Олӧм 32 - Коми Библия 2023

Яков ыстӧ козинъяс Исав вокыслы

¹ Яков водзӧ муніс аслас туйӧд. [Сійӧ видзӧдліс да аддзис Енлысь тышкакотырсӧ.] Сійӧс паныдалісны Енлӧн анделъяс.

² Найӧс аддзигӧн Яков шуис: «Тайӧ Енлӧн тышкакотырыс». Та вӧсна нимтіс тайӧ местасӧ Маханаимӧн.

³ Яковлӧн Исав вокыс оліс Эдомын, Сеир керӧсвыв муын. Яков ыстіс юӧртысьясӧс вокыс дінӧ,

⁴ тшӧктіс висьтавны сылы: «Исав ыджыдӧй, ме – тэнад Яков кесйӧгыд, ме дыр олі Лаван ордын.

⁵ Ӧні менам эмӧсь ӧшъяс, осёлъяс да ыжъяс, кесйӧгъяс да кесйӧг аньяс. Ме ысті юӧртысьясӧс тэ дінӧ, медым тэ вӧлін бур сьӧлӧма ме дінӧ».

⁶ Юӧр нуысьяс бӧр локтісны Яков дінӧ да шуисны: «Ми ветлім тэнад Исав вокыд дінӧ. Сійӧ ачыс локтӧ тэнӧ вочаавны, и сыкӧд локтӧ нёльсё морт».

⁷ Яков ёна повзис да шӧйӧвошис. Ассьыс йӧзсӧ, ыжъяссӧ, мӧсъяссӧ да верблюдъяссӧ сійӧ юкис кык пельӧ,

⁸ ӧд мӧвпаліс: «Исав кӧ уськӧдчас ӧти чукӧрыс вылӧ да пасьвартас сійӧс, мӧд чукӧрыс вермас пышйыны да ловйӧн кольны».

⁹ Яков кевмысис: «Господьӧй, Ӧвраам батьлӧн Ен да Исаак батьлӧн Ен! Тэ тшӧктін меным бергӧдчыны аслам муӧ, аслам чужанінӧ, и кӧсйысин бур вӧчны меным.

¹⁰ Тэнад буралӧмыд ыджыд, Тэ уна бурсӧ вӧчин меным, Аслад кесйӧглы. Ме ог сулав та доныс! Йӧрдан ю вуджигӧн менам вӧлі сӧмын бедь, а ӧні, бӧрсӧ локтігӧн, меным ковмис ыджыд овмӧсӧс кык пельӧ юкны.

¹¹ Мезды менӧ Исав вокысь! Ме пола, мый сійӧ локтас да виас менӧ, виас тшӧтш менсьым челядьӧс мамъясыскӧд.

¹² Тэ шуин, мый Тэ бур вӧчан меным, и кӧсйысин, мый месянь чужысьыс лоас саридздор лыа мында – сы мында, мый некод оз вермы найӧс лыддьынысӧ».

¹³ Войсӧ Яков узис сэні. Асывнас сійӧ лӧсьӧдіс Исав вокыслы козинъяс:

¹⁴ кыксё кӧзаӧс, кызь ай кӧзаӧс, кыксё ыжӧс, кызь межӧс,

¹⁵ комын лысьтан верблюдӧс пияныскӧд, нелямын мӧскӧс, дас ӧшкӧс, кызь энь да дас ай осёлӧс.

¹⁶ Быд пемӧс чукӧр дінӧ сувтӧдіс кесйӧгӧс да тшӧктіс мунны водзвылас, ӧта-мӧдсьыс торйӧн.

¹⁷ Медводзын мунысьыслы тшӧктіс: «Менам Исав вокӧй кор паныдасяс тэкӧд да юалас, кодлӧн тэ, кытчӧ мунан да кодлӧн тайӧ пемӧсъясыс,

¹⁸ сэк шу: ”Тэнад Яков кесйӧглӧн. Сійӧ ыстӧ козин тэныд, аслас Исав ыджыдлы. Ачыс Яков локтӧ миян бӧрся”».

¹⁹ Тадзи шуны тшӧктіс быдӧнлы, коді пемӧсъясӧс вӧтлігас паныдасяс Исавкӧд.

²⁰ Нӧшта тшӧктіс шуны, мый сылӧн Яков кесйӧгыс на бӧрся локтӧ. Ӧд Яков кӧсйис ас водзвылас ыстӧм козиннас небзьӧдны Исавлысь сьӧлӧмсӧ. Яков чайтіс, мый тадзи Исав сибӧдас сійӧс.

²¹ Сійӧ ыстіс козинъяссӧ водзвылас, а ачыс узьмӧдчис сувтанінас.

Яков вермасьӧ Енкӧд

²² Войнас Яков чеччис, босьтіс кыкнан гӧтырсӧ, кыкнан кесйӧг аньсӧ, дас ӧтикнан писӧ да келӧмӧн вуджис Явок ю.

²³ Йӧзсӧ колльӧдӧм бӧрын тшӧктіс вуджӧдны ю сайӧ став ассьыс ыж-мӧссӧ да эмбурсӧ.

²⁴ Яков кольччис ӧтнас. Войнас Кодкӧ локтіс да кыа петтӧдз вермасис Яковкӧд.

²⁵ Кор аддзис, мый оз вермы Яковӧс, вартіс сылы лядьвеяс. Тадзи вермасигас дойдіс Яковлысь лядьвей сӧнсӧ.

²⁶ Сэсся шуис Яковлы: «Лэдз Менӧ, ӧд кыа нин петӧ». Яков шуис: «Ог лэдз, кытчӧдз он бурси менӧ».

²⁷ Мӧдыс юаліс: «Мый тэнад нимыд?» «Яков», – вочавидзис Яков.

²⁸ Мӧдыс шуис: «Ӧнісянь тэнад нимыд оз ло Яков, а Израиль, ӧд тэ вермасин Енкӧд да йӧзкӧд, и вермин».

²⁹ Яков шуис: «Висьтав Ассьыд нимтӧ!» Сійӧ вочавидзис: «Мыйла тэ юасян Менсьым нимӧс? [Сійӧ шензьӧдана.]» Сэсся бурсиис Яковӧс сэні.

³⁰ Яков шуис: «Аслам синмӧн Енмӧс аддзылі и ловйӧн коли». Та вӧсна нимтіс тайӧ местасӧ Пенуэлӧн.

³¹ Кыпӧдчис шонді. Яков муніс Пенуэлсянь чотігтырйи.

³² Израиль войтыр ӧнӧдз оз сёйны лядьвей сӧнсӧ, ӧд Вермасьысь вартіс сэтчӧ Яковлы.