Олӧм 40 - Коми Библия 2023

^1-2 Кад мысти асланыс ыджыд водзын мыжмисны египетса ӧксылӧн медыджыд вина кисьталысь да медыджыд нянь пӧжалысь. Фараон, египетса ӧксы, скӧрмис на вылӧ

³ да тшӧктіс йӧртны дзескыдінӧ, кӧні пукаліс Ӧсип. Тайӧ дзескыдіныс вӧлі фараонӧс видзысьясӧн веськӧдлысьлӧн керка помын.

⁴ Фараонӧс видзысьясӧн веськӧдлысь пуктіс Ӧсипӧс кесъявны налы. Мыйтакӧ кад кольӧм бӧрын

Ӧсип гӧгӧрвоӧдӧ вӧтъяс

⁵ египетса ӧксылӧн вина кисьталысь да нянь пӧжалысь вӧт вӧталісны. Ӧти войӧ кыкнанныслӧн вӧлі аслыспӧлӧс вӧт.

⁶ Асывводзнас Ӧсип локтіс на дінӧ да аддзис, мый найӧ шӧйӧвошӧмаӧсь.

⁷ «Мыйкӧ ті талун шог чужӧмаӧсь?» – юаліс Ӧсип фараонлӧн ыджыд чинаяслысь, кодъяс пукалісны ыджыдыслӧн керка помын дзескыдінас.

⁸ Найӧ вочавидзисны: «Ми вӧт вӧталім, а гӧгӧрвоӧдысьыс абу». Ӧсип шуис налы: «Енмыс гӧгӧрвоӧдас вӧтъяснытӧ. Висьталӧй меным».

⁹ Вина кисьталысь висьталіс ассьыс вӧтсӧ: «Ме вӧталі виноград пу,

¹⁰ куим вожаӧс. Коръясыс потісны, сэсся пуыс дзоридзаліс, та бӧрын гӧрддзасис да кисьмис вотӧсыс.

¹¹ Киын менам вӧлі фараонлӧн юан доз. Ме чукӧрті вотӧссӧ, пычки фараонлӧн юан дозйӧ да сеті сылы киас».

¹² Ӧсип шуис сылы: «Тайӧс колӧ гӧгӧрвоны тадзи. Куим вожыс – тайӧ куим лун.

¹³ Куим лун мысти фараон кыпӧдас тэнӧ да босьтас важ удж вылад. Тэ сетан сылы киас юан дозсӧ, тадзи важ мозыс кутан кисьтавны сылы вина.

¹⁴ Эн вунӧд менӧ, кор тэныд бур лоӧ. Гарышт ме йылысь фараонлы. Отсав меным петны татысь.

¹⁵ Менӧ ӧд гусялісны еврейяслӧн муысь. Тані олігӧн ме эг вӧч сэтшӧм лёксӧ, мыйысь колӧ йӧршитны дзескыдінӧ».

¹⁶ Нянь пӧжалысь аддзис, мый Ӧсип бура гӧгӧрвоӧдіс вӧтсӧ, да шуис сылы: «Ме тшӧтш вӧтаси, быттьӧ менам юр вылын вӧлі куим нянь куд.

¹⁷ Медвылысса кудъяс вӧлі фараонлы дасьтӧм быдсяма пӧжасыс, но сэтысь ставсӧ кокалісны лэбачьяс».

¹⁸ Ӧсип вочавидзис: «Тайӧс колӧ гӧгӧрвоны тадзи. Куим кудйыс – тайӧ куим лун.

¹⁹ Куим лун мысти фараон кыпӧдас тшӧтш тэнӧ – ӧшӧдас пу вылӧ. И лэбачьяс кокаласны тэнӧ».

²⁰ Куим лун мысти аслас чужан лунӧ фараон лӧсьӧдіс гаж став чина йӧзыслы. Сылы тӧд вылас усины медыджыд вина кисьталысьыс да нянь пӧжалысьыс.

²¹ Фараон босьтіс медыджыд вина кисьталысьӧс важ удж вылас, и сійӧ бара сетлывліс фараонлы киас юан доз.

²² Медыджыд нянь пӧжалысьӧс фараон ӧшӧдіс пу вылӧ. Ставыс лои дзик сідзи, кыдзи Ӧсип гӧгӧрвоӧдіс налы вӧтъяссӧ.

²³ Но медыджыд вина кисьталысь вунӧдіс Ӧсипӧс.