Олӧм 43 - Коми Библия 2023

Вокъяс Веняминкӧд Ӧсип дорынӧсь

¹ Тшыгъялӧм содіс му вылын.

² Египетысь вайӧм няньыс бырис. Сэки батьныс шуис пияныслы: «Ветлӧй бара сёянтӧ ньӧбны».

³ Иуда шуис сылы: «Сійӧ мортыс чорыда шуис миянлы, воктӧгныд пӧ ме водзӧ энӧ петкӧдчӧй.

⁴ Вокнымӧс кӧ лэдзан миянкӧд, ветлам да ньӧбам тэныд сёян.

⁵ А он кӧ, ми огӧ мунӧй. Ӧд сійӧ мортыс шуис, воктӧгныд пӧ ме водзӧ энӧ петкӧдчӧй».

⁶ Израиль шуис: «Мыйла висьталінныд сійӧ мортыслы, мый тіян нӧшта вок эм? Тайӧн лёк вӧчинныд меным».

⁷ Найӧ шуисны: «Сійӧ мортыс юасис миян йылысь да рӧдвужным йылысь. Сійӧ юаліс, ловъя-ӧ батьным, эм-ӧ миян нӧшта вокъяс. Ми висьталім сылы тіян йылысь. Кытысь нӧ ми тӧдім, мый тшӧктас вайӧдны Веняминӧс».

⁸ Иуда шуис аслас Израиль батьлы: «Лэдз сійӧс мекӧд, и ми мӧдӧдчам туйӧ. Сэки тшыгъялӧм понда некод оз кув, ми ставным и миян челядьным ловйӧн колям.

⁹ Ме кывкута Венямин вӧсна. И ог кӧ бӧр вайӧд сійӧс тэ дінӧ, нэм кежлӧ тэ водзын мыжаӧн коля. Менсьым верман водзӧс перйыны.

¹⁰ Эгӧ кӧ ньӧжмасьӧй, кыкысь нин позис ветлыны».

¹¹ Израиль батьныс шуис налы: «Но мый сэсся вӧчан? Сідзкӧ, босьтӧй да нуӧй тайӧ мортыслы миян муысь козинъяс: мавтасъяс, ма, чӧскыд дука сиръяс, ладан, фисташ да миндаль кольтусьяс.

¹² Сьӧмтӧ босьтӧй воддза дорсьыс кык пӧв унджык, медым мешӧкъясаныд пуктӧм сьӧмсӧ бӧр верминныд сетны. Гашкӧ, тіянлы тӧдлытӧг пуктісны.

¹³ Босьтӧй вокнытӧ аскӧдныд да ветлӧй сійӧ мортыс дінӧ.

¹⁴ Ставсӧвермысь Ен мед сетас сійӧ мортыслы бур сьӧлӧм, мед лэдзас Симеонӧс да Веняминӧс бӧр локны тіянкӧд. А меным кӧ шуӧма лоны челядьтӧг, мед лоӧ сідзи».

¹⁵ Вокъяс босьтісны козинъяс да воддза дорысь кык пӧв унджык сьӧм. Найӧ мӧдӧдчисны Египетӧ, аскӧдныс босьтісны тшӧтш Веняминӧс. Локтісны Ӧсип дінӧ.

¹⁶ Ӧсип мыйӧн аддзис Венямин воксӧ, шуис аслас керка кутысьлы: «Тайӧ йӧзсӧ пырт гортӧ. Начкы пемӧс да дасьты сёян – найӧ кутасны пажнайтны мекӧд».

¹⁷ Керка кутысь вӧчис сідзи, кыдзи тшӧктіс Ӧсип.

¹⁸ Ӧсип ордӧ мунігӧн вокъяс повзьӧмнысла ӧта-мӧдныслы шуалісны: «Мешӧкъясаным бӧр пуктӧм сьӧм вӧсна пыртісны миянӧс татчӧ. Найӧ уськӧдчасны миян вылӧ, мырддясны осёлъяснымӧс, а миянӧс босьтасны кесйӧг туйӧ».

¹⁹ Вокъяс матыстчисны керка кутысь дінӧ да шуисны:

²⁰ «Ыджыдӧй, вермам-ӧ шыасьны тэ дінӧ? Ми волім нин водзынджык сёян ньӧбны.

²¹ Бӧрсӧ мунігӧн ми сувтім узьмӧдчыны, восьтім мешӧкъяснымӧс да аддзим быд мешӧк вомысь сьӧм. Сы мында, мыйта ми мынтысьлім няньысь. А ӧні ми сійӧ сьӧмсӧ бӧр кӧсъям сетны.

²² Сёян ньӧбӧм вылӧ миян эм на сьӧмыс. Ми огӧ тӧдӧй, коді пуктіс сьӧмсӧ мешӧкъясаным».

²³ Керка кутысь шуис: «Лӧньӧй, энӧ полӧй. Тіян да батьныдлӧн Ен пуктіс сьӧмсӧ тіян мешӧкъясӧ. А няньысь мынтысьӧм сьӧмнытӧ меным сетісны нин». Сэсся керка кутысь вайӧдіс на дінӧ Симеонӧс.

²⁴ Керка кутысь пыртіс вокъясӧс Ӧсиплӧн керкаӧ да вайис налы ва, медым мыськыны кокнысӧ, нӧшта вердіс налысь осёлъяссӧ.

²⁵ Пажын кежлӧ Ӧсипӧс виччысигмозныс вокъяс перъялісны ассьыныс козинъяссӧ. Найӧ тӧдісны нин, мый кутасны сёйны сэні.

²⁶ Кор Ӧсип локтіс, вокъяс сетісны сылы козинъяс да муӧдзыс копыртчисны.

²⁷ Сійӧ чолӧмасис накӧд да юаліс: «Дзоньвидза-ӧ тіян пӧрысь батьныд, код йылысь ті сэки висьтавлінныд? Ловъя-ӧ на?»

²⁸ Найӧ вочавидзисны: «Тэнад кесйӧгыд, миян батьным, ловъя и дзоньвидза». [Ӧсип шуис: «Енмӧн бурсиӧма сійӧ».] Найӧ пидзӧсчанясисны да копыртчылісны сылы.

²⁹ Ӧсип видзӧдліс Венямин вокыс вылӧ, аслас мамыслӧн пи вылӧ, да юаліс: «Тайӧ тіян медічӧт вокныд, код йылысь ті висьтавлінныд меным?» Веняминлы сійӧ шуис: «Пиӧй, Енлӧн буралӧмыс мед лоас тэкӧд!»

³⁰ Ӧсиплӧн сьӧлӧмас ыпнитіс муслун вокыс дінӧ. Йӧз водзас сійӧ муртса эз бӧрддзы, та вӧсна ӧдйӧ петіс мӧд жырйӧ да бӧрдіс сэні.

³¹ Сэсся мыськис чужӧмсӧ да локтіс бӧр. Бӧрддзӧмысь кутчысьӧмӧн шуис: «Вайӧй сёянсӧ».

³² Сёянсӧ вайисны торйӧн сылы, торйӧн вокъясыслы да торйӧн египетсаяслы, кодъяс сёйисны сы ордын, ӧд египетсаяс оз сёйны еврейяскӧд, мыйла лыддьӧны найӧс пежӧн.

³³ Вокъясӧс пуксьӧдалісны Ӧсиплы воча медыджыдсяньыс медічӧтӧдзыс. Найӧ шензьӧмӧн видзӧдісны ӧта-мӧд выланыс.

³⁴ Ӧсип тшӧктіс сетны налы сёянсӧ аслас пызан вылысь, а Веняминлы мукӧд сертиыс – вит пӧв унджык. Вокъяс юисны да гажӧдчисны Ӧсипкӧд ӧтвылысь.