Олӧм 35 - Коми Библия 2023

Яков мунӧ Вефильӧ

¹ Ен шуис Яковлы: «Чеччы, мун Вефильӧ да овмӧдчы сэтчӧ. Сувтӧд Меным висьпуктанін, ӧд Ме петкӧдчи тэныд, кор тэ пышйин Исав воксьыд».

² Яков шуис гортсаыслы да аслас йӧзлы: «Эновтчӧй мукӧд енъясысь! Сӧстӧммӧдчӧй да вежӧй паськӧмнытӧ.

³ Мунам Вефильӧ. Сэні ме сувтӧда висьпуктанін Енлы, коді кыліс менӧ сьӧкыд кадӧ да пыр вӧлі мекӧд [и видзис менӧ] ветліг-мунігъясӧ».

⁴ Йӧзыс ваялісны вӧчӧм енъяссӧ да пельсьыныс перъялӧм исерганысӧ Яковлы. Ставсӧ тайӧс Яков гуаліс сикемдорса тупу улӧ. [Эз висьтав некодлы, и весиг ӧніӧдз оз тӧдны, кӧні тайӧ ставыс.]

⁵ Найӧ [петісны Сикемысь,] мӧдӧдчисны туйӧ. Матігӧгӧр каръясын олысьясӧс ыджыд полӧм босьтіс Енмысь, та вӧсна Яковлысь пиянсӧ эз вӧтӧдны.

⁶ Яков аслас йӧзыскӧд воис ханаанса Лузӧ, мӧд ногӧн кӧ, Вефильӧ.

⁷ Сэтчӧ лэптіс висьпуктанін да нимтіс тайӧ местасӧ Эл-Бетэльӧн. Ӧд сэні Исав воксьыс пышйигас сылы петкӧдчис Ен.

⁸ Ревеккалӧн Девора вердысь-видзысьыс кувсис, и сійӧс гуалісны Вефиль дорын тупу улӧ. Тупусӧ Яков нимтіс Бӧрдан тупуӧн.

⁹ Месопотамияысь локтӧм бӧрын [Лузын] Яковлы бара петкӧдчис Ен да бурсиис сійӧс.

¹⁰ Ен шуис сылы: «Тэнад нимыд Яков, но талунсянь он Яковӧн кут шусьыны, а тэнад нимыд лоӧ Израиль». Тадзи Ен пуктіс сылы Израиль ним.

¹¹ Нӧшта Ен шуис сылы: – Ме – Ставсӧвермысь Ен. Рӧдмы-чужтысь, тэсянь петасны войтыръяс, тэсянь чужасны ӧксыяс.

¹² Мусӧ, мый Ме кӧсйыси сетны Ӧвраамлы да Исааклы, Ме сета тэныд да тэсянь чужысьяслы.

¹³ Ен кыпӧдчис сэтысь, кӧні сёрнитіс Яковкӧд.

¹⁴ Яков сувтӧдіс сэтчӧ из, кисьтіс из вылас вина вись да олив вый.

¹⁵ Енкӧд сёрнитанінсӧ Яков нимтіс Вефильӧн.

Ракель кулӧ Веняминӧс чужтігӧн

¹⁶ Сэсся найӧ мунісны Вефильысь. [Эдер башня сайӧ Яков сувтӧдіс чомсӧ.] Епрафаӧ вотӧдз туй костас Ракель кутіс сьӧкыда чужтыны.

¹⁷ Ракельлӧн мырсигӧн гӧгиньыс шуис сылы: «Эн пов, тэнад бара на пи».

¹⁸ Кор Ракель вӧлі куланвыйын, сійӧ пуктіс пиыслы Бенони ним. Но батьыс сійӧс Веняминӧн шуис.

¹⁹ Ракель куліс. Сійӧс дзебисны Виплием-Епрафаӧ мунан туй бокӧ.

²⁰ Ракельлӧн гу вылӧ Яков пуктіс казьтылан из. Сійӧ ӧнӧдз сэні сулалӧ.

Яковлӧн пиян

²¹ Израиль муніс сэтысь да паськӧдіс ассьыс чомсӧ Эдер башня сайӧ.

²² Тайӧ муас Израильлӧн олігӧн Рувим узис батьыслӧн Валла кесйӧг-гӧтыркӧд. Та йылысь кыліс Израиль [да скӧрмис]. Яковлӧн вӧлі дас кык пи.

²³ Лиялӧн пияныс вӧліны Рувим, Симеон, Левий, Иуда, Иссакар да Завулон. Рувим вӧлі Яковлӧн медводдза пиыс.

²⁴ Ракельлӧн пияныс вӧліны Ӧсип да Венямин.

²⁵ Ракельлӧн Валла кесйӧг аньыс чужтіс Дан да Неффалим пиянӧс.

²⁶ Лиялӧн Зелфа кесйӧг аньыс чужтіс Гад да Асир пиянӧс. Яковлӧн став тайӧ пияныс чужисны Месопотамияын.

Исааклӧн кулӧм

²⁷ Яков локтіс аслас Исаак бать дінӧ Мамреӧ, тайӧ Киръят-Арбаын, ӧнія Хеврон карын [Ханаан муын]. Сэні коркӧ оліс Ӧвраам, сэсся оліс Исаак.

²⁸ Исаак оліс сё кӧкъямысдас арӧсӧдз.

²⁹ Сійӧ куліс пӧрысь кадӧ, олӧмнас пӧтӧмаӧн вуджис батьясыс дінӧ. Исав да Яков пияныс дзебисны сійӧс.