Олӧм 42 - Коми Библия 2023

Ӧсиплӧн вокъясыс Египетынӧсь

¹ Кор Яков кыліс, мый Египетын эм нянь, сійӧ шуис пияныслы: «Мый видзӧданныд ӧта-мӧд выланыд?

² Ме кывлі, мый Египетын эм нянь. Ветлӧй сэтчӧ няньла, медым тшыгнымла эгӧ кулӧй».

³ Ӧсиплӧн даснан вокыс мӧдӧдчисны Египетӧ няньла.

⁴ Но Ӧсиплысь Венямин воксӧ Яков эз лэдз вокъясыскӧд, чайтіс, мый сыкӧд лёктор вермас лоны.

⁵ Мукӧд йӧзкӧд ӧтлаын Израильлӧн пиян локтісны Египетӧ ньӧбны нянь, ӧд Ханаан муын став йӧзыс тшыгъялісны.

⁶ Египет муӧн сэки веськӧдліс Ӧсип, и няньнас сійӧ вузасис ачыс. Ӧсиплӧн вокъясыс локтісны да муӧдзыс копыртчисны сылы.

⁷ Ӧсип тӧдіс найӧс, но эз петкӧдлы, мый тӧдӧ. Сійӧ скӧра юаліс налысь: «Кытысь ті локтінныд?» Найӧ вочавидзисны: «Ханаан муысь нянь ньӧбны».

⁸ Ӧсип тӧдіс ассьыс вокъяссӧ, а найӧ эз тӧдны сійӧс.

⁹ Ӧсиплы тӧд вылас усины вокъяс йылысь вӧтъясыс, и сійӧ шуис налы: «Ті кыйӧдчысьяс. Ті локтінныд видзӧдавны, кытысянь тайӧ му вылас позьӧ уськӧдчыны».

¹⁰ Найӧ шуисны сылы: «Эгӧ, ыджыдӧй. Ми, тэнад кесйӧгъяс, локтім сёян ньӧбны.

¹¹ Ми ставным ӧти батьлӧн пиян, и ми огӧ ылӧдлӧй. Ми абу кыйӧдчысьяс».

¹² Ӧсип шуис налы: «Абу тадз, ті локтінныд видзӧдавны, кытысянь тайӧ му вылас позьӧ уськӧдчыны».

¹³ Найӧ шуисны: «Ми, тэнад кесйӧгъяс, локтім Ханаан муысь. Ми ставным ӧти батьлӧн пиян, дас кык вок вӧлім. Медічӧтыс кольччис батьнымкӧд, а ӧти вок абу нин ловъя».

¹⁴ Ӧсип налы шуис: «Ті кыйӧдчысьяс.

¹⁵ Тіянӧс лоӧ тӧдмалӧма. Кӧсйыся фараон олӧмӧн, мый ті онӧ петӧй татысь, кытчӧдз оз лок тіян медічӧт вокныд.

¹⁶ Тіян пиысь ӧти мед мунас да вайӧдас вокнытӧ, а мукӧдсӧ налӧн локтӧдз йӧршитӧмӧн видза. Сэки тыдовтчас, висьталінныд-ӧ збыльсӧ. Энӧ кӧ, сідзкӧ, ті – збыльысь кыйӧдчысьяс».

¹⁷ Ӧсип йӧршитіс вокъяссӧ куим лун кежлӧ.

¹⁸ Коймӧд луннас Ӧсип шуис налы: «Вӧчӧй, мый ме тшӧкта, сэки ловйӧн колянныд, ӧд ме пола Енсьыс.

¹⁹ Ті кӧ веськыд йӧз, тіян пӧвстысь мед кодкӧ кольччас дзескыдінӧ, а мукӧдыс мед нуасны гортаныс тшыгъялысьяслы нянь.

²⁰ Но медічӧт вокнытӧ вайӧдӧй ме дінӧ. И онӧ кӧ ылӧдлӧй, ловйӧн колянныд». Вокъяс кӧсйысисны.

²¹ «Збыльысь, вокнымлы лёк вӧчӧмысь ми мыжаӧсь! – сёрнитісны найӧ. – Ми ӧд аддзылім сылысь сьӧкыдалӧмсӧ да кылім сылысь корӧмсӧ, но эгӧ лэдзӧй сійӧс. Сійӧн и суис миянӧс тайӧ сьӧкыдлуныс».

