Олӧм 41 - Коми Библия 2023

Ӧсип гӧгӧрвоӧдӧ фараонлысь вӧтъяссӧ

¹ Коли кык во. Фараон вӧтасис, быттьӧ сійӧ сулалӧ Нил ю дорын.

² Юысь петісны ён да вердаса сизим мӧс, сэсся кутісны йирсьыны вадорын.

³ На бӧрся юысь петісны омӧлик да коньӧр сизим мӧс, сэсся сувтісны орччӧн вердаса мӧсъяскӧд.

⁴ Тайӧ омӧлик да коньӧр мӧсъясыс сёйисны ён да вердаса сизимнан мӧссӧ. Фараон садьмис,

⁵ но бара унмовсис да мӧдысь вӧтасис. Ӧти за вылын быдмисны гырысь туся сизим бур шеп.

⁶ Быдмисны тшӧтш косьмӧм да асыв тӧлӧн кельдӧдӧм сизим шеп.

⁷ Кос шепъясыс ньылыштісны гырысь туся шепъяссӧ. Фараон садьмис да гӧгӧрвоис, мый тайӧ вӧт.

⁸ Асывнас фараон пондіс майшасьны. Сійӧ корис египетса тӧдысьясӧс да мывкыда йӧзӧс и висьталіс налы ассьыс вӧтсӧ. Но некод эз куж гӧгӧрвоӧдны фараонлысь вӧтсӧ.

⁹ Сэки медыджыд вина кисьталысь шуис фараонлы: «Ӧні меным тӧд вылӧ уси аслам мыжӧй.

¹⁰ Фараон вӧлі скӧрмӧма аслас кесйӧгъяс вылӧ, та вӧсна пуксьӧдіс менӧ да медыджыд нянь пӧжалысьӧс дзескыдінӧ, фараонӧс видзысьясӧн веськӧдлысьлӧн керкаӧ.

¹¹ Ӧти войӧ ми кыкнанным вӧталім аслыспӧлӧс вӧт.

¹² Дзескыдінын миянкӧд пукаліс том еврей, фараонӧс видзысьясӧн веськӧдлысьлӧн кесйӧг. Ми висьталім сылы вӧтнымӧс, и сійӧ гӧгӧрвоӧдіс найӧс.

¹³ Кыдзи сійӧ висьталіс миянлы, сідзи и лоис. Ме локті важ удж вылӧ, а нянь пӧжалысьӧс ӧшӧдісны».

¹⁴ Фараон мӧдӧдіс Ӧсипла. Сійӧс пырысьтӧм-пыр вайӧдісны дзескыдінысь. Ӧсип шырсис, вежсис да локтіс фараон дінӧ.

¹⁵ Фараон шуис Ӧсиплы: «Некод оз вермы гӧгӧрвоӧдны менсьым вӧтӧс, а тэ йылысь ме кывлі, мый тэ кужан».

¹⁶ Ӧсип вочавидзис фараонлы: «Ог ме тайӧс вӧч, а Енмыс. Сійӧ гӧгӧрвоӧдас фараонлы бур вылӧ».

¹⁷ Фараон висьталіс Ӧсиплы: «Ме вӧтаси, быттьӧ сулала Нил ю дорын.

¹⁸ Юысь петісны ён да вердаса сизим мӧс, найӧ кутісны йирсьыны вадорын.

¹⁹ На бӧрся юысь петісны косьмӧм, омӧлик да коньӧрсьыс-коньӧр сизим мӧс. На кодь омӧлик мӧсъяссӧ ме эг аддзывлы став Египет пасьталаысь.

²⁰ Тайӧ омӧлик да коньӧр мӧсъясыс сёйисны вердаса сизимнан мӧссӧ.

²¹ Но сёйӧм бӧраныс нинӧм эз тӧдчы. Мӧсъяс кутшӧм омӧликӧсь вӧліны, сэтшӧмӧн и колисны. Сэсся ме садьми.

²² Мӧдысь вӧтаси, быттьӧ ӧти за вылын быдмисны гырысь туся сизим бур шеп.

²³ На бӧрся быдмисны омӧль, косьмӧм да асыв тӧлӧн кельдӧдӧм сизим шеп.

²⁴ Кос шепъясыс ньылыштісны бур шепъяссӧ. Ме висьталі тайӧс тӧдысьяслы, но некод эз куж гӧгӧрвоӧднысӧ».

²⁵ Ӧсип шуис фараонлы: «Фараонлӧн кыкнан вӧтыс висьталӧны ӧтитор йылысь. Енмыс юӧртіс фараонлы, мый кутас вӧчны.

²⁶ Вердаса сизим мӧскыс – сизим во. И сизим бур шептыс – тшӧтш сизим во. Вӧтъяслӧн вежӧртасыс ӧти.

²⁷ Сизим косьмӧм да омӧлик мӧскыс, кодъяс петісны вердаса мӧсъяс бӧрся, тайӧ – сизим во. Косьмӧм да асыв тӧлӧн кельдӧдӧм сизим шептыс – сизим тшыгъялан во.

²⁸ Енмыс петкӧдліс фараонлы, мый кутас вӧчны. Та йылысь ме висьталі нин.

²⁹ Став Египет му пасьтала пуксьӧ сизим пӧтӧса во.

