Олӧм 30 - Коми Библия 2023

¹ Ракель гӧгӧрвоис, мый оз вермы чужтыны Яковлы кага. Та вӧсна кутіс вежавны аслас чойыслы. Яковлы сійӧ шуис: «Сет меным челядь, а он кӧ – ме кула».

² Яков скӧрмис Ракель вылӧ да шуис сылы: «Ме ӧмӧй Ен, коді оз сет тэныд кынӧмасьнысӧ?»

³ Ракель шуис: «Босьт менсьым Валла кесйӧг аньӧс да узь сыкӧд. Сійӧ мед чужтас, а кагаыслы мамнас ме лоа».

⁴ Ракель сетіс Валлаӧс Яковлы гӧтырӧ, и Яков узис сыкӧд.

⁵ Валла кынӧмасис да чужтіс Яковлы пиӧс.

⁶ Ракель шуис: «Енмыс ме дор, кыліс менӧ да сетіс меным пиӧс». Та вӧсна сійӧ пуктіс пиыслы Дан ним.

⁷ Ракельлӧн Валла кесйӧг аньыс нӧшта кынӧмасис да чужтіс Яковлы мӧд пиӧс.

⁸ Сэки Ракель шуис: «Ёна вермаси ме аслам чойкӧд да верми». Сійӧ пуктіс пиыслы Неффалим ним.

⁹ Лия гӧгӧрвоис, мый дугдіс чужтынысӧ, та вӧсна ассьыс Зелфа кесйӧг аньсӧ сетіс гӧтырӧ Яковлы [и Яков узис сыкӧд].

¹⁰ Зелфа чужтіс Яковлы пиӧс.

¹¹ Сэк Лия шуис: «Майбырӧй!» да пуктіс пиыслы Гад ним.

¹² Сэсся Лиялӧн Зелфа кесйӧг аньыс чужтіс Яковлы мӧд пиӧс.

¹³ Лия шуис: «Ме шуда! И шудаӧн кутасны шуны менӧ аньяс». Сійӧ пуктіс пиыслы Асир ним.

¹⁴ Шобді вундан кадӧ Рувим аддзис видз-му вылысь мандрагораяс да вайис Лия мамыслы. Сэки Ракель шуис Лия чойыслы: «Вай меным пиыдлысь мандрагораястӧ».

¹⁵ Но Лия шуис сылы: «Этша на тэныд, мый мырддин менсьым верӧсӧс! Нӧшта на пиӧйлысь мандрагораяссӧ мырддян!» Ракель шуис: «Пиыдлӧн мандрагораясысь Яков мед тэкӧд узяс тайӧ войсӧ».

¹⁶ Рытнас Яков локтіс видз-му вылысь. Лия петіс сылы воча да шуис: «Лок ме дінӧ, ӧд ме ньӧби тэнӧ пиӧйлӧн мандрагораясысь». Яков узис сыкӧд тайӧ войсӧ.

¹⁷ Ен кыліс Лияӧс – сійӧ кынӧмасис да чужтіс Яковлы витӧд пиӧс.

¹⁸ Сэк Лия шуис: «Енмыс меным водзӧс сетіс сыысь, мый ме сеті ассьым кесйӧг аньӧс верӧслы». Сійӧ пуктіс пиыслы Иссакар ним [нимыслӧн вежӧртасыс ”водзӧс сетӧм”].

¹⁹ Лия нӧшта кынӧмасис да чужтіс Яковлы квайтӧд пиӧс.

²⁰ Лия шуис: «Енмыс сетіс меным вывті бур козин. Менам верӧсӧй ӧні ме ордын кутас овны, ӧд ме квайт пиӧс сылы чужті». Сійӧ пуктіс пиыслы Завулон ним.

²¹ Сэсся Лия чужтіс нылӧс да пуктіс сылы Дина ним.

²² Енмыс эз вунӧд Ракельӧс, кыліс сійӧс да сетіс сьӧктыны сылы.

²³ Ракель кынӧмасис, чужтіс [Яковлы] пиӧс да шуис: «Енмыс вештіс ме вылысь яналӧмӧс».

²⁴ Сійӧ пуктіс пиыслы Ӧсип ним да шуис: «Мед Господь сетас на меным мӧд пиӧс».

Яков озырмӧ

²⁵ Ракель чужтіс Ӧсипӧс. Та бӧрын Яков шуис Лаванлы: «Лэдз менӧ, ме муна гортӧ, аслам муӧ.

²⁶ Сет меным гӧтыръясӧс да челядьӧс, ӧд на вӧсна ме кесъялі тэныд. Тэ тӧдан, мый ме тэныд бура кесъялі».

²⁷ Лаван шуис сылы: «Ло бур сьӧлӧма, кывзы менӧ! Ӧні ме тӧда, мый тэ вӧсна Господь бурсиис менӧ.

²⁸ Висьтав ачыд, кутшӧм дон тэныд мынтыны?»

²⁹ Яков шуис сылы: «Тэ тӧдан, кыдзи ме кесъялі тэныд, да кутшӧмӧсь лоины пемӧсъясыд ме дырйи.

³⁰ Меӧдз тэнад пемӧсыд этша вӧлі, а ме локті да, унасьыс-уна лои! Менам локтӧмсянь Господь ёна бурсиис тэнӧ. А кор нӧ ме кута уджавны аслам гортсалы?»

³¹ Лаван юаліс: «Кыдзи мынтысьны тэныд, висьтав?» Яков шуис: «Оз ков мынтысьны. Но ӧтитор кӧ вӧчан, ме кута водзӧ видзны тэнсьыд ыжъястӧ.

³² Талун ме кытшовта ыжъястӧ да кӧзаястӧ. Ме торйӧда на пӧвстысь став чутӧсь, сера да сьӧд ыжсӧ, тшӧтш став чутӧсь да сера кӧзасӧ. Водзӧвылӧ татшӧмъясыс лоасны меным удждон пыдди.

³³ Ме кӧ ылӧдла тэнӧ, регыд мысти тэ ачыд казялан. Локтан кӧ видзӧдлыны менсьым ыж-кӧзаӧс да аддзан кӧ ме ордысь сертӧм-чуттӧм кӧзаясӧс либӧ сьӧд ыжъяс кындзи мӧд сера ыжъясӧс, сідзкӧ, найӧс тэнсьыд вӧлі гусялӧма».

³⁴ Лаван шуис: «Бур, мед лоас тэ ног».

³⁵ Сійӧ лунӧ Лаван торйӧдіс ай да энь кӧзаяссӧ, кодъяслӧн вуруныс мыйтакӧ вӧлі еджыд сера либӧ чутъяса, торйӧдіс тшӧтш став сьӧд ыжсӧ. Став торйӧдӧм кӧза-ыжсӧ сетіс видзны аслас пияныслы.

³⁶ Сійӧ тшӧктіс вештыны тайӧ ыж чукӧрсӧ Яков дінысь куим лун мунан ылнаӧдз. А Яков кольччис видзны Лаванлысь мукӧд ыжсӧ.

³⁷ Оржы, миндаль да платан пуясысь Яков перйис уль ньӧр да вундаліс кырсьсӧ сідз, мый ньӧрйыс лои еджыд визьяса.

³⁸ Визя ньӧръяссӧ пукталіс пемӧсъяслы юан воръясӧ, медым ыжъяс да кӧзаяс васӧ юиганыс видзӧдісны ньӧръяс вылӧ. Юкталанінын найӧ тырсялісны.

³⁹ Пемӧсъяс, кодъяс ньӧръяс вылӧ видзӧдігӧн тырсялісны, чужтісны сера, чута да пегана пиянӧс.

⁴⁰ Татшӧм кӧзапиянсӧ да баляпиянсӧ Яков торйӧдавліс аслыс. Ыжъяссӧ сувтӧдлывліс Лаванлӧн сера да сьӧд пемӧсъяслы воча. Тадзи Яков чукӧртіс аслыс ыжъясӧс да кӧзаясӧс, видзис найӧс Лаванлӧн пемӧсъясысь торйӧн.

⁴¹ Быд пӧрйӧ, кор нӧйччисны ён пемӧсъяс, Яков пуктыліс на водзӧ юан воръясас визя ньӧръяс, медым найӧ тырсяласны ньӧръяс вылӧ видзӧдӧмӧн.

⁴² Кор нӧйччисны жебиник пемӧсъяс, сэки ньӧръяссӧ эз пуктывлы. Татшӧм ногӧн жеб пемӧсыс веськавліс Лаванлы, а ёныс – Яковлы.

⁴³ Тадзи Яков лои вывті озырӧн. Сылӧн лои уна ыж [да мӧс], тшӧтш верблюдъяс да осёлъяс, кесйӧг аньяс да кесйӧгъяс.