Олӧм 27 - Коми Библия 2023

Яков босьтӧ бурсиӧм

¹ Исаак пӧрысьмис да синтӧммис. Ӧтчыд сійӧ корис ыджыдджык писӧ ас дорас да шуис: «Пиукӧй!» Исав вочавидзис: «Мый, батьӧй?»

² Исаак шуис: «Ме пӧрысьми. Дыр-ӧ меным колис овны, ог тӧд.

³ Босьт ассьыд кыйсянторъястӧ, ньӧввужтӧ да ньӧвъястӧ да ветлы пӧтка кыйны.

⁴ Дасьты менсьым радейтана сёянӧс. Ме сёя, а сэсся бурсиа тэнӧ кулӧм водзвылын».

⁵ Ревекка кывліс Исааклысь Исав пиыскӧд сёрнитӧмсӧ. Исав муніс пӧтка кыйны.

⁶ Ревекка висьталіс [ичӧтджык] Яков пиыслы: «Ме кывлі батьыдлысь Исавкӧд сёрнитӧмсӧ.

⁷ Батьыд тшӧктіс сылы пӧтка кыйны да сёян дасьтыны. Кӧсйысис, мый сёйӧм бӧрас Господь водзын бурсиас Исавӧс.

⁸ Ӧні, менам пиӧй, кывзы менӧ. Вӧч, мый тшӧкта тэныд.

⁹ Мун да пемӧс чукӧрысь бӧрйы кык бур кӧзапиӧс. Ме дасьта наысь батьыдлы радейтана сёянсӧ.

¹⁰ Сэсся тэ нуан сійӧс батьыдлы, а сійӧ сёйыштас да бурсиас тэнӧ кулӧм водзвылас».

¹¹ Яков шуис мамыслы: «Исав воклӧн кучикыс гӧна, а менам – шыльыд.

¹² Батьӧй кӧ малыштас менӧ да гӧгӧрвоас, мый ме ылӧдлі сійӧс, сэки ме ёрӧм улӧ веськала, и бурсиӧмыс оз ло меным».

¹³ Мамыс шуис сылы: «Ме вылын мед лоас тайӧ ёрӧмыс, пиӧй. Тэ сӧмын кывзысь. Мун да вай меным, мый кори».

¹⁴ Яков муніс да вайис мамыслы кӧзапиянӧс. Мамыс вӧчис батьныслысь радейтана сёянсӧ.

¹⁵ Сэсся Ревекка босьтіс аслас видзанінысь ыджыдджык Исав пиыслысь медбур паськӧмсӧ да пасьтӧдіс ичӧтджык Яков писӧ.

¹⁶ Сылысь кисӧ да голясӧ гартыштіс кӧза куӧн.

¹⁷ Сэсся сетіс Яковлы киас яй да нянь.

¹⁸ Яков пырис батьыс ордӧ да шуис: «Батьӧй». Батьыс вочавидзис: «Коді тэ, пиӧй?»

¹⁹ Яков шуис батьыслы: «Ме Исав, тэнад медводдза чужысьыд. Ме вӧчи, мый тэ тшӧктін. Чеччы, сёйышт пӧтка яй, а сэсся бурсиан менӧ».

²⁰ Исаак юаліс: «Кыдзи тэ, пиӧй, та ӧдйӧнсӧ кыйин?» Яков вочавидзис: «Господь, тэнад Енмыд, отсаліс меным».

²¹ Исаак шуис Яковлы: «Тэ-ӧ менам Исав пиӧй? Матыстчы, ме малышта тэнӧ».

²² Яков матыстчис Исаак батьыс дінӧ, и мӧдыс малыштіс сійӧс да шуис: «Гӧлӧсыс тай Яковлӧн, а киыс Исавлӧн».

²³ Батьыс эз тӧд, мый тайӧ Яков, ӧд киыс вӧлі Исавлӧн кодь гӧна. Сійӧ кӧсйис нин бурсины,

²⁴ но юаліс: «Тэ-ӧ менам Исав пиӧй?» Яков вочавидзис: «Ме».

²⁵ Исаак шуис: «Вай меным пӧтка яйтӧ, пиӧй. Ме сёя, сэсся бурсиа тэнӧ». Яков сетіс батьыслы, и сійӧ сёйис. Вайис на сылы вина, и сійӧ юис.

²⁶ Исаак шуис: «Пиӧй, матыстчы ме дінӧ да окышт менӧ».

²⁷ Яков матыстчис да окыштіс батьсӧ. Сэки Исаак кыліс паськӧм дуксӧ да бурсиис шуалӧмӧн: – Менам пи дорысь ӧвтӧ Господьӧн бурсиӧм видзьясӧн.

²⁸ Енмыс мед сетас тэныд енэжса лысва, мувыв вотӧс, уна нянь да вина.

²⁹ Войтыръяс мед кесъяласны тэныд, чужанкотыръяс мед копыртчасны тэныд. Вокъясыд вылын ло ыджыдӧн, мамыдлӧн пияныс мед копыртчасны тэныд. Тэнӧ ёрысьясӧс лоӧ ёрӧма, тэнӧ бурсиысьясӧс лоӧ бурсиӧма!

Исав корӧ бурсиӧм

³⁰ Исаак сӧмын на бурсиис Яковӧс, да Яков петіс аслас батьыс ордысь, кыйсянінысь локтіс Исав вокыс.

³¹ Исав дасьтіс сёян, вайис батьыслы да шуис: «Чеччы, батьӧй, сёйышт пӧтка яйтӧ, а сэсся бурсиан менӧ».

³² Батьыс юаліс: «Коді тэ?» Исав вочавидзис: «Ме тэнад Исав пиыд, медводдза чужысьыд».

³³ Исаакӧс повзьӧмысла дзӧрӧм босьтіс, сійӧ шуис: «А коді нӧ тэӧдз вайис меным пӧтка яйсӧ? Ме сёйи да бурсии сійӧс! Сійӧ и лоӧ бурсиӧманас».

³⁴ Батьыслысь кывъяссӧ кылӧм бӧрын Исав ырзӧмӧн бӧрддзис да гораа горӧдіс. Сэсся корис: «Батьӧй, бурси тшӧтш менӧ!»

³⁵ Но батьыс шуис: «Вокыд локтіс да ылӧдлӧмӧн босьтіс тэнсьыд бурсиӧмтӧ».

³⁶ Исав шуис: «Абу весьшӧрӧ сійӧ Яков нима – кык пӧрйӧ конйыштіс менӧ. Медводдза чужысь нимӧс босьтіс, и бурсиӧмӧс босьтіс». Исав юаліс на батьыслысь: «Меным ӧмӧй тэ эн коль бурсиӧмсӧ?»

³⁷ Исаак вочавидзис: «Ме пукті сійӧс тэ вылын ыджыднас. Вокъяссӧ сеті сылы кесйӧгӧ. Сеті нянь да вина. Мый ме верма сетны тэныд, пиӧй?»

³⁸ Но Исав шуис: «Батьӧй, тэнад ӧмӧй сӧмын ӧти бурсиӧм? Бурси тшӧтш менӧ, батьӧй!» [Исаак чӧв оліс.] Исав ыджыд гӧлӧсӧн бӧрддзис.

³⁹ Сэк Исаак батьыс шыасис: – Бур вотӧса муяс ылын лоӧны тэнад оланінысь, енэжса лысваыс оз кут кӧтӧдны сійӧс.

⁴⁰ Шыпурт помысь тэ кутан овны, аслад вокыдлы кутан кесъявны. Но воас кад, тэ сылы паныд кыпӧдчан, голя вывсьыд сылысь сийӧссӧ шыбитан.

⁴¹ Батьыслӧн бурсиӧм вӧсна Исав кутіс мустӧмтны Яков воксӧ. Исав мӧвпыштіс: «Матысмӧны батьным вӧсна бӧрдан лунъяс. Сэки ме виа Яков вокӧс».

⁴² Ревеккалы висьталісны Исавлысь кывъяссӧ. Сійӧ корис Яковӧс, ичӧтджык писӧ, да шуис сылы: «Исав вокыд кӧсйӧ вины тэнӧ.

⁴³ Кывзы менӧ, пиӧй. Чеччы да пышйы [Месопотамияӧ] Лаван вокӧй ордӧ Харанӧ.

⁴⁴ Олышт сэні мыйтакӧ, кытчӧдз вокыдлӧн ярлуныс оз кус,

⁴⁵ кытчӧдз сійӧ оз дугды скӧравны тэ вылӧ да оз вунӧд, мый тэ вӧчин сылы. Сэсся ме бӧр кора тэнӧ сэтысь. Мыйла меным кыкнаннытӧ воштыны ӧти лунӧ!»

⁴⁶ А Исаак верӧсыслы Ревекка шуис: «Тайӧ хеттей аньясыс вӧсна меным мустӧммис олӧмыс. Нӧшта кӧ Яков босьтас гӧтырӧ хеттей аньӧс, весиг ог кӧсйы овнысӧ!»