Олӧм 39 - Коми Библия 2023

Ӧсип Потифар керкаын

¹ Измаил войтырысь вузасьысьяс вайӧдісны Ӧсипӧс Египетӧ. Сэні сійӧс ньӧбис египетса Потифар, фараонлӧн ыджыд чина морт, фараонӧс видзысьясӧн веськӧдлысь.

² Господь вӧлі Ӧсипкӧд, та вӧсна сылӧн ставыс артмис. Ӧсип оліс аслас ыджыдыслӧн керкаын,

³ и ыджыдыс аддзис, мый Господь Ӧсипкӧд да бурсиӧ сылысь став уджсӧ.

⁴ Ӧсип бура кесъяліс ыджыдыслы, та вӧсна воис сылы сьӧлӧм вылас. Ыджыдыс пуктіс сійӧс веськӧдлыны аслас керкаӧн да став эмбурсӧ сетіс сы киӧ.

⁵ Сійӧ кадсяньыс Господь бурсиис египетсалысь керкасӧ Ӧсип вӧсна. Господьлӧн бурсиӧм улын вӧлі ставыс: керка-йӧрыс и видз-муыс.

⁶ Ыджыдыс сетіс ставсӧ Ӧсип киӧ, сылы аслыс коли сӧмын сёйны-юны. Чужӧм-мыгӧрнас Ӧсип вӧлі мича.

⁷ Потифар ыджыдлӧн гӧтырыс чӧвтіс синсӧ Ӧсип вылӧ. Сійӧ шуис Ӧсиплы: «Узь мекӧд».

⁸ Но Ӧсип эз сетчы, а шуис сылы: «Менам ыджыдӧй ставсӧ, мый сылӧн эм, сетіс менам киӧ, и сылы аслас керкаын нинӧм вӧсна тӧждысьны оз ков.

⁹ Меысь ыджыдыс тайӧ керкаас абу. Ставыс менам киын – тэысь кындзи, ӧд тэ сылӧн гӧтыр. Ме ог кӧсйы вӧчны тайӧ ыджыд лёкторсӧ да мыжсӧ Енлы паныд».

¹⁰ Быд лун ань корис Ӧсипӧс узьны сыкӧд, но Ӧсип эз кывзысь сылысь.

¹¹ Ӧтчыд, кор Ӧсип пырис керкаӧ уджавны, ыджыдыслӧн гӧтырыс кындзи сэні некод эз вӧв.

¹² Ань шашаритчис Ӧсиплы паськӧмас да шуис: «Вод мекӧд». Но Ӧсип котӧрӧн петіс сэтысь, а паськӧмыс аньлы киас колис.

¹³ Ань аддзис, мый Ӧсиплӧн паськӧмыс сылӧн киас, а Ӧсип пышйӧма.

¹⁴ Ань чукӧстіс кесйӧгъяссӧ: «Видзӧдлӧй, верӧсӧй босьтіс еврейӧс, а ӧні сійӧ тешитчӧ миян вылын. Сійӧ локтіс ме дінӧ, кӧсйис узьны мекӧд, но ме куті горзыны,

¹⁵ и сійӧ менам горзӧмысь котӧрӧн пышйис, весиг ассьыс паськӧмсӧ колис».

¹⁶ Верӧсыс локтӧдз ань видзис ас ордас Ӧсиплысь паськӧмсӧ.

¹⁷ Сэсся висьталіс верӧсыслы: «Еврей кесйӧгыд, кодӧс тэ вайӧдін миян ордӧ, воліс менӧ янӧдны. [Шуис меным, вода пӧ тэкӧд.]

¹⁸ Но кор ме куті горзыны, сійӧ пышйис, весиг ассьыс паськӧмсӧ колис».

¹⁹ Ӧсиплӧн ыджыдыс кор кыліс, мый Ӧсип вӧчӧма сылӧн гӧтырыслы, пузис лёкысла.

²⁰ Сійӧ пуксьӧдіс Ӧсипӧс дзескыдінӧ. Тайӧ дзескыдінас пуксьӧдлісны ӧксы керкаысь йӧзӧс. Ӧсип пукаліс дзескыдінын,

Ӧсип дзескыдінын

²¹ но Господь вӧлі сыкӧд. Господь вӧлі бур сьӧлӧма Ӧсип дінӧ, та вӧсна дзескыдінса юралысьлы Ӧсип воис сьӧлӧм вылас.

²² Юралысь пуктіс Ӧсипӧс видзӧдны пукалысьяс бӧрся да кывкутны дзескыдінын став удж вӧснаыс.

²³ Дзескыдінса юралысь эз тӧждысь нинӧм вӧсна, мый вӧлі сетӧма Ӧсип киӧ, ӧд Господь вӧлі Ӧсипкӧд да бурсиис сылысь став уджсӧ.