²² Рувим шуис налы: «Эг ӧмӧй шулы тіянлы, мед зонмыслы лёксӧ энӧ вӧчӧй? Но ті энӧ кывзысьӧй. Ӧні сылӧн вирысь ми водзӧс мынтам».

²³ Найӧ эз тӧдны, мый Ӧсип гӧгӧрвоӧ налысь сёрнисӧ. Ӧд Ӧсиплӧн вӧлі аслас вуджӧдчысь.

²⁴ Ӧсип вешйис на дінысь да бӧрддзис. Сэсся бӧр локтіс да водзӧ сёрнитіс накӧд. Ӧсип босьтіс Симеонӧс да тшӧктіс вокъяслӧн син водзын кӧртавны сійӧс.

²⁵ Ӧсип тшӧктіс тыртны вокъяслысь мешӧкъяссӧ няньӧн, а няньысь мынтысян сьӧмсӧ тшӧктіс бӧр пуктыны налӧн мешӧкъясӧ. Нӧшта тшӧктіс сетны туяныс сёян. Тадзи вӧлі вӧчӧма.

²⁶ Вокъяс пуктісны нянь мешӧкъяссӧ осёлъяс выланыс да петісны туйӧ.

²⁷ Вой кежлӧ сувтліганыс вокъяс пӧвстысь ӧти восьтіс мешӧксӧ, мед вердыштны осёлсӧ, да аддзис мешӧк вомсьыс ассьыс сьӧмсӧ.

²⁸ Вокъясыслы шуис: «Видзӧдӧй, менам сьӧмӧй мешӧкын!» Найӧ шай-паймунісны, полӧмпырысь юасисны ӧта-мӧдныслысь: «Мый нӧ вӧчис миянкӧд Енмыс?»

Ӧсиплӧн вокъяс бӧр локтӧны гортаныс

²⁹ Вокъяс локтісны Ханаан муӧ асланыс Яков бать дінас да висьталісны став лоӧмтор йывсьыс. Найӧ шуисны:

³⁰ «Сэтчӧс муын ыджыдалысьыс сёрнитіс миянкӧд скӧра. Сійӧ чайтіс, мый ми кыйӧдчысьяс.

³¹ Ми шуим сылы, мый ми веськыд йӧз, ми абу кыйӧдчысьяс.

³² Ми дас кык вок, ӧти батьлӧн пиян, но ӧти абу нин ловъя, и медічӧтыс ӧні батькӧд Ханаан муын.

³³ Сэтчӧс муын ыджыдалысьыс сэк шуис: ”Со кыдзи ме тӧдмала, веськыда-ӧ ті висьталанныд. Ӧти вокӧс ме дінӧ кольӧй, а мукӧдыс мед босьтасны нянь да мунасны, ӧд тіян гортсаясныд тшыгъялӧны.

³⁴ Но медічӧт вокнытӧ вайӧдӧй ме дінӧ. Тадзи кута тӧдны, мый ті абу кыйӧдчысьяс, а веськыд йӧз. Сэсся бӧр сета вокнытӧ, и ті верманныд кынӧмпӧт перйыны тайӧ муас”».

³⁵ Мешӧкъяснысӧ ректігӧн вокъяс аддзисны сэтысь ассьыныс сьӧмнысӧ да ёна повзисны. Яков батьныс тшӧтш повзис.

³⁶ Сійӧ шуис налы: «Ті воштінныд менсьым пиянӧс! Ӧсипӧй абу, Симеонӧй абу, и Веняминӧс босьтны кӧсъянныд! Став сьӧкыдыс ме вылӧ усьӧ!»

³⁷ Рувим шуис батьыслы: «Ог кӧ бӧр вайӧд Веняминӧс тэ дінӧ, верман вины менсьым кык пиӧс. Сет Веняминӧс менам киӧ, и ме бӧр вайӧда сійӧс тэ дінӧ».

³⁸ Яков шуис: «Оз мун менам пиӧй тіянкӧд. Сылӧн вокыс куліс, и сійӧ ӧтнасӧн менам колис. Туяс кӧ сыкӧд мыйкӧ лоӧ, ті менӧ, пӧрысь мортӧс, шогӧ вӧйтанныд да кулӧмаяс дінӧ мӧдӧданныд».