Олӧм 31 - Коми Библия 2023

Яков пышйӧ Лаван дінысь

¹ Яков кыліс Лаван пиянлысь сёрнисӧ, Яков пӧ ставсӧ босьтіс батьнымлысь да сы овмӧссянь пӧ озырмӧдчис.

² Лаванлӧн чужӧм сертиыс Яков казяліс, мый Лаван кутіс мустӧмтны сійӧс.

³ Сэки Господь шуис сылы: «Бӧр бергӧдчы батьясыдлӧн муӧ, аслад чужанінад. Ме лоа тэкӧд».

⁴ Яков тшӧктіс корны Ракельӧс да Лияӧс видз вылӧ, ыжъяс йирсянінӧ.

⁵ Налы шуис: «Батьныдлӧн чужӧм сертиыс ме казялі, мый сійӧ кутіс мустӧмтны менӧ. Но менам батьӧйлӧн Енмыс мекӧд.

⁶ Ті ӧд асьныд тӧданныд, мый ме став вынӧн кесъялі тіян батьныдлы.

⁷ А сійӧ кымынысь пӧрйӧдліс менӧ, дасысь удждонӧс вежліс. Но Енмыс эз лэдз сылы меным лёксӧ вӧчны.

⁸ Кор батьныд шуис, мый чутӧсь ыжъяс лоасны меным удждонӧн, сэки ставныс чужтісны чутӧсь пиянӧс. А кор шуис, мый сера ыжъяс лоасны меным удждонӧн, сэки ставныс чужтісны сера пиянӧс.

⁹ Ен мырддис пемӧсъяссӧ батьныдлысь да сетіс меным.

¹⁰ Ӧтчыд пемӧсъяслӧн тырсялан кадӧ ме аддзи вӧтӧн, мый сера, чутӧсь да паса ай кӧзаяс да межъяс чеччалӧны энь кӧзаяс да ыжъяс вылӧ.

¹¹ Енлӧн андел шуис меным вӧтын: ”Яков!” Ме вочавидзи: ”Ме тані”.

¹² Сійӧ шуис: ”Видзӧдлы: став ай кӧзаыс да межыс, кодъяс чеччалӧні энь кӧзаяс да ыжъяс вылӧ, сераӧсь, чутӧсьӧсь да пасаӧсь. Ме ӧд аддзи, мый Лаван тэныд вӧчис.

¹³ Ме Ен, коді петкӧдчи тэныд Вефильын. Сэні тэ кисьтін вый вежа из вылӧ да кыв сетін Меным. Ӧні тэ чеччы, пет тайӧ мусьыс да бӧр мун аслад чужанінӧ. [Ме лоа тэкӧд.]”»

¹⁴ Ракель да Лия шуисны Яковлы воча: «Миян абу некутшӧм пай бать керкаын. Батьным кулӧм бӧрын нинӧм оз вудж миянлы.

¹⁵ Ми сылы бокыса кодьӧсь. Сійӧ ас вылас видзис ставсӧ, мый миянӧс вузалӧмысь чуктіс сылы.

¹⁶ Став озырлуныс, мый Ен мырддис миян батьнымлысь, ӧні миян да миян челядьлӧн. Сідзкӧ, мый тшӧктӧ тэныд Ен, сійӧс и вӧч».

¹⁷ Яков пуксьӧдіс челядьсӧ да гӧтыръяссӧ верблюдъяс вылӧ,

¹⁸ босьтіс аскӧдыс став озырлунсӧ да став ыж-мӧссӧ, мый сійӧ нажӧвитіс Месопотамияын, и мӧдӧдчис Ханаан муӧ Исаак батьыс дінӧ.

¹⁹ Кор Лаван вӧлі ыж шыранінын, Ракель гусяліс сылысь гортса бӧлбанъяссӧ.

²⁰ Нинӧм висьтавтӧг Яков пышйис арамей Лаван дорысь

²¹ став эмбурнас. Вуджис ю да мӧдӧдчис Галаад керӧсвыв мулань.