³⁰ Но та бӧрын Египет муын пуксяс сизим тшыгъялан во, сэтшӧм вояс, мый весиг вунасны пӧтӧса воясыс. Тшыгъялӧмыс куштас тайӧ мусӧ,

³¹ лоӧ сэтшӧм сьӧкыд, мый воддза пӧтӧса воясыс быттьӧ эз и вӧвны.

³² А мый фараон кыкысь вӧтасис, сідзкӧ, Енмыс збыльысь тадзи шуӧма, и регыдӧн Сійӧ ставсӧ збыльмӧдас.

³³ Ӧні фараон мед корсяс вежӧра да мывкыда мортӧс да пуктас сійӧс веськӧдлыны став Египет муӧн.

³⁴ Фараон мед индас йӧзӧс, кодъяс сизим пӧтӧса во чӧжнас чукӧртасны мувывса став быдтасысь витӧд пайсӧ.

³⁵ Локтана бур воясас мед чукӧртасны каръясӧ быдсикас сёянсӧ да сетасны тӧдны та йылысь фараонлы.

³⁶ Чукӧртӧм няньыс ковмас, кор Египет муӧ пуксяс сизим тшыгъялан во. Сэки египетсаяс тшыгнысла оз кувны».

Ӧсип веськӧдлӧ Египетӧн

³⁷ Ӧсиплӧн вӧзйӧмыс кажитчис фараонлы да сылӧн чина йӧзлы.

³⁸ Фараон шуис налы: «Сюрас-ӧ миянлы Ӧсип кодь мортыс, ӧд сы пытшкын Енлӧн Лов?»

³⁹ Ӧсиплы фараон шуис: «Енмыс ставсӧ тайӧс восьтіс тэныд. Сідзкӧ, тэысь вежӧра да мывкыда мортыс абу.

⁴⁰ Тэ лоан менам керка вылын ыджыднас, тэнсьыд кутас кывзысьны менам войтырӧй. Но юралан пуклӧсыс менам, и ме тэысь ыджыдджык.

⁴¹ Ме пукта тэнӧ веськӧдлыны став Египет муӧн».

⁴² Фараон пӧрччис ассьыс чунькытшсӧ да чунькытшӧдіс Ӧсипӧс. Сэсся сетіс сылы шабді паськӧм, сьыліас ӧшӧдіс зарни сикӧтш.

⁴³ Фараон торйӧдіс Ӧсиплы ыджыд чина мортӧс новлӧдлан тарантас. Тшӧктіс, мед Ӧсиплӧн мунігас водзвылас горзасны: «Копыртчылӧй!» Тадзи фараон сувтӧдіс сійӧс веськӧдлыны став Египетӧн.

⁴⁴ Фараон шуис Ӧсиплы: «Ме фараон. Но тэнад тшӧктытӧг Египет муын мед некод весиг жель оз бергӧд».

⁴⁵ Фараон пуктіс Ӧсиплы Цафнат-Панеах ним, сетіс сылы гӧтырӧ Асенатаӧс, Он карысь Поти-Пер поплысь нывсӧ. Ӧсип лӧсьӧдчис кытшовтны ставнас Египет мусӧ.

⁴⁶ Ӧсиплы вӧлі комын арӧс, кор сійӧ кутіс кесъявны фараонлы, египетса ӧксылы. Фараон дінысь петӧм бӧрын Ӧсип кытшовтіс ставнас Египет мусӧ.

⁴⁷ Сизим пӧтӧса во чӧжнас муыс сетіс зэв уна нянь.

⁴⁸ Сизим во чӧжнас Ӧсип чукӧртіс быдпӧлӧс няньсӧ, мый быдмис Египет муын. Няньсӧ Ӧсип чукӧртіс каръясӧ матігӧгӧрса видз-муяс вывсьыс.

⁴⁹ Няньыс вӧлі унасьыс-уна, саридздор лыа мында. Ӧсип весиг дугдіс артавнысӧ, ӧд воштіс лыдсӧ.

⁵⁰ Тшыгъялӧм пуксьытӧдз Ӧсиплӧн чужисны кык пи, кодъясӧс сылы чужтіс Асената, Он карысь Поти-Пер поплӧн нылыс.

⁵¹ Медводдза пиыслы Ӧсип пуктіс Манассей ним, ӧд шуис, Енмыс пӧ сетіс вунӧдны ассьым шоглунӧс да бать керкаӧс.

⁵² Мӧдыслы пуктіс Ефрем ним, ӧд шуис, Енмыс пӧ вӧчис менӧ вотӧса пуӧн тайӧ муас, кӧні ме сьӧкыдалі.

⁵³ Египет муын сизим пӧтӧса воыс коли бӧрӧ.

⁵⁴ Пуксис сизим тшыгъялан во, кыдзи висьтавліс Ӧсип. Египетын вӧлі нянь, а мукӧд муясын вӧлі тшыгъялӧм.

⁵⁵ Кор египетсаяс тшӧтш пондісны тшыгъявны, найӧ локтісны корны фараонлысь нянь. Сэки фараон шуис налы: «Мунӧй Ӧсип дінӧ да вӧчӧй, мый сійӧ тшӧктас».

⁵⁶ Кор став Египет муын йӧзыс тшыгъялісны, Ӧсип восьтіс йӧртӧдъяссӧ да кутіс вузавлыны нянь. А тшыгъялӧмыс ӧтарӧ содіс.

⁵⁷ Мукӧд муясысь тшӧтш волывлісны Египетӧдз, медым Ӧсип дорысь ньӧбны нянь, ӧд быдлаын йӧзыс ёна тшыгъялісны.