Олӧм 4 - Коми Библия 2023

Каин да Авель

¹ Адам узис Ева гӧтырыскӧд. Ева кынӧмасис, чужтіс Каинӧс да шуис: «Господь сетіс чужтыны меным пиӧс».

² Ева нӧшта чужтіс Авельӧс, Каинлы вокӧс. Авель видзис ыжъясӧс, а Каин му вӧдитіс.

³ Кад мысти Каин вайис Господьлы козин пыдди му вылысь быдтӧмторъяссӧ.

⁴ Авель вайис медводдза чужӧм баляясӧс да налысь госсӧ. Господь сибӧдіс Авельӧс да сылысь козинсӧ.

⁵ Каинӧс да сылысь козинсӧ эз сибӧд. Каин скӧрмис да зумыштчис.

⁶ Господь [Ен] юаліс Каинлысь: «Мыйла тэ скӧрмин? Мыйла зумыштчин?

⁷ Вӧчан кӧ бурсӧ, лэпты юртӧ. А он кӧ вӧч бурсӧ, со, ӧдзӧс дорад мыжыс кыйӧдчӧ. Сійӧ кыскӧ тэнӧ ас дорас, но тэ ыджыдав сы вылын».

⁸ Каин корис Авель воксӧ аскӧдыс ыб вылӧ. И кор найӧ вӧліны сэні, Каин уськӧдчис Авель вокыс вылӧ да виис сійӧс.

⁹ Господь [Ен] юаліс Каинлысь: «Кӧні тэнад Авель вокыд?» Мӧдыс вочавидзис: «Ог тӧд. Ме сы бӧрся ог видзӧд».

¹⁰ Господь шуис сылы: «Мый тэ вӧчин? Вокыдлӧн вирыс горзӧ Ме дінӧ му вывсянь.

¹¹ Ӧнісянь ёрӧма тэнӧ да вӧтлӧма аслад му вылысь, ӧд тайӧ муыс восьтіс вомсӧ да ньылыштіс вирсӧ вокыдлысь, кодӧс тэ виин.

¹² Тэ кутан вӧдитны мутӧ, но сійӧ оз сет тэныд нянь. Тэнӧ лоӧ вӧтлӧма, и тэ лоан му вылын шӧйтысьӧн».

¹³ Каин шуис Господьлы: «Чорыда менӧ мыждӧма, тайӧс ме ог вермы нунысӧ.

¹⁴ Ӧні Тэ вӧтлан менӧ тайӧ мусьыс. Тэ вештан менӧ Аслад чужӧмбан водзысь, ме кута шӧйтны-ветлӧдлыны му вывті. И коді паныдасяс мекӧд, виас менӧ».

¹⁵ Господь [Ен] сэки шуис: «Каинӧс виысьлысь водзӧссӧ сизим пӧвстӧн лоӧ перйӧма». Господь [Ен] пуктіс Каинлы пас, медым сыкӧд паныдасьысь эз ви сійӧс.

¹⁶ Каин мӧдӧдчис Господьлӧн чужӧмбан водзысь Нод муӧ, Эдэмсянь асыввылӧ, да овмӧдчис сэтчӧ.

Каинсянь чужысьяс

¹⁷ Каин узис гӧтырыскӧд. Гӧтырыс кынӧмасис да чужтіс Енокӧс. Сэсся Каин лэптіс кар да сетіс карыслы пиыслысь нимсӧ – Енок.

¹⁸ Еноклӧн чужис Ирад, Ирадлӧн – Мехияэл, Мехияэллӧн – Метушаэл, Метушаэллӧн – Ламек.

¹⁹ Ламек босьтіс аслыс кык гӧтырӧс: ӧтиыс вӧлі Ада, мӧдыс – Цилла.

²⁰ Ада чужтіс Явалӧс. Сысянь петісны ыж-мӧс видзысьяс, кодъяс олісны чомъясын.

²¹ Яваллӧн вокыс вӧлі Ювал. Сысянь петісны гуслиӧн да пӧлянӧн ворсысьяс.

²² Цилла чужтіс Тувал-Каинӧс. Сійӧ лои ыргӧнысь да кӧртысь дорччысьӧн. Тувал-Каинлӧн вӧлі Наама нима чой.

²³ Ламек шыасис аслас гӧтыръяс дінӧ: «Ада да Цилла, кывзӧй менӧ! Ті, Ламеклӧн гӧтыръяс, кывзӧй, мый ме висьтала. Менӧ кӧ айморт дойдас, виа сійӧс. Кучкас кӧ меным зон, и сійӧс виа.

²⁴ Каинысь кӧ сизим пӧвстӧн водзӧссӧ перйисны, Ламекысь сизимдас пӧвстӧн сизимысь перъясны».

Сиф да Енос

²⁵ Адам бара узис гӧтырыскӧд. Гӧтырыс чужтіс пиӧс да пуктіс сылы Сиф ним. Ева шуис: «Авель пыдди, кодӧс виис Каин, Енмыс сетіс меным тайӧ кагасӧ».

²⁶ Сифлӧн чужис пи. Сиф пуктіс сылы Енос ним. Тайӧ кадсянь кутісны шыасьны Ен дінӧ Господь нимӧн.