Лаван суӧдӧ Яковӧс

²² Коймӧд луннас Лаванлы висьталісны Яковлӧн мунӧм йылысь.

²³ Сэки Лаван чукӧртіс [пиянсӧ да] ассьыс рӧдвужсӧ да вӧтчис Яков бӧрся. Сизимӧд луннас Галаад керӧсвыв муын вӧтӧдіс сійӧс.

²⁴ Войнас узигас арамей Лаванлы петкӧдчис Ен. Сійӧ шуис: «Эн вид Яковӧс».

²⁵ Лаван суӧдіс Яковӧс. Ассьыс чомъяссӧ Яков вӧлі зэвтӧма керӧс вылӧ. Лаван рӧдвужыскӧд тшӧтш зэвтісны чомъяснысӧ Галаад керӧсвыв муӧ.

²⁶ Лаван шуис Яковлы: «Мый тэ вӧчин! Тэ ылӧдлін менӧ! Тышын шедӧдӧмаясӧс моз тэ пышйӧдін менсьым нывъясӧс.

²⁷ Мыйла тэ пышйин? Мунін гусьӧн, нинӧм эн висьтав? Ме эськӧ колльӧді тэнӧ гажа сьыланкывъясӧн, тимпанӧн да гуслиӧн.

²⁸ Тэ эн лэдз весиг окыштны ассьым нывъясӧс да налысь ныв-писӧ. Тэ мывкыдтӧма вӧчин.

²⁹ Ме верми тіянлы лёк вӧчны, но тӧрыт войнас тіян батьныдлӧн Ен шуис меным: ”Эн вид Яковӧс”.

³⁰ Тэ мунін, ӧд ёна гажтӧмтчин бать керкасьыд, но мыйла тэ гусялін менсьым енъясӧс?»

³¹ Яков вочавидзис Лаванлы: «Ме полі тэысь, мый мырддян ассьыд нывъястӧ [да ставсӧ, мый менам эм].

³² Сійӧ, код ордысь аддзан енъястӧ, ловйӧн оз коль. Миян рӧдвуж дырйи видзӧдав, мый эм ме ордын. Сюрас кӧ мыйкӧ тэнад, бӧр босьт аслыд». [Но сійӧ нинӧм эз аддзы.] Яков эз тӧд, мый Ракель гусяліс идолъяссӧ.

^33-34 Лаван корсьысис Яков чомйысь, Лия чомйысь, кык кесйӧг аньлӧн чомйысь, но эз аддзы. Та дырйи Ракель босьтіс гортса бӧлбанъяссӧ да дзебис верблюдлӧн ӧныр улӧ, а ачыс пуксис сэтчӧ. Лия ордысь петӧм бӧрын Лаван пырис Ракель чомйӧ, корсьысис гӧгӧр, но эз аддзы.

³⁵ Ракель шуис аслас батьыслы: «Эн скӧрмы, ыджыдӧй, мый ог вермы сувтны тэ водзӧ. Менам ӧні сійӧ, мый аньяслӧн овлӧ быд тӧлысьӧ». Лаван корсис [чом пасьталаысь], но эз аддзы гортса бӧлбанъяссӧ.

³⁶ Яков скӧрмис да пондіс мыжавны Лаванӧс: «Мыйӧн ме тэ водзын мыжа? Кутшӧм лёктор тэныд вӧчи, мый тэ вӧтӧдін менӧ?

³⁷ Тэ видзӧдалін менсьым став кӧлуйсӧ, и аддзин эн мыйкӧ? Вай петкӧдлы менам гортсаясӧй да аслад гортсаясыд водзын, мед найӧ шуасны, коді мыжа.

³⁸ Ме кызь во олі тэ ордын. Тэнад ыжъясыд да кӧзаясыд эз чӧвтчывлыны. Тэнсьыд межъястӧ ме эг сёйлы.

³⁹ Косявлӧм пемӧсӧс ме эг вайлы тэныд, ӧд тэ лыддин сійӧс менам воштӧмторйӧн. Ме мынтысьлі тэныд вошӧм пемӧсысь, лунын кӧть войын сійӧ вошліс.

⁴⁰ Лунся жарас ме пӧжси, а войся кӧдзыдсьыс кынмавлі, унпӧтӧй меным эз шедлы.

⁴¹ Тадзи вӧлі кызь во чӧж тэ ордын олігӧн. Ме кесъялі тэныд дас нёль во кыкнан нылыд вӧсна да квайт во пемӧсъясыд вӧсна, а тэ дасысь удждонӧс вежлін.

⁴² Эз кӧ вӧв мекӧд батьӧйлӧн Енмыс, Ӧвраамлӧн Енмыс, кодысь тшӧтш Исаак полӧ, тэ эськӧ ыстін менӧ куш киӧн. Енмыс аддзис менсьым мырсьӧмӧс да сьӧкыдалӧмӧс, та вӧсна дорйис менӧ войнас».

Яков да Лаван кӧрталӧны йитӧд

⁴³ Лаван вочавидзис Яковлы: «Тайӧ нывъясыс ӧд менам, налӧн челядьыс и пемӧсъясыс менам. Ставыс, мый тэнад син водзын – менам. Но мый ме верма вӧчны нывъяскӧд да налӧн челядькӧд, кодъясӧс найӧ чужтісны?

⁴⁴ Ӧні тэа-меа кӧрталам йитӧд». [Сэк Яков шуис сылы: «Миянкӧд тані некод абу. Но тӧд, Енмыс кылӧ тэа-меаӧс».]

⁴⁵ Яков босьтіс из да пуктіс сійӧс казьтыланпас пыдди.

⁴⁶ Яков шуис рӧдвужыслы: «Чукӧртӧй изъяс». Найӧ чукӧртісны да вӧчисны мыльк. Сэсся ӧтлаын сёйисны-юисны мыльк бокас. [Лаван шуис Яковлы: «Талун тайӧ мылькйыс сулалӧ тані морт пыдди да кылӧ сёрнитчӧмнымӧс».]

⁴⁷ Лаван нимтіс мыльксӧ Егар-Сагадутаӧн, а Яков нимтіс Галаадӧн.

⁴⁸ Лаван шуис: «Талун тайӧ мылькйыс [да казьтылан изйыс, мый ме сувтӧді,] морт пыдди кылӧ сёрнитчӧмнымӧс». Сійӧн тайӧ местасӧ нимтӧны Галаад,

⁴⁹ и тшӧтш Миспа, ӧд Лаван шуис: «Мед видзӧдас Господь кыкнанным бӧрся, кор ми ылыстчам ӧта-мӧднымысь.

⁵⁰ Тэ кӧ менам нывъяскӧд кутан лёкнога овны либӧ наысь ӧтдор босьтан гӧтыръясӧс, Ен аддзӧ тайӧс. Весиг кӧ некод оз аддзы да оз висьтав та йылысь, но Енмыс аддзӧ.

⁵¹ Со, тайӧ мыльксӧ да тайӧ казьтылан изсӧ ме пукті тэа-меа костӧ.

⁵² Тайӧ мылькйыс да казьтылан изйыс морт пыдди кылісны миянлысь сёрнитчӧмнымӧс. Найӧ кутасны миянлы казьтывны, медым на бокиті ми эгӧ вуджӧй ӧта-мӧд дінӧ лёк мӧвпъясӧн.

⁵³ Миян костын ёрдысьыс Ӧвраамлӧн да Нахорлӧн Ен, налӧн батьлӧн Ен». Яков кыв сетіс Ен водзын, кодысь поліс сылӧн Исаак батьыс.

⁵⁴ Яков начкис керӧс вылын пемӧсӧс, вайис сійӧс вись пыдди да корис ставнысӧ сёйны. Сёйӧм-юӧм бӧрын найӧ кольччисны керӧс вылӧ узьны.

⁵⁵ Лаван чеччис водз асывнас, окыштіс ассьыс нывъяссӧ да налысь ныв-писӧ, бурсиис найӧс, сэсся бӧр муніс аслас оланінӧ.