Олӧм 33 - Коми Библия 2023

Яков аддзысьӧ Исавкӧд

¹ Яков видзӧдліс да аддзис: со локтӧ Исав [вокыс] нёльсё морткӧд. Ассьыс ныв-писӧ мамъясныскӧд Яков юкис нёль пельӧ.

² Медводдзаясӧн мунны сувтӧдіс кесйӧг аньясӧс пияныскӧд, на бӧрся Лияӧс ныв-пиыскӧд, а Ракельӧс да Ӧсипӧс сувтӧдіс медбӧрӧ.

³ Ачыс муніс ставсьыс медводзын. Вокыс дінӧ матыстчигӧн муӧдзыс копыртчыліс сылы сизимысь.

⁴ Исав котӧртіс сылы воча, кутліс сійӧс, топӧдіс морӧс бердас да окаліс. Найӧ кыкнанныс бӧрдісны.

⁵ Аньясӧс да челядьӧс аддзӧм бӧрын Исав юаліс: «Кодъяс тайӧ тэнад?» Яков вочавидзис: «Менам челядьӧй, кодъясӧс Ен сетіс меным, тэнад кесйӧглы».

⁶ Сэки матыстчисны кесйӧг аньяс асланыс челядькӧд да копыртчылісны Исавлы.

⁷ Сэсся матыстчис Лия аслас челядьыскӧд да тшӧтш копыртчыліс. На бӧрся матыстчисны да копыртчылісны Ӧсип да Ракель.

⁸ Исав юаліс: «Чукӧр бӧрся чукӧр меным воча локтісны пемӧсъясыд. Мыйла тэ ыстін найӧс?» Яков шуис: «Медым тэ вӧлін бур сьӧлӧма ме дінӧ, ыджыдӧй».

⁹ Исав шуис: «Вокӧй, аслыд коль. Менам ставыс эм».

¹⁰ «Ог, – шуис Яков. – Ло бур сьӧлӧма ме дінӧ да сибӧд менсьым козинӧс. Ме локті тэ водзӧ, кыдзи Ен водзӧ локтӧны, и тэ бура сибӧдін менӧ.

¹¹ Босьт менсьым козинӧс. Енмыс меным уна сетіс, менам ставыс эм». Яков ёна корис Исавӧс босьтны козинъяссӧ, и сійӧ босьтіс.

¹² Исав шуис: «Мӧдӧдчамӧй. Ме водзвылад муна».

¹³ Яков шуис сылы: «Ыджыдӧй, тэ тӧдан, мый челядьӧй нэриникӧсь. А ыжъясӧй да мӧсъясӧй вайсялӧм бӧраныс лысьтанаӧсь. Лунтыр кӧ тэрмӧдлӧмӧн вӧтлан найӧс, ставныс куласны.

¹⁴ Ыджыдӧй, тэ миян водзын мун, а ме, тэнад кесйӧг, тэ бӧрся ньӧжйӧник вӧтча, кыдзи менам ыж-мӧскӧй да ныв-пиӧй вермасны муннысӧ. Сэсся локта Сеир керӧсвыв муӧ тэ дінӧ, ыджыдӧй».

¹⁵ Исав шуис: «Коля тэ дінӧ ассьым некымын мортӧс». Яков шуис: «Оз ков! Меным тырмана, мый тэ бур сьӧлӧма ме дінӧ, ыджыдӧй!»

¹⁶ Сійӧ жӧ лунӧ Исав мӧдӧдчис аслас туйӧд Сеир керӧсвыв муӧ.

¹⁷ Яков мӧдӧдчис Суккотӧ. Сэтчӧ воӧм бӧрын лэптіс аслыс керка, а ыж-мӧскыслы вӧчаліс лэбувъяс. Та вӧсна нимтіс тайӧ местасӧ Суккотӧн.

¹⁸ Месопотамияысь бура воӧдчӧм бӧрын Яков локтіс Ханаан муӧ, Сикем карӧ, да сувтӧдіс чомсӧ кар бокӧ.

¹⁹ Сикем вокъяслысь, Хамор пиянлысь, сійӧ ньӧбис эзысь вылӧ видз-му да сувтӧдіс сэтчӧ ассьыс чомсӧ.

²⁰ Яков лэптіс сэтчӧ тшӧтш висьпуктанін да шыасис Израильлӧн Господь Ен дінӧ.