяс ӧдйӧ лэдзисны мешӧкъяснысӧ му вылӧ да восьталісны найӧс.

¹² Керка кутысь шобис вокъяслысь мешӧкъяссӧ – ыджыд воксяньыс ичӧтӧдзыс. Дозмукыс сюри Венямин мешӧкысь.

¹³ Вокъяс косялісны паськӧмнысӧ, нуанторнысӧ пуктісны осёлъяс вылӧ да бӧр бергӧдчисны карас.

¹⁴ Вокъясыскӧд Иуда локтіс Ӧсип керкаӧ. Ӧсип виччысис найӧс. Найӧ кымынь уськӧдчисны сы водзӧ.

¹⁵ Ӧсип шуис налы: «Мый ті вӧчинныд? Эн ӧмӧй гӧгӧрвоӧй, мый ме ставсӧ верма тӧдмавны?»

¹⁶ Иуда шуис: «Мый миянлы шунысӧ тэныд, ыджыдӧй? Дзик нинӧм, и дорйысьнысӧ некыдз. Енмыс аддзӧ миянлысь мыжсӧ. Ыджыдӧй, ми – тэнад кесйӧгъяс. Тэныд кутас кесъявны оз сӧмын сійӧ, код ордысь сюри тэнад дозмукыд, но сыкӧд тшӧтш ми ставным кутам кесъявны».

¹⁷ Но Ӧсип шуис: «Тадзи оз ло! Код ордысь сюри менам дозмукӧй, сӧмын сійӧ лоас менам кесйӧгӧн. А ті лӧнь сьӧлӧмӧн мунӧй батьныд дінӧ».

¹⁸ Иуда матыстчис Ӧсип дінӧ да шуис: «Ыджыдӧй, лэдз меным висьтавны тэныд. Эн дӧзмы ме вылӧ, тэ ӧд фараон кодь.

¹⁹ Ыджыдӧй, тэ ачыд юасин миянлысь, эм-ӧ миян бать либӧ вок.

²⁰ Ми висьталім тэныд, ыджыдӧй, мый миян эм пӧрысь бать. Пӧрысь кадӧ сылӧн чужис медічӧт пи. Пиыс аслас мамсянь ӧтнас коли, кор сылӧн вокыс куліс. Батьным ёна радейтӧ сійӧс.

²¹ Тэ тшӧктін вайӧдны сійӧс тэ дінӧ.

²² Ми шуим тэныд, ыджыдӧй, мый зонмыс оз вермы кольны батьсӧ, ӧд коляс кӧ, батьным кулас.

²³ Но тэ шуин миянлы, аслад кесйӧгъяслы, медічӧт воктӧгныд пӧ ме водзӧ энӧ локтӧй.

²⁴ Кор ми локтім батьным дінӧ, тэнад кесйӧгыд дінӧ, висьталім сылы, мый тэ шуин, ыджыдӧй.

²⁵ Бӧрынджык батьным бара тшӧктіс ветлыны сёян ньӧбны.

²⁶ Но ми шуим сылы, мый огӧ мунӧй медічӧт воктӧгным, ӧд сытӧг миянлы оз позь локны тэ водзӧ.

²⁷ Сэк батьным, тэнад кесйӧгыд, шуис: ”Ті тӧданныд, мый менам гӧтырӧй чужтіс меным кык пиӧс.

²⁸ Ӧтиыс вошис, и ӧнӧдз эг аддзы сійӧс. Чайта, збыльысь звер сійӧс косявлӧма.

²⁹ Босьтанныд кӧ менсьым нӧшта тайӧ писӧ, и сыкӧд мыйкӧ лоӧ, ті менӧ, пӧрысь мортӧс, шогӧ вӧйтанныд да кулӧмаяс дінӧ мӧдӧданныд”.

³⁰ Ӧні кӧ ме муна батьӧй дінӧ, тэнад кесйӧгыд дінӧ, да сылӧн радейтана пиыс кӧ оз ло миянкӧд,

³¹ батьӧй кулас. Тадзи ми, тэнад кесйӧгъяс, мӧдӧдам шогӧ усьӧм батьнымӧс, тэнсьыд пӧрысь кесйӧгтӧ, кулӧмаяс дінӧ.

³² Да и ме, тэнад кесйӧг, батьлы кӧсйыси кывкутны зонмыс вӧсна – шуи сылы, мый нэм кежлӧ коля мыжаӧн сы водзын, ог кӧ бӧр вайӧд зонмӧс сы дінӧ.

³³ Кора, лэдз менӧ, тэнсьыд кесйӧгтӧ, зонмыс пыдди лоны кесйӧгӧн тэ ордын, ыджыдӧй, а зонмыс мед мунас вокъясыскӧд.

³⁴ Сытӧг кыдзи ме муна батьӧй дінӧ? Верма ӧмӧй видзӧдны батьӧйлысь шогӧ усьӧмсӧ